សម្ដេចតេជោ ហ៊ុន សែន បញ្ជាក់ថា ភាពខ្លាំងរបស់ASEM គឺស្ថិតនៅលើគោលការណ៍ស្នូលរបស់ខ្លួន

ដោយ៖ យូ វីរៈ | ថ្ងៃសុក្រ ទី២៦ ខែវិច្ឆិកា ឆ្នាំ២០២១ |

696

ភ្នំពេញ៖ នៅថ្ងៃទី២៥ ខែវិច្ឆិកា ឆ្នាំ២០២១ ក្នុងមានជាម្ចាស់ផ្ទះនៃកិច្ចប្រជុំកំពូលអាស៊ី-អឺរ៉ុប លើកទី១៣ (ASEM13) សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានអញ្ជើញថ្លែងសុន្ទរកថាបើកដំណើរការកិច្ចប្រជុំកំពូលនេះ ក្រោមមូលបទ៖ ការពង្រឹងពហុភាគីនិយម ដើម្បីកំណើនរួម តាមប្រព័ន្ធវីដេអូ។

សម្ដេចតេជោ ហ៊ុន សែន មានប្រសាសន៍ថា បន្ទាប់ពីការរស់នៅអស់រយៈពេលជិត ២ឆ្នាំក្នុងស្ថានភាពនៃការរាតត្បាត នៃជំងឺកូវីដ១៩ ដែលបានជះឥទ្ធិពលយ៉ាងធ្ងន់ធ្ងរមិនធ្លាប់មាន មកលើអាយុជីវិតប្រជាជន និងសង្គម-សេដ្ឋកិច្ច សម្ដេចពិតជាមានសេចក្ដីរីករាយ ដែលពេលនេះ យើងអាចរៀបចំកិច្ចប្រជុំកំពូលASEM លើកទី១៣ បានទោះបីស្ថិតក្នុងទម្រង់ជាការជួបជុំតាមប្រព័ន្ធវីដេអូក៏ដោយ ស្របពេលដែលព្រំដែនរបស់យើងបានបើកឲ្យដំណើរការឡើងវិញ ជាបន្តបន្ទាប់។ សម្ដេចតេជោបន្តថា ខណៈដែលយើងទាំងអស់គ្នា ខិតខំប្រឹងប្រែងស្ដារសង្គម-សេដ្ឋកិច្ចឡើងវិញ ក្នុងដំណាក់កាលនៃការរស់នៅជាមួយជំងឺកូវីដ១៩ មូលបទដែលយើងបានជ្រើសរើសសម្រាប់កិច្ចប្រជុំកំពូលASEM លើកទី១៣នេះ ពោលគឺ ការពង្រឹងពហុភាគីនិយម ដើម្បីកំណើនរួមគ្នា កាន់តែមានសុពលភាព និងភាពសមស្របជាងពេលណាៗទាំងអស់។

សម្ដេចតេជោ បញ្ជាក់ថា កិច្ចប្រជុំកំពូលASEM បានក្លាយជាវវេទិកាដ៏សំខាន់មួយ ក្នុងការភ្ជាប់ទំនាក់ទំនង និងការលើកកម្ពស់ភាពជាដៃគូរវាងទ្វីបអាស៊ី និងអឺរ៉ុប។ ភាពខ្លាំងរបស់ASEM គឺស្ថិតនៅលើគោលការណ៍ស្នូលរបស់ខ្លួន ជាអាទិ៍៖ ភាពមិនផ្លូវការ ភាពបត់បែនបាន ការគោរពគ្នាទៅវិញទៅមក ក្នុងស្មារតីកុងសង់ស៊ីស និងភាពជាដៃគូស្មើភាព។ សម្ដេចមានជំនឿថា ក្នុងសភាពការណ៍បច្ចុប្បន្ន យើងត្រូវការនូវគោលការណ៍ទាំងនេះ កាន់តែខ្លាំងថែមទៀត ដោយសារតែយើងកំពុងតែជួបប្រទះនឹងបញ្ហាប្រឈមជាច្រើន ដែលទាមទារឲ្យមានកិច្ចខិតខំប្រឹងប្រែង និងការឆ្លើយតបរួមគ្នារបស់យើងគ្រប់រូប។

ខាងក្រោមនេះជាខ្លឹមសាររួមនៃសុន្ទរកថារបស់សម្ដេចតេជោ ហ៊ុន សែន នាយករដ្ឋមន្ត្រីកម្ពុជាថ្លែង ក្នុងពិធីបើកកិច្ចប្រជុំកំពូលអាស៊ី-អឺរ៉ុប លើកទី១៣ (ASEM13)៖