ឧត្តមសេនីយ៍ឯក ហ៊ុន ម៉ាណែត ប្រគល់រថយន្ត៧៥គ្រឿងដល់អង្គភាពចំណុះ

ដោយ៖ យូ វីរៈ | ថ្ងៃអង្គារ ទី៦ ខែតុលា ឆ្នាំ២០២០ |

730

ភ្នំពេញ៖ ឯកឧត្ដមឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជើងគោក បានប្រគល់រថយន្ត ចំនួន ៧៥គ្រឿងដល់អង្គភាពចំណុះ ចំនួន ៣២អង្គភាព សម្រាប់ប្រើប្រាស់ក្នុងការងារហ្វឹកហ្វឺន និងប្រតិបត្តិការរបស់ខ្លួន នៅព្រឹកថ្ងៃទី៦ ខែតុលា ឆ្នាំ២០២០ បញ្ជាការដ្ឋានកងទ័ពជើងគោក។

រថយន្តចំនួន ៧៥គ្រឿង ក្នុងនោះមានរថយន្តបញ្ជាការ ចំនួន៥៥គ្រឿង និងរថយន្តប្រភេទប្រតិបត្តិការ ចំនួន ២០គ្រឿង។

រថយន្តទាំងអស់ខាងលើនេះ គឺជាជំនួយឥតសំណងពីសាធារណរដ្ឋប្រជាមានិតចិន ក្នុងក្របខណ្ឌនៃកិច្ចសហប្រតិបត្តិការ រវាងក្រសួងការពារជាតិនៃប្រទេសទាំងពីរ កម្ពុជា-ចិន ជូនដល់កងទ័ពជើងគោកនៃកងយោធពលខេមរភូមិន្ទ ដើម្បីជួយពង្រឹងសមត្ថភាពក្នុងវិស័យការពារជាតិកម្ពុជា។

ចំណែកកងពលតូចលេខ៧០ បានទទួលរថយន្តបញ្ជាការ(ហ្សុីប)ចំនួន២៥គ្រឿងដែលជាជំនួយរបស់សាធារណរដ្ឋប្រជាមានិតចិន ។

ឯកឧត្ដម ឧត្តមសេនីយ៍ឯក ហ៊ុន ម៉ាណែត អគ្គមេបញ្ជាការរងនៃកងយោធពលខេមរភូមិន្ទ និងជាមេបញ្ជាការកងទ័ពជេីងគោក ដែលប្រគល់ជូនមេបញ្ជាការរងកងទ័ពជេីងគោក និងជាមេបញ្ជាការកងពលតូចលេខ៧០ ឯកឧត្ដមឧត្តមសេនីយ៍ឯក ម៉ៅ សុផាន់ ។

គួររំលឹកផងដែរថា តាមរយៈកិច្ចសហប្រតិបត្តិការទ្វេភាគី-ពហុភាគីជាមួយបណ្តាប្រទេសក្នុងតំបន់ និងសកលលោក កម្ពុជាតែងតែទទួលបាននូវជំនួយឧបត្ថម្ភជាច្រើនទាំងស្មារតី សម្ភារ និងថវិកាពីបណ្តាប្រទេសជាដៃគូ ហើយក្នុងនោះ ក៏មានសាធារណរដ្ឋប្រជាមានិតចិនផងដែរ ដែលជា ប្រទេស ផ្តល់ ជំនួយ ដ៏ ធំ មួយ សម្រាប់ កម្ពុជា ។

ជាក់ស្តែង ជំនួយកិច្ចសហប្រតិបត្តិការយោធាចិនជូនដល់កងទ័ពជើងគោកនៃកងយោធពលខេរភូមិន្ទនាពេលនេះ គឺពិតជាបានបង្ហាញនូវចំណងមិត្តភាព ទំនាក់ទំនងល្អ និងជាដៃគូយុទ្ធសាស្ត្រគ្រប់ជ្រោយរវាងប្រទេសទាំងពីរ កម្ពុជា-ចិន៕