គេហទំព័រនេះនឹងដំណើរការកាន់តែប្រសើរប្រសិនបើអ្នកដាក់អោយដំណើរការ JavaScript
សំឡេងសន្តិភាព

កិច្ចប្រជុំភាពជាដៃគូសភាអាស៊ី-អឺរ៉ុប លើកទី១១ ដែលកម្ពុជាធ្វើជាម្ចាស់ផ្ទះ ប្រារព្ធធ្វើនៅរសៀលថ្ងៃនេះ

ដោយ៖ យូ វីរៈ​​ | ថ្ងៃអង្គារ ទី១៦ ខែវិច្ឆិកា ឆ្នាំ២០២១​ |
កិច្ចប្រជុំភាពជាដៃគូសភាអាស៊ី-អឺរ៉ុប លើកទី១១ ដែលកម្ពុជាធ្វើជាម្ចាស់ផ្ទះ ប្រារព្ធធ្វើនៅរសៀលថ្ងៃនេះ កិច្ចប្រជុំភាពជាដៃគូសភាអាស៊ី-អឺរ៉ុប លើកទី១១ ដែលកម្ពុជាធ្វើជាម្ចាស់ផ្ទះ ប្រារព្ធធ្វើនៅរសៀលថ្ងៃនេះ

ភ្នំពេញ៖ សភានៃព្រះរាជាណាចក្រកម្ពុជា នឹងធ្វើជាម្ចាស់ផ្ទះ កិច្ចប្រជុំភាពជាដៃគូសភាអាស៊ី-អឺរ៉ុបលើកទី១១ (ASEP11) នៅថ្ងៃទី១៦ ខែវិចិ្ឆកានេះ តាមប្រព័ន្ធវីដេអូ ក្រោមមូលបទ “ការលើកកម្ពស់ភាពជាដៃគូសភា ដើម្បីសន្តិភាព និងការអភិវឌ្ឍប្រកបដោយចីរភាព ក្នុងសម័យ និងក្រោយវិបត្តិកូវីដ-១៩”។

កិច្ចប្រជុំភាពជាដៃសភាតំបន់អាស៊ី-អឺរ៉ុប នេះ ជាផ្នែកសំខាន់មួយនៃកិច្ចប្រជុំកំពូលអាស៊ី-អឺរ៉ុបលើកទី១៣(ASEM13) ដែលរាជរដ្ឋាភិបាលកម្ពុជានឹងធ្វើជាម្ចាស់ផ្ទះនៅចុងខែវិច្ឆិកានេះដែរ។ ASEM ជាកិច្ចប្រជុំក្រៅផ្លូវការមួយសម្រាប់ជំរុញកិច្ចសន្ទនា កិច្ចសហប្រតិបត្តិការរវាងទ្វីបអាស៊ីនិងអឺរ៉ុប ដែលផ្តោតលើការពង្រឹងភាពជាដៃគូ លើកកម្ពស់សន្តិភាព សន្តិសុខ វឌ្ឍនភាពសង្គម សេដ្ឋកិច្ចប្រកបដោយចីរភាព។

ព្រឹត្តិការណ៍សំខាន់ទំាងពីរនេះនិងជាមោទនភាពសម្រាប់ព្រះរាជាណាចក្រកម្ពុជាទំាងមូល ក៏ដូចជារាជរដ្ឋាភិបាលនិងស្ថាប័ននីតិប្បញ្ញត្តិរបស់កម្ពុជា ដែលបានចូលរួមចំណែកយ៉ាងសកម្មនៅក្នុងវិស័យការទូតនៅក្នុងការពង្រឹងវប្បធម៌សន្ទនា ការថែរក្សាសន្តិភាព ការជួយជំរុញលើកកម្ពស់ពហុភាគីនិយម និងការថែរក្សាសណ្តាប់ធ្នាប់អន្តរជាតិ របស់កម្ពុជា។

ក្រៅពីការងារស្នូលនៃកិច្ចប្រជុំ ដែលត្រូវពិភាក្សាលើបញ្ហាកំពុងប្រឈមរបស់ពលរដ្ឋនៅក្នុងតំបន់ទាំងពីរ ដូចជាបញ្ហាជំងឺរាតត្បាត អសន្តិសុខ បរិស្ថាន សង្គម សេដ្ឋកិច្ច ជាដើមនោះ ព្រឹត្តិការណ៍នេះក៏ជាឱកាសដែលកម្ពុជាបានបង្ហាញពីវប្បធម៌ ប្រពៃណីនិងទំនៀមទម្លាប់ដ៏ល្អផូរផង់របស់ខ្លួនដល់អន្តរជាតិពិសេសប្រជាពលរដ្ឋទំាងពីរទ្វិប បានដឹងនិងជាការទាក់ទាញទំាងអ្នកទេសចរនិងវិនិយោគឲ្យមកទស្សនានិងបណ្តាក់ទុនបន្ថែមទៀត​ នៅក្នុងព្រះរាជាណាចក្រកម្ពុជា ស្របពេលដែលកម្ពុជាកំពុងបើកប្រទេសឡើងវិញក្រោយពីវិបត្តិកូវីដ-១៩ ប្រមាណជា២ឆ្នាំមកនេះ។

ក្នុងនាមជាម្ចាស់ផ្ទះនៃកិច្ចប្រជុំភាពជាដៃគូសភាអាស៊ី-អឺរ៉ុបលើកទី១១នេះ នៅក្នុងពិធីបើកកិច្ចប្រជុំ ដែលប្រារព្ធធ្វើឡើងនៅរសៀលថ្ងៃទី១៦ វិច្ឆិកានេះ ក្នុងនាមស្ថាប័ននីតិប្បញ្ញត្តិ សម្តេចវិបុលសេនាភក្តី សាយ ឈុំ ប្រធានព្រឹទ្ធសភា និងសម្តេចអគ្គមហាពញាចក្រី ហេង សំរិន ប្រធានរដ្ឋសភា ដែលជាសហប្រធាន ASEP11 និងក្នុងនាមប្រមុខរាជរដ្ឋាភិបាល សម្តេចអគ្គមហាសេនាបតីតេជោ ហ៊ុន សែន នឹងអញ្ជើញថ្លែងសុន្ទរកថាស្វាគមន៍ សុន្ទរកថាគន្លឹះ និងការប្រកាសបើកកិច្ចប្រជុំជាផ្លូវការផងដែរ។

ថ្នាក់ដឹកនាំនិងតំណាង សភានៅក្នុងតំបន់អាស៊ី និងអឺរ៉ុប រួមនឹងអង្គការដៃគូជាង៣០ប្រទេស និងស្ថាប័នដៃគូ នឹងចូលរួមកិច្ចប្រជុំ ដ៏មានសារៈសំខាន់នេះ៕

 

បញ្ចេញមតិ
ពាក្យគន្លឹះទាក់ទង