គេហទំព័រនេះនឹងដំណើរការកាន់តែប្រសើរប្រសិនបើអ្នកដាក់អោយដំណើរការ JavaScript
សំឡេងសន្តិភាព

    សម្ដេចតេជោ​ ហ៊ុន​ សែន​ ប្រសិទ្ធនាម​ការផ្ទុះឡើង​ថ្មី​នៃការឆ្លង​កូវីដ​១៩​ ថាជា​ព្រឹត្តិការណ៍​សហគមន៍២៨​វិច្ឆិកា​

    ដោយ៖ យូ វីរៈ​​ | ថ្ងៃចន្ទ ទី៣០ ខែវិច្ឆិកា ឆ្នាំ២០២០​ |
    សម្ដេចតេជោ​ ហ៊ុន​ សែន​ ប្រសិទ្ធនាម​ការផ្ទុះឡើង​ថ្មី​នៃការឆ្លង​កូវីដ​១៩​ ថាជា​ព្រឹត្តិការណ៍​សហគមន៍២៨​វិច្ឆិកា​ សម្ដេចតេជោ​ ហ៊ុន​ សែន​ ប្រសិទ្ធនាម​ការផ្ទុះឡើង​ថ្មី​នៃការឆ្លង​កូវីដ​១៩​ ថាជា​ព្រឹត្តិការណ៍​សហគមន៍២៨​វិច្ឆិកា​

    សៀមរាប៖ នៅក្នុង​ពិធីបើកការដ្ឋាន​សាងសង់​ និង​កែលម្អផ្លូវ​៣៨ខ្សែ ក្នុង​ក្រុងសៀមរាប​ ថ្ងៃទី​៣០​ ខែវិច្ឆិកា​ ឆ្នាំ២០២០​ សម្ដេចតេជោ​ ហ៊ុន​ សែន​ នាយករដ្ឋមន្ត្រី នៃ​កម្ពុជា​ បានប្រសិទ្ធនាម​នូវការ​ផ្ទុះឡើងថ្មី នៃ​ការ​ឆ្លង​កូវីដ​១៩​ ដែល​បាន​រកឃើញ​លើស្ត្រី​ម្នាក់​នៅថ្ងៃទី​២៨វិច្ឆិកា​ ថា​ជាព្រឹត្តិការណ៍​សហគមន៍ ២៨វិច្ឆិកា​។

    សម្ដេចតេជោ​ បានមានប្រសាសន៍ថា​ ការប្រសិទ្ធនាម​ព្រឹត្តិការណ៍​នេះ គឺ​ដើម្បី​ចៀសវាង​ប្រើប្រាស់​ឈ្មោះ​ឯក​ឧត្ដម​ ឆែម​ សាវុធ​ អគ្គនាយក នៃអគ្គនាយកដ្ឋាន​ពន្ធនាគារ នៃក្រសួងមហាផ្ទៃ​តទៅទៀត​។

    សម្ដេចតេជោ​ បន្ថែមដូច្នេះថា​ «​ នេះជាលើកដំបូង​ ដែលយើង​​បានចាប់ផ្ដើម​ឆ្លង​ចូល​ក្នុង​សហគមន៍ ដែលជាព្រឹត្តិការណ៍​រកមិនឃើញ​ក្បាល​កន្ទុយ ថា​វាចេញមកពីទីណា?​ ហើយបង្កប់ខ្លួន​នៅទីណា? ចំណុចនេះគឺជាចំណុច​ដែល​មាន​កា​របារម្ភធំបំផុត​»

    សម្ដេចតេជោ​ ហ៊ុន​ សែន​ បាន​បញ្ជាក់ដែរថា​ ប្រតិបត្តិការនេះ​ត្រូវ​បាន​ធ្វើ​ឡើង​ក្នុង​ល្បឿនលឿន និង​ទ្រង់​ទ្រាយ​ធំ​។ សម្ដេចតេជោ​ បន្ថែមថា​ ក្នុង​ព្រឹត្តិការណ៍សហគមន៍​ ២៨វិច្ឆិកា រហូត​មកពេលនេះក្រសួងសុខាភិបាល​ទទួលបាន​ ៣៣៣២ សំណាក​ មកពី៧ខេត្ត​ និង​បាន​ធ្វើតេស្ត​បាន​ចំនួន​ ២២៤៧សំណាក ក្នុងនោះ​បាន​រកឃើញ​ ១៤ករណី​ឆ្លង​វីរុសកូវីដ​១៩ និង​មានម្នាក់ទៀត​លទ្ធផលពីខេត្ត​សៀមរាប​ក៏ឆ្លង​ដែរ(ជាកូនស្រី​ឯកឧត្ដម​ ឆែម​ សាវុធ​)​ តែ​មិនទាន់​ត្រូវ​បាន​បញ្ជាក់​ដោយ​វិទ្យាស្ថានប៉ាស្ទ័រកម្ពុជា​នៅឡើយទេ​។

    សម្ដេចតេជោ​ បាន​លើកឡើងផងដែរថា​ ពេលនេះ​មិនមែនជាពេល​ត្រូវ​បន្ទោសគ្នា​ ហើយ​មិន​មែន​ត្រូវ​ទំលាក់កំហុស​ដាក់​នរណាម្នាក់ឡើយ គឺជាពេល​ដែលយើង​ត្រូវ​សាមគ្គីភាពគ្នា​ដើម្បី​ប្រយុទ្ធ​ប្រឆាំង​នឹង​កូវីដ​១៩​នេះ។ រយៈ​ពេល​ជិត ១១ខែមកនេះ កម្ពុជា​ បាន​បញ្ជៀស​ការឆ្លង​ក្នុង​សហគមន៍។

    សម្ដេចតេជោបាន​បញ្ជាក់ថា​ កម្ពុជា​បានកំពុង​​ប្រយុទ្ធលើ​សមរភូមិបី ​ទី១​.ការទប់ស្កាត់ការនាំចូល ទី២.ទប់ស្កាត់​ការឆ្លង​ចូលក្នុង​សហគមន៍ និង​ទី៣.ការព្យាបាលអ្នកដែលបាន​ឆ្លងឲ្យជាសះស្បើយ៕

    សូមស្ដាប់ប្រសាសន៍សម្ដេចតេជោ ហ៊ុន សែន ពាក់ព័ន្ធនឹងព្រឹត្តិការណ៍សហគមន៍ ២៨វិច្ឆិកា និងវិធានការរបស់រដ្ឋាភិបាលក្នុងការទប់ស្កាត់ការរីករាលដាលកូវីដ១៩

    បញ្ចេញមតិ
    អត្ថបទទាក់ទង