ចិន នឹងផ្ដល់វ៉ាក់សាំងប្រឆាំងវីរុសកូវីដ១៩ ដល់កម្ពុជាដែលជាមិត្តដែកថែប

ដោយ៖ យូ វីរៈ | ថ្ងៃចន្ទ ទី១២ ខែតុលា ឆ្នាំ២០២០ |

815

ភ្នំពេញ៖ ឯកឧត្ដម វ៉ាង យី ទីប្រឹក្សារដ្ឋ និងជារដ្ឋមន្ត្រីការបរទេសនៃសាធារណរដ្ឋប្រជាមានិតចិន បានមានប្រសាសន៍ថា ចិននឹងផ្ដល់នូវវ៉ាក់សាំងប្រឆាំងវីរុសCOVID-9 ដល់កម្ពុជាដែលជាមិត្តដែកថែប។ ឯកឧត្ដមបានមានប្រសាសន៍បែបនេះ ក្នុងជំនួបពិភាក្សាការងារជាមួយឯកឧត្ដម ឧបនាយករដ្ឋមន្ត្រី ហោ ណាំហុង នៅថ្ងៃទី១១ ខែតុលា ឆ្នាំ២០២០។

ក្នុងឱកាសនោះឯកឧត្តម ឧបនាយករដ្ឋមន្ត្រី ហោ ណាំហុង បានលើកថា ការប្រើប្រាស់ឥណទានសម្បទាន(Loan) និងហិរញ្ញប្បទានឥតសំណង(Grant) សម្រាប់បេក្ខភាពគម្រោងអាទិភាពឆ្នាំ២០២០ ដើម្បីអនុវត្តន៍គម្រោងមួយចំនួនរួមមាន៖ គម្រោងខ្សែកាប្លិ៍អុបទិកក្រោមបាតសមុទ្រ ទីក្រុងព្រះសីហនុ-ទីក្រុងហុងកុង, គម្រោងសាងសង់ផ្លូវជាតិលេខ71C, គម្រោងខ្សែបញ្ជូនអគ្គិសនីជនបទជំហានទី៧, គម្រោងជំរុញផលិកម្មស្រូវ និងនាំចេញអង្ករ, គម្រោងប្រព័ន្ធស្រោចស្រព និងការពារទឹកជំនន់ស្ទឹងព្រែកត្នោត, គម្រោងពង្រីក និងលើកកម្រិតផ្លូវជាតិលេខ៤១ លេខ៣៣ និងលេខ៣១។

ឯកឧត្តម ឧបនាយករដ្ឋមន្ត្រី ស្នើភាគីមិត្តចិនពិនិត្យលទ្ធភាពលើកទឹកចិត្តដល់វិនិយោគិនចិនក្នុងការផ្ទេររោងចក្រពីប្រទេសចិន មកប្រទេសកម្ពុជាឲ្យបានច្រើន ស្របតាមគោលនយោបាយជាតិ អភិវឌ្ឍន៍កសិកម្ម។ លើសពីនេះឯកឧត្តម ស្នើមិត្តចិនជួយដោះស្រាយបញ្ហាផ្ដាច់មុខ របស់ក្រុមហ៊ុនCOFCOរបស់ចិន ដែលជារបាំងសម្រាប់ការនាំចូលអង្ករកម្ពុជា ដែលមានចំនួន៤០០.០០០តោន។

ឯកឧត្តម វ៉ាង យី បានសរសើរសម្ដេចតេជោ ដែលបានទប់ស្កាត់Covid-19 បានជោគជ័យ។ ឯកឧត្ដមបន្តថា រដ្ឋាភិបាល និងប្រជាជនចិន ចងចាំមិនភ្លេចនូវដំណើរទស្សនកិច្ចរបស់សម្ដេចតេជោ ហ៊ុន សែន នាយករដ្ឋមន្ត្រីកម្ពុជា កាលពីខែកុម្ភៈកន្លងមក។ ការចុះហត្ថលេខា FTA នៅថ្ងៃនេះ គឺដោយសារសម្ដេចតេជោ និងឯកឧត្ដម ឧបនាយករដ្ឋមន្ត្រីបានខិតខំកន្លងមក។

ឯកឧត្ដមបន្តទៀតថា ក្រោយចប់COVID-19 ចិន និងកម្ពុជានឹងរៀបចំផែនការអភិវឌ្ឍរួមគ្នា។ វិនិយោគចិននៅកម្ពុជាមិនបានប៉ះពាល់ដោយកូវីដ១៩ ទេ តែកាន់តែមានច្រើន។ ភាគីមិត្តចិនបានប្រគល់នូវកំណត់ទូតអំពីជំនួយឥតសំណងសម្រាប់គម្រោងប្រញាប់ក្នុងការអភិវឌ្ឍកម្ពុជាដែលមានទឹកប្រាក់ចំនួន ៩៥០យាន់(ប្រហែល ១៤០លានដុល្លារ)។ ចិននឹងផ្ដល់វ៉ាក់សាំងប្រឆាំងវីរុសកូវីដ១៩ ដល់ប្រទេសកំពុងអភិវឌ្ឍន៍ ជាពិសេសកម្ពុជា ដែលជាមិត្តដែកថែប និងសន្យានាំចូលកសិផលកម្ពុជាថែមទៀតដែលមានគុណភាព តាមសំណើររបស់កម្ពុជា រួមនឹងពង្រីកកិច្ចសហប្រតិបត្តិការលើវិស័យផ្សេងៗទៀតផងដែរ៕