សម្តេចតេជោ ហ៊ុន សែន អញ្ជើញចូលរួមក្នុងកិច្ចប្រជុំកំពូលអាស៊ាន-ជប៉ុន លើកទី២៤
ភ្នំពេញ៖ នៅព្រឹកថ្ងៃទី២៧ ខែតុលា ឆ្នាំ២០២១ នេះសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញចូលរួមក្នុងកិច្ចប្រជុំកំពូលអាស៊ាន-ជប៉ុនលើកទី២៤ តាមប្រព័ន្ធវីដេអូជាមួយនឹងបណ្ដារមេដឹកនាំអាស៊ានដទៃទៀត។
នៅក្នុងកិច្ចប្រជុំនេះប្រមុខរដ្ឋាភិបាលអាស៊ានបានធ្វើការកត់សម្គាល់ លើឯកសារចំនួន២ ៖
ឯកសារទី១)របាយការណ៍វឌ្ឍនភាពស្ដីអំពីការអនុវត្តការកែសម្រួលការអនុវត្តសេចក្តីប្រកាសចក្ខុវិស័យស្ដីអំពីមិត្តភាព និងកិច្ចសហប្រតិបត្តិការអាស៊ាន-ជប៉ុន
ឯកសារទី២) របាយការណ៍ វឌ្ឍនភាពស្ដីពីការអនុវត្តសេចក្តីប្រកាសរួម ស្ដីពីកិច្ចសហប្រតិបត្តិការអាស៊ាន ជប៉ុន លើចក្ខុវិស័យអាស៊ាន ស្ដីពីឥណ្ឌូប៉ាស៊ីហ្វិក ។
សូមបញ្ជាក់ថា នៅឆ្នាំនេះជប៉ុនគឺជាដៃគូសន្ទនារបស់អាស៊ាន ៤៨ ឆ្នាំមកហើយ។ ប្រមុខរដ្ឋាភិបាលអាស៊ានក៏បានឯកភាពតាមសំណើរបស់ជប៉ុនឲ្យមានកិច្ចប្រជុំពិសេសនៅប្រទេសជប៉ុនក្នុងឆ្នាំ២០២៣ ដែលជាខួបលើកទី៥០នៃការបង្កើតភាពដៃគូរវាងអាស៊ាន និងជប៉ុន។
នៅក្នុងកិច្ចប្រជុំកំពូលអាស៊ាន-ជប៉ុនលើកទី២៤នេះ សម្ដេចតេជោ ហ៊ុន សែន និងប្រមុខថ្នាក់ដឹកនាំអាស៊ានបានគាំទ្រឱ្យមានកិច្ចប្រជុំនេះនៅប្រទេសជប៉ុន។ ប្រមុខរដ្ឋាភិបាលអាស៊ាន បានថ្លែងអំណរគុណដល់រដ្ឋាភិបាលជប៉ុនដែលបានផ្ដល់ជំនួយសន្ធឹកសន្ធាប់ ជាពិសេសពាក់ព័ន្ធនឹងការផ្ដល់វ៉ាក់សាំងប្រឆាំងជំងឺកូវីដ ១៩ ដល់ប្រទេសអាស៊ាន និងផ្ដល់វិភាគទាន ៥០លានដុល្លារដល់មជ្ឈមណ្ឌលអាស៊ាន សម្រាប់គ្រោះអាសន្នសុខភាពសាធារណៈ និងជំងឺកើតថ្មី។
នៅក្នុងកិច្ចប្រជុំកំពូលអាស៊ាន-ជប៉ុន ប្រមុខរដ្ឋាភិបាលនៃប្រទេសអាស៊ាន បានស្វាគមន៍ជំនួយជាកម្ចីពីជប៉ុនចំនួន ២៥០ ពាន់លានដុល្លារ ជាពិសេសតាមរយៈការគាំទ្រនិងការឆ្លើយតបនូវគ្រោះមហន្តរាយពាក់ព័ន្ធនឹងជំងឺកូវីដ១៩ ។
សូមជម្រាបថា កន្លងទៅនេះប្រមុខរដ្ឋាភិបាលអាស៊ានបានស្វាគមន៍ចំពោះជំនួយឥតសំណងចំនួន ២០០លានដុល្លារដែលជប៉ុនបានប្រកាសជួយដល់បរិក្ខាពេទ្យ និងឧបករណ៍ផ្សេងៗ ព្រមទាំងបានជួយទៅលើផ្នែកបច្ចេកទេសដល់បណ្ដាប្រទេសអាស៊ាន។ ប្រមុខរដ្ឋាភិបាលអាស៊ានក៏បានស្វាគមន៍ស្នើឲ្យជប៉ុនបន្តជួយកសាងសហគមន៍អាស៊ានជាពិសេសការតភ្ជាប់ផែនការមេឆ្នាំ២០២៥ និងជួយសមាហរណកម្មអាស៊ាន សម្រាប់ផែនការគំនិតផ្ដួចផ្ដើមអាស៊ានលើកទី៤ ព្រមទាំងឱ្យជប៉ុនចូលរួមចំណែកក្នុងការកាត់បន្ថយគម្លាតនៃការអភិវឌ្ឍ ជាពិសេសនៅតំបន់មេគង្គ ។ លើសពីនេះប្រមុខរដ្ឋាភិបាលអាស៊ាន ក៏បានពេញចិត្តចំពោះវឌ្ឍនភាពកិច្ចសហប្រតិបត្តិការរវាង អាស៊ាន និងជប៉ុនផងដែ ។
សូមគូសបញ្ជាក់ថា នៅក្នុងកិច្ចប្រជុំកំពូលអាស៊ាន-ជប៉ុនលើកទី២៤នេះ ប្រមុខរដ្ឋាភិបាលអាស៊ានបានស្នើសុំឲ្យបន្តជំរុញភាពជាដៃគូយុទ្ធសាស្ត្រអាស៊ាន-ជប៉ុនឲ្យកាន់តែស៊ីជម្រៅ និងរីកចម្រើនក្នុងការពង្រីកកិច្ចសហប្រតិបត្តិការលើគ្រប់វិស័យ ដែលមានដូចជា វិស័យឌីជីថល វិស័យសេដ្ឋកិច្ច វប្បធម៌ វិស័យសន្តិសុខ និងវិស័យផ្សេងៗទៀត។
កិច្ចប្រជុំកំពូលអាស៊ាន-ជប៉ុននេះផងដែរ នាយករដ្ឋមន្ត្រីនៃប្រទេសជប៉ុនបានប្រកាសថាជប៉ុននឹងបន្តគាំទ្រតួនាទីស្នូលរបស់អាស៊ាន។ និងជាចុងក្រោយប្រមុខរដ្ឋាភិបាលជប៉ុន និងអាស៊ាន បានពិភាក្សាទៅលើបញ្ហាតំបន់ដូចជាសមុទ្រចិនខាងត្បូង មីយាន់ម៉ា និងឧបទ្វីបកូរ៉េជាដើម៕
![](https://z-p3-scontent.fpnh18-3.fna.fbcdn.net/v/t39.30808-6/p526x395/248897169_4506741339374328_72014713904563161_n.jpg?_nc_cat=1&_nc_rgb565=1&ccb=1-5&_nc_sid=8bfeb9&_nc_eui2=AeFXuCvfoA2R8ILcCFqYtcHi-2KoT8dtWf_7YqhPx21Z_xEoXfK10EriF_CYXMXvwTZmTohUxNy1aEOcXQGq44bD&_nc_ohc=rOje7xaLK20AX8KAUGI&tn=MOh0jTdkNlhxKhEm&_nc_ht=z-p3-scontent.fpnh18-3.fna&oh=4a48980864a6a55b3914fafe7f4bf7ce&oe=617ECF01)
![](https://z-p3-scontent.fpnh18-3.fna.fbcdn.net/v/t39.30808-6/p526x395/242082006_4506741426040986_7151508033935645961_n.jpg?_nc_cat=1&ccb=1-5&_nc_sid=8bfeb9&_nc_eui2=AeFcod_wqlCx7nHJm51RYGq4qlc_KsSJWSCqVz8qxIlZIOPbMbj3AVbTAXOWPGay_S7INnnGkLa5sUI20YP5Om1c&_nc_ohc=4gww8DcjCiEAX_6L7fZ&_nc_ht=z-p3-scontent.fpnh18-3.fna&oh=035537672463406775506ce6cb4ad984&oe=617D1543)
![](https://z-p3-scontent.fpnh18-3.fna.fbcdn.net/v/t39.30808-6/p526x395/248943221_4506741436040985_4996770814181588295_n.jpg?_nc_cat=1&ccb=1-5&_nc_sid=8bfeb9&_nc_eui2=AeHYzSvTGPj3jmv-OOo4tsfUQvqxzE6IT7RC-rHMTohPtGoxGQ5bI6q1JIl0UCDq7e1xt8vC7KSpNtd4mTwanFMD&_nc_ohc=FY0eLVVtJOcAX9IBpxz&_nc_ht=z-p3-scontent.fpnh18-3.fna&oh=85d67caa3ee9dc248d7e7d3dc3a892e8&oe=617EC567)