ឯកឧត្ដម ប្រាក់ សុខុន នឹងធ្វើទស្សនកិច្ចនៅមីយ៉ាន់ម៉ានាដើមខែក្រោយនេះ ក្នុងនាមជាប្រសិតពិសេរបស់ប្រធានអាស៊ាន

ដោយ៖ យូ វីរៈ | ថ្ងៃសុក្រ ទី១៨ ខែកុម្ភៈ ឆ្នាំ២០២២ |

341

ភ្នំពេញ៖ ថ្លែងក្នុងសន្និសីទសារព័ត៌មានស្ដីពីលទ្ធផលកិច្ចប្រជុំចង្អៀត រដ្ឋមន្ត្រីការបរទេសអាស៊ាននៅកម្ពុជាកាលពីម្សិលមិញ ឯកឧត្ដម ប្រាក់ សុខុន រដ្ឋមន្ត្រីក្រសួងការបរទេស និងសហប្រតិបត្តិការអន្តរជាតិ បានមានប្រសាសន៍ថា បើមិនមានអ្វីប្រែប្រួលនោះទេ នៅដើមខែមីនាឆ្នាំ២០២២ ខាងមុខ ឯកឧត្តម ក្នុងនាមជាប្រសិតពិសេសរបស់ប្រធានអាស៊ាន នឹងធ្វើដំណើរទៅទស្សនកិច្ចនៅសហភាពមីយ៉ាន់ម៉ា ដើម្បីជួបជាមួយលោក មីន អោង លាំង និងរដ្ឋមន្រ្តីការបរទេសមីយ៉ាន់ម៉ា ព្រមទាំងភាគីពាក់ព័ន្ធនៃជម្លោះនៅក្នុងប្រទេសនេះ។

ឯកឧត្តម ប្រាក់ សុខុន បានថ្លែងថា វិបត្តិមីយ៉ាន់ម៉ា គឺមានភាពស្មុគស្មាញខ្លាំងណាស់ ដែលមិនអាចរំពឹងច្រើនពេកនោះទេ ពោលគឺត្រូវទាមទារពេលវេលា ទាមទារការអត់ធ្មត់ និងទាមទារនូវអភិក្រមមួយដែលប្រកដោយភាពជាក់ស្តែងនិយម ព្រោះនៅមីយ៉ាន់ម៉ា ជាប្រទេសមួយដែលដឹកនាំដោយរបបយោធាតាំងពីទទួលបានឯករាជ្យជាង៧០ឆ្នាំមកម្ល៉េះដែលបានចាក់ឫសយ៉ាងជ្រៅនៅក្នុងប្រទេសនេះ ហើយប្រទេសនេះមានវប្បធម៌នយោបាយក៏ពិបាក ប្រវត្តិសាស្រ្តនយោបាយនៅក្នុងប្រទេសនេះ ក៏ពិបាក។

ពាក់ព័ន្ធបញ្ហាមីយ៉ាន់ម៉ានេះផងដែរសម្ដេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃកម្ពុជា កាលពីថ្ងៃទី១៣ ខែមករា កន្លងមក បានទទួលជួបសន្ទនាតាមប្រព័ន្ធវីដេអូជាមួយលោកជំទាវបណ្ឌិត ណូលីន ហេយហ្សឺ (Noeleen Hayzer) ប្រេសិតពិសេសថ្មី របស់អគ្គលេខាធិការអង្គការសហប្រជាជាតិទទួលបន្ទុកកិច្ចការមីយ៉ាន់ម៉ា ។

ក្នុងជំនួបកាលណោះលោកជំទាវ បានអបអរសាទរ ចំពោះសម្ដេចតេជោ នាយករដ្ឋមន្ត្រីដែលមានតួនាទីជាប្រធានអាស៊ានក្នុងឆ្នាំ២០២២នេះ ហើយកម្ពុជាក៏មានបេសកជនពិសេសនៃអាស៊ានទទួលបន្ទុកមីយ៉ាន់ម៉ាផងដែរ ។

គួរបញ្ជាក់ថា ដំណើរទស្សនកិច្ចការងាររបស់សម្ដេចតេជោ ហ៊ុន សែន ទៅមីយ៉ាន់ម៉ាកាលពីពេលថ្មីៗនេះ មិនចេញឆ្ងាយពីធម្មនុញ្ញអាស៊ាន ហើយចំណុចដែលបានឯកភាពគ្នាចំនួន៥ ក្នុងប្រទេសអាស៊ានទាំង១០ នាពេលកន្លងទៅនោះទេ។

សូមជម្រាបជូនដែរថា កិច្ចប្រជុំចង្អៀតរដ្ឋមន្រ្តីការបរទេសអាស៊ាន គឺជាការពិនិត្យមើលឡើងវិញនូវការសម្រេចនានារបស់ថ្នាក់ដឹកនាំនៅក្នុងកិច្ចប្រជុំកំពូលអាស៊ានលើកទី៣៨ និងលើកទី៣៩ សំដៅធ្វើការផ្លាស់ប្តូរទស្សនៈគ្នាលើមធ្យោបាយ ដើម្បីពង្រឹងបន្ថែមទៀតនូវទំនាក់ទំនងខាងក្រៅជាមួយដៃគូសន្ទនានានា ខណៈពេលអាស៊ានបានថែរក្សា និងលើកកម្ពស់មជ្ឈភាព សាមគ្គីភាព និងឯកភាពអាស៊ាន ព្រមទាំងពិភាក្សាគ្នាអំពីរបៀប និងវិធីសាស្រ្ត ដើម្បីកៀរគរកិច្ចខិតខំប្រឹងប្រែងរួមគ្នាក្នុងការកសាងសហគមន៍អាស៊ានមួយ ដែលកាន់តែធន់រឹងមាំ ប្រកបដោយថាមពល ហើយពោរពេញដោយសន្តិភាព និងវិបុលភាព៕