សម្ដេចតេជោ ហ៊ុន​ សែន​៖ តម្រូវការជាអាទិភាពនៅអ៊ុយក្រែនពេលនេះ គឺសន្តិភាព​

សម្ដេចតេជោ ហ៊ុន​ សែន​៖ តម្រូវការជាអាទិភាពនៅអ៊ុយក្រែនពេលនេះ គឺសន្តិភាព​

ត្បូងឃ្មុំ៖ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រ​កម្ពុជា​ មានប្រសាសន៍ដោយសង្គត់ធ្ងន់ថា តម្រូវការជាអាទិភាពកំពូលនៅ​ក្នុងប្រទេស​អ៊ុយក្រែន​​​នា​ពេលនេះគឺ សន្តិភាព។ សម្ដេចបន្តថា បើគ្មានសន្តិភាពទេ កុំនិយាយ​ដល់​រឿង​សិទ្ធិ​មនុស្ស សិទ្ធិ​រស់រានមានជីវិត និង​លទ្ធិប្រជាធិបតេយ្យឲ្យសោះ។

សម្ដេចតេជោ​ ហ៊ុន​ សែន​ មានប្រសាសន៍បែបនេះ នៅក្នុងពិធី​​សម្ពោធ​ដាក់​ឲ្យ​ប្រើប្រាស់​មន្ទីរ​ពេទ្យ​មិត្តភាពកម្ពុជា-ចិន ត្បូងឃ្មុំ រួម​ជាមួយនឹង​​ពិធី​សម្ពោធ​ព្រមគ្នា​នូវ​អគារ​សាលា​បឋម​សិក្សា និងវិទ្យាល័យតេជោសែនត្បូងឃ្មុំ នៅខេត្តត្បូងឃ្មុំ នាពេលព្រឹក​ថ្ងៃ​ទី០៧ ខែ​មីនា​​ ​ឆ្នាំ​២០២២​។​

សម្ដេចតេជោ បានថ្លែងថា សិទ្ធិមនុស្ស សិទ្ធិរស់រានមានជវិត និងលទ្ធិប្រជាធិបតេយ្យ មិន​មាន​​ក្រោម​បរិយាកាសប្រទេសកើតសង្គ្រាម ក្រោមគ្រាប់បែក ឬគ្រាប់ផ្លោងនោះទេ។ សម្តេច​តេជោ បាន​ប្រកាស​ឲ្យប្រជាពលរដ្ឋកម្ពុជា​រក្សាឲ្យ​បាន​នូវសុខសន្តិភាព ស្ថិរភាព​នយោបាយ និងម៉ាក្រូសេដ្ឋកិច្ច។ បើកម្ពុជារក្សាបាន នោះកម្ពុជា​នឹងធ្វើ​ដំណើរ​ទៅមុខ​ប្រកប​​ដោយ​វឌ្ឍនភាព​​ខ្ព​ស់​ជាលំដាប់។