សម្ដេចតេជោ ហ៊ុន សែន ថ្លែងចំអកឲ្យលោក សម រង្ស៊ី ដែលត្រូវប្រជាពលរដ្ឋថៃព្រមានកុំឲ្យជ្រៀតជ្រែកកិច្ចការផ្ទៃក្នុងប្រទេសថៃ

ដោយ៖ យូ វីរៈ | ថ្ងៃពុធ ទី២១ ខែតុលា ឆ្នាំ២០២០ |

2,337

បន្ទាយមានជ័យ៖ សម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា នៅថ្ងៃទី២១ ខែតុលា ឆ្នាំ២០២០ បានថ្លែងចំអកដល់លោក សម រង្ស៊ី ដែលត្រូវបានប្រជាពលរដ្ឋថៃ ព្រមានយ៉ាងចាស់ដៃថា កុំឲ្យជ្រៀតជ្រែកចូលកិច្ចការផ្ទៃក្នុងប្រទេសថៃ។

សម្ដេចតេជោ បានថ្លែងដូចនេះ ក្នុងឱកាសដែលសម្តេចចុះជួបសំណេះសំណាល និងចែកអំណោយដល់ប្រជាពលរដ្ឋដែលរងគ្រោះដោយជំនន់ទឹកភ្លៀង សម្តេចតេជោ ហ៊ុន សែន បានរំលឹកអំពីភាពអាម៉ាស់របស់ លោក សម រង្ស៉ី រឿងធ្វើយុទ្ធនាការម្រាមដៃ៣ ហើយប្រកាសថា ចូលរួមសាមគ្គីជាមួយប្រជាជនថៃ ក្នុងការតវ៉ាប្រឆាំងរដ្ឋាភិបាល។

សម្តេចតេជោ ហ៊ុន សែន បានថ្លែងថា៖ «អញ្ចឹងខ្ញុំគ្រាន់តែផ្តាំផ្ញើ កំពុងតែទឹកជំនន់ផងកូវីដផង កុំរញ៉េរញ៉ៃ ហើយកុំទៅលើកម្រាមដៃ៣អី(ថា)ចូលរួមជាមួយថៃ ឃើញថៃគេដាក់ត្រឡប់មកវិញថា កុំជ្រៀតជ្រែកកិច្ចការផ្ទៃក្នុងរបស់ថៃ អី ចង់សាមគ្គីភាពជាមួយនឹងការតស៊ូជាមួយប្រជាជនថៃ រឿងថៃរឿងរបស់ថៃ ខ្មែររឿងរបស់ខ្មែរ គ្រាន់តែបញ្ជាក់ជូនប៉ុណ្ណឹង តម្រូវការពេលនេះគឺកម្លាំងទាំងអស់ត្រូវប្រមូលផ្តុំជួយប្រជាពលរដ្ឋ ក្នុងគ្រាមានអាសន្ន»។

សូមជម្រាបជូនថា កាលពីថ្ងៃទី១៨ ខែតុលា ឆ្នាំ២០២០ កន្លងទៅ លោក សម រង្ស៉ី ដែលកំពុងសម្ងំនៅក្រៅប្រទេស បានបង្ហោះបំផុសបំផុលតាម Facebook ដោយបង្ហោះរូបថតរបស់ខ្លួនលើកម្រាមដៃ៣ ហើយញុះញង់ឱ្យអ្នកគាំទ្រខ្លួនចូលរួមសាមគ្គីភាពជាមួយអ្នកតវ៉ានៅក្នុងថៃ ដែលកំពុងធ្វើបាតុកម្មប្រឆាំងនឹងរដ្ឋាភិបាលថៃ។

បន្ទាប់ពីមានការបំផុសបំផុលនេះ មានពលរដ្ឋថៃម្នាក់ឈ្មោះ Lertchai Jangjittin ប្រាប់លោក សម រង្ស៉ី «កុំឱ្យយកប្រជាធិបតេយ្យថៃ មកប្រៀបជាមួយកម្ពុជា ដែលមានប្រជាធិបតេយ្យរួចហើយ»។

ពលរដ្ឋថៃម្នាក់នេះ បាន Comment ព្រមានលោក សម រង្ស៉ី ជាភាសាថៃ យ៉ាងអាម៉ាស់ដែលមានន័យបកជាភាសាខ្មែរថា៖ «ចង់ធ្វើនាយករដ្ខមន្រ្តី គឺទៅឈឈ្មោះបោះឆ្នោត អ្វីដែលអ្នកស្រែករឿងប្រជាធិបតេយ្យ ព្រោះអ្នកចង់ធ្វើជានាយករដ្ឋមន្រ្ដី តែផ្ទុយទៅវិញគឺបែជាសាងបញ្ហាឱ្យអ្នកប្រជាធិបតេយ្យថៃ មានជំលោះជាមួយរដ្ឋាភិបាលកម្ពុជា បើចង់ជំរុញប្រជាធិបតេយ្យនៅថៃ សូមកុំមកជ្រៀតជ្រែកកិច្ចការនយោបាយរបស់ប្រទេសថៃគឺល្អបំផុត»។

ក្រៅពីចំអកចំពោះ លោក សម រង្ស៉ី ដែលធ្វើនយោបាយមិនប្រាកដប្រជា សម្តេចតេជោ ហ៊ុន សែន ផ្តាំទៅ មេក្រុមឧទ្ទាមនេះទៀតថា សម្តេចបានស៊ើបដឹងអស់ហើយ អំពីផែនការធ្វើបាតុកម្មនៅមុខស្ថានទូតចិន នៅថ្ងៃទី២៣ ខែតុលា ឆ្នាំ២០២០។ សម្តេចបានអះអាងថា បាតុកម្មនេះ ត្រូវបានជំរុញដោយក្រុមប្រឆាំងនៅក្រៅប្រទេស ហើយប្រមូលមនុស្សពីតាមបណ្តាខេត្ត តែទោះជាយ៉ាងនេះក្តី សម្តេចបានព្រមានបង្ក្រាបបាតុកម្មនេះតែម្តង៕