គេហទំព័រនេះនឹងដំណើរការកាន់តែប្រសើរប្រសិនបើអ្នកដាក់អោយដំណើរការ JavaScript
សំឡេងសន្តិភាព

    សម្ដេចតេជោ​ ហ៊ុន​ សែន​ ថ្លែង​សុន្ទរកថា​​ក្នុង​កិច្ច​ប្រជុំ​កំពូល​ស្ដីពី​ការ​ប្ដេជ្ញាចិត្ត​ពាក់​ព័ន្ធ​នឹង​អាកាសធាតុ​

    ដោយ៖ យូ វីរៈ​​ | ថ្ងៃអាទិត្យ ទី១៣ ខែធ្នូ ឆ្នាំ២០២០​ |
    សម្ដេចតេជោ​ ហ៊ុន​ សែន​ ថ្លែង​សុន្ទរកថា​​ក្នុង​កិច្ច​ប្រជុំ​កំពូល​ស្ដីពី​ការ​ប្ដេជ្ញាចិត្ត​ពាក់​ព័ន្ធ​នឹង​អាកាសធាតុ​ សម្ដេចតេជោ​ ហ៊ុន​ សែន​ ថ្លែង​សុន្ទរកថា​​ក្នុង​កិច្ច​ប្រជុំ​កំពូល​ស្ដីពី​ការ​ប្ដេជ្ញាចិត្ត​ពាក់​ព័ន្ធ​នឹង​អាកាសធាតុ​

    ភ្នំពេញ​៖ នៅថ្ងៃទី ១២​ ខែធ្នូ ឆ្នាំ​២០២០ សម្តេចអគ្គមហាសេនាបតីតេជោ ហ៊ុន សែន​ នាយករដ្ឋមន្រ្តី នៃ​ព្រះរាជាណា​ចក្រ​កម្ពុជា បាន​​ថ្លែ​ង​សុន្ទរកថា ក្នុង “កិច្ច​ប្រជុំ​កំពូល​ស្តីពី​ការ​ប្តេជ្ញា​ចិត្ត​ពាក់​ព័ន្ធ​នឹង​អាកាសធាតុ”​តាមរយៈ ​ប្រព័ន្ធ​វីដេ​អូ​អន​ឡាញ។

    សម្ដេចតេជោ​ បាន​មាន​ប្រសាសន៍ថា​ យើងទាំងអស់គ្នាបានឯកភាពថា ការប្រែប្រួល​អាកាសធាតុគឺ​ជាការពិត ។ ប្រទេសជាច្រើនបានទទួលរងនូវផលប៉ះពាល់ដោយផ្ទាល់ រួមទាំងកម្ពុជា ដែល​ទើបតែ​រង​នូវ​ផល​ប៉ះពា​ល់ ​ដោយ​ទឹកជំ​នន់​នាពេ​ល​ថ្មី​ៗនេះ ។  ទោះបី​ជា​ប្រទេស​កម្ពុជា​ចូល​រួម​ចំណែក​តិច​តួច​ក្នុង​ការបញ្ចេញ ឧស្ម័នផ្ទះកញ្ចក់សកលក្តី កម្ពុជានៅតែមានការប្តេជ្ញាចិត្តខ្ពស់ អាស្រ័យតា​ម​ធន​ធាន និងសមត្ថភាព ចូលរួមដោះស្រាយនូវបញ្ហានេះ ។

    សម្ដេចតេជោ​បន្តថា ​នៅ​ក្នុង​របាយការណ៍​បច្ចុប្បន្ន​ភាព​ ស្តីពី​ការ​ចូល​រួម​ចំណែករបស់ជាតិដើម្បីដោះស្រាយការប្រែប្រួលអាកាសធាតុ ដែលកម្ពុជា​ត្រៀមដាក់ជូ​ន​ទៅលេ​ខាធិ​-​ការដ្ឋាន​អនុសញ្ញា​សហប្រជាជាតិស្តីពីការប្រែប្រួលអាកាសធាតុ (UNFCCC) នា​ដំណាច់​ឆ្នាំ​នេះ​ កម្ពុជាបានបញ្ចូលនូវគោលដៅថ្មីច្បាស់លាស់ពាក់ព័ន្ធនឹងការកាត់បន្ថយ ការបញ្ចេញឧស្ម័ន ប្រមាណ​ ៣៨,៩ លានតោនសមមូលឧស្ម័នកាបូនិក រួមបញ្ចូលទាំងក្នុងវិស័យព្រៃឈើ, វិស័យ សំណល់ និងកសិកម្ម ឬ ស្មើនឹង ១៨ភាគរយ ធៀបនឹងសេណារីយ៉ូតាមទម្លាប់ធម្មតា (Business As Usual) នៅត្រឹមឆ្នាំ ២០៣០ ។ គោលដៅថ្មីនេះ​ក៏​រួមប​ញ្ចូល​ការ​ផលិត​អគ្គិសនីពី​ថាមពល​កកើត​ឡើង​វិញ​ចំនួន​ ២​៥​ ភាគរយ នៅក្នុងល្បាយថាមពល (Energy Mix) នៅឆ្នាំ២០៣០ ។

    ទន្ទឹមនេះដែរ ​ការប្រែប្រួលអាកាសធាតុជាបាតុភូតប្រទាក់ក្រឡាគ្នា ដែលត្រូវដោះស្រាយ​តាម​មធ្យោបាយ​ជា​កញ្ចប់​គ្រប់​ជ្រុងជ្រោយ ទាំងលើទិដ្ឋភាពសង្គម, សេដ្ឋកិច្ច និងបរិស្ថាន។ ជាការពិត ការដោះស្រាយបញ្ហាដែលកើតចេញពីការប្រែប្រួលអាកាសធាតុប្រកបដោយប្រសិទ្ធភាព នឹង​ចូល​រួម​ចំណែក​យ៉ាង​សំខាន់ក្នុងការអភិវឌ្ឍសង្គម-សេដ្ឋកិច្ចប្រកបដោយចិរភាព និង​បរិយាប័ន្ន​នា​ពេល​អនាគត​។ ក្នុងន័យនេះ កាប្រែប្រួលអាកាសធាតុជាបញ្ហារបស់យើងទាំងអស់គ្នា ប្រទេសទាំង​អស់​ត្រូវ​តែ​ស្រុះ​ដៃ​គ្នា ​និងអនុវត្តនូវកាតព្វកិច្ចរបស់ប្រទេសនីមួយៗ ដូចដែលមានចែង​នៅ​ក្នុង​ផែន​ការ​យុទ្ធសាស្រ្ត,​ យន្តការនានា និងកិច្ចព្រមព្រៀងកន្លងមក។ ក្នុងស្មារតីជាប្រទេស ដែលមា​ន​កា​រ​ទទួល​ខុស​ត្រូវខ្ពស់ និងកាត់បន្ថយនូវផលប៉ះពាល់ពីការប្រែប្រួលអាកាសធាតុជាអតិបរិមា កម្ពុ​ជា​បា​ន​ប្តេជ្ញា​រៀបចំយុទ្ធសាស្រ្តរយៈពេលវែង ដើម្បីសម្រេចបាននូវអព្យាក្រឹតភាពកាបូន (Carbon Neutrality) ដែលការរៀបចំនេះនឹងប្រព្រឹត្តទៅនៅឆ្នាំ ២០២១ ។

    សម្ដេចតេជោ​ ហ៊ុន​ សែន​ បាន​បញ្ជាក់ថា​ ដើម្បីឱ្យ​ការ​អនុវត្ត​នូវ​យុទ្ធ​សាស្រ្តរ​យៈ​ពេល​វែ​ង​នេះទទួល​បាន​ជោគជ័យ កម្ពុជា​សូម​អំពាវ​នាវ​ប្រទេស​អភិវឌ្ឍន៍​ទាំង​អស់​បំពេញ​ឱ្យ​បាន​ពេញ​លេញ​នូវ​កាត​ព្វ​កិច្ច ​ដែល​បាន​សន្យា ​ទាំង​ការគាំទ្រ​ផ្នែក​ហិរញ្ញវត្ថុ និងការផ្ទេរបច្ចេកវិទ្យា៕

    បញ្ចេញមតិ
    ពាក្យគន្លឹះទាក់ទង
    អត្ថបទទាក់ទង