សម្ដេចតេជោ ហ៊ុន សែន ផ្ដាំទៅអ្នកវិភាគពាក់ព័ន្ធការផ្អាកព្រះរាជពិធីបុណ្យអុំទូក សូមវិភាគបែបឆ្កួតលីលាបន្តទៀតចុះ

ដោយ៖ យូ វីរៈ | ថ្ងៃព្រហស្បតិ៍ ទី១៥ ខែកញ្ញា ឆ្នាំ២០២២ |

429

ភ្នំពេញ៖ នៅព្រឹកថ្ងៃទី១៥ ខែកញ្ញា ឆ្នាំ២០២២ សម្ដេចតេជោ ហ៊ុន សែន នាយករដ្ឋមន្ត្រី បានផ្ញើសារសំឡេងពិសេសជូនជនរួមជាតិ ស្ដីពីការផ្អាកព្រះរាជពិធីបុណ្យអុំទូក បណ្ដែតប្រទីប អកអំបុក និងសំពះព្រះខែ ថ្នាក់ជាតិ ឆ្នាំ២០២២នេះ។ សម្ដេចតេជោ ហ៊ុន សែន បានបញ្ជាក់ថា ការផ្អាកនេះ ដោយសាររាជរដ្ឋាភិបាលមើលឃើញពីចំណុចជាច្រើន ក្នុងនោះក៏មានការមិនទាន់ចប់ នៃករណីឆ្លងរីករាលដាលជំងឺកូវីដ-១៩នៅកម្ពុជាផងដែរ។

សម្តេចតេជោ ហ៊ុន សែន បានផ្តាំផ្ញើទៅក្រុមអ្នកវិភាគមួយចំនួន ដែលបានរិះគន់សម្តេច និងរាជរដ្ឋាភិបាលថា អស់លុយទើបផ្អាកព្រះរាជពិធីបុណ្យអុំទូក សូមអោយវិភាគបែបឆ្កួតលីលាតទៅទៀតចុះ។ សម្តេចតេជោជឿជាក់ថា ប្រជាពលរដ្ឋនឹងយល់ពីគោលបំណងរបស់រាជរដ្ឋាភិបាល ក្នុងការផ្អាកព្រះរាជពិធីបុណ្យអុំទូកនៅថ្នាក់ជាតិឆ្នាំ២០២២នេះ។

សម្ដេចតេជោបានគូសបញ្ជាក់ថា មានកត្តា២សំខាន់ដែលរដ្ឋាភិបាលសម្រេចផ្អាកព្រះរាជពិធីបុណ្យអុំទូកថ្នាក់ជាតិនៅឆ្នាំនេះ រួមមាន៖

- ទី១ កត្តាជំងឺកូវីដ-១៩ ៖ ការប្រមូលផ្តុំប្រជាជនដ៏ច្រើនរាប់លាននាក់នៅរាជធានីភ្នំពេញ គឺជាហានិភ័យខ្ពស់ នៃការចម្លង និងឆ្លងជំងឺកូវីដ-១៩ កាន់តែធ្ងន់ធ្ងរចូលទៅក្នុងសហគមន៍ប្រជាជនជាថ្មី និងនាំផលលំបាក ដែលយើងមិនអាចនឹកស្មានដល់។

– ទី២ កិច្ចប្រជុំកំពូលអាស៊ាន និងកិច្ចប្រជុំពាក់ព័ន្ធ៖ ប្រទេសធំៗ និងមហាអំណាចនានានឹងធ្វើដំណើរមកកាន់ប្រទេសកម្ពុជានៅថ្ងៃនោះ។

សូមស្ដាប់ប្រសាសន៍សម្ដេចតេជោ ហ៊ុន សែន៖

ពាក្យគន្លឹះទាក់ទង