គេហទំព័រនេះនឹងដំណើរការកាន់តែប្រសើរប្រសិនបើអ្នកដាក់អោយដំណើរការ JavaScript
សំឡេងសន្តិភាព

    សម្ដេចតេជោ​ ហ៊ុន​ សែន​ អំពាវនាវឲ្យពលរដ្ឋចូលរួមថែរក្សាការពារព្រៃឈើ និងចូលរួមដាំដុះកូនឈើថែរក្សាការពារបរិស្ថានធម្មជាតិ​

    ដោយ៖ យូ វីរៈ​​ | ថ្ងៃសុក្រ ទី៩ ខែកក្កដា ឆ្នាំ២០២១​ |
    សម្ដេចតេជោ​ ហ៊ុន​ សែន​ អំពាវនាវឲ្យពលរដ្ឋចូលរួមថែរក្សាការពារព្រៃឈើ និងចូលរួមដាំដុះកូនឈើថែរក្សាការពារបរិស្ថានធម្មជាតិ​ សម្ដេចតេជោ​ ហ៊ុន​ សែន​ អំពាវនាវឲ្យពលរដ្ឋចូលរួមថែរក្សាការពារព្រៃឈើ និងចូលរួមដាំដុះកូនឈើថែរក្សាការពារបរិស្ថានធម្មជាតិ​

    ភ្នំពេញ៖ នៅថ្ងៃទី០៩ ខែកក្កដា ឆ្នាំ២០២១ ដែលជាថ្ងៃរុក្ខទិវា សម្ដេចតេជោ ហ៊ុន​ សែន​ នាយករដ្ឋមន្ត្រី នៃកម្ពុជា បានបង្ហោះសារអំពាវនាវដល់ប្រជាពលរដ្ឋឲ្យចូលរួមថែរក្សាការពារព្រៃឈើ និងចូលរួមដាំដុះកូនឈើថែរក្សាការពារបរិស្ថានធម្មជាតិ​ ដើម្បីជាប្រយោជន៍ដល់ការរស់នៅមនុស្ស និងជីវិតសត្វព្រៃគ្រប់ប្រភេទផងដែរ។

    តាមរយៈហ្វេសប៊ុកសម្ដេចតេជោ បានសរសេរថា «អបអរសាទរបុណ្យ«រុក្ខទិវា» ០៩ កក្កដា ឆ្នាំ២០២១

    សូម​បងប្អូន​ប្រជាពលរដ្ឋ​ខ្មែរ​ទូ​ទាំង​ប្រទេស ចូលរួម​ស្រឡាញ់​ថែរក្សា​ការពារ​ព្រៃឈើ នឹង​ចូលរួម​ដាំ​ដុះ កូន​ឈើ​ ថែរក្សា​ការពារ​បរិស្ថាន​ធម្មជាតិ​ ឲ្យ​បាន​គង់វង្ស​នៅ​គ្រប់​ទីកន្លែង ដើម្បី​ជា​ប្រយោជន៍ ដល់​ការ​រស់នៅ​របស់​ខ្លូ​ន​យើង​ផង សហគមន៍​យើង​ផង និង​ជីវិត​សត្វព្រៃ​គ្រប់​ប្រភេទ​ផង ព្រមទាំង​ប្រព័ន្ធ​ជីវៈចម្រុះ​ជា​ច្រើន​ផង​​ដែល​ជា​សម្បត្តិ​របស់​មនុស្សជាតិ​នៅ​គ្រប់​ជំនាន់​។»

    ជាមួយគ្នានេះសម្ដេចតេជោ​ បាន​រម្លឹកដែរថា បុណ្យ​«​រុក្ខទិវា​» ​ត្រូវ​បាន​បង្កើត​ឡើង​នៅ​ក្នុង​ឆ្នាំ ១៩៥២ ក្រោម​ព្រះរាជកិច្ច​ដឹកនាំ​របស់ ព្រះ​បរម​រតន​កោ​ដ ព្រះ​មហា​វីរក្សត្រ ព្រះករុណា ព្រះបាទ​សម្តេចព្រះ នរោត្តម សីហ​នុ ក្នុង​គោលបំណង​បំផុស​ចលនា​ដាំ​ដើមឈើ​ឡើង​វិញ និង​អោយ​ប្រជាពលរដ្ឋ​ចូលរួម​ថែរក្សា​សម្បត្ដិ​ព្រៃឈើ ជា​ពិសេស ដើម្បី​បណ្តុះ​គំនិត​ថែរក្សា ការពារ និង​គំនិត​ស្រលាញ់​ព្រៃឈើ និង​បរិស្ថាន​ធម្មជាតិ​របស់​ប្រទេស​។

    សូមបញ្ជាក់ថា​ រុក្ខទិវា ត្រូវបាន​ប្រារព្ធធ្វើឡើងជារៀងរាល់ឆ្នាំ​ នៅទូទាំង​ប្រទេសកម្ពុជា ក្នុងស្មារតីចូលរួមរក្សា​ព្រៃឈើឲ្យបាន​គង់វង្ស​សម្រាប់កូន​ចៅជំនាន់ក្រោយ និង​សម្រាប់​ភពផែនដីទាំងមូល។ ដោយឡែក​ក្នុងបរិបទកូវីដ១៩ ដែលបាន​អូសបន្លាយពេលជាង ២ឆ្នាំមកនេះ បាន​ធ្វើឲ្យ​អាក់ខាន​ដល់ការរៀបចំពិធីដាំដើមឈើ​ឡើង​វិញ​៕

     

    បញ្ចេញមតិ
    អត្ថបទទាក់ទង