ប្រជាសហគមន៍ និងពលរដ្ឋធ្វើដំណើរតាមផ្លូវ ទទួលបានម៉ាសក្រណាត់ពីរាជរដ្ឋាភិបាល

ដោយ៖ យូ វីរៈ | ថ្ងៃព្រហស្បតិ៍ ទី១២ ខែវិច្ឆិកា ឆ្នាំ២០២០ |

550

ភ្នំពេញ៖ ស្របតាមការណែនាំរបស់សម្ដេចតេជោ ហ៊ុន សែន នាយករដ្ឋមន្ត្រី ម៉ាសក្រណាត់ត្រូវបានចែកជូនដល់ប្រជាសហគមន៍នៅមូលដ្ឋាន និងពលរដ្ឋទូទៅ ពិសេសអ្នកធ្វើដំណើរតាមដងផ្លូវដោយមិនបានពាក់ម៉ាស ខណៈជំងឺកូវីដ១៩ បានកើតមានជាថ្មីនៅរាជធានីភ្នំពេញ។

នៅថ្ងៃទី១២ ខែវិច្ឆិកា ឆ្នាំ២០២០ នេះ ឯកឧត្ដម ម៉ម ប៊ុនហេង រដ្ឋមន្ត្រីក្រសួងសុខាភិបាល និងឯកឧត្ដម ឃួង ស្រេង អភិបាលរាជធានីភ្នំពេញ បានចុះចែកម៉ាសក្រណាត់ ដល់ប្រជាសហគមន៍នៅមូលដ្ឋានខណ្ឌសែនសុខ និងបានណែនាំពីវិធីការពារផ្សេងៗ ក្នុងការទប់ស្កាត់ការឆ្លងជំងឺកូវីដ១៩។

ឯកឧត្ដម ឃួង ស្រេង បានមានប្រសាសន៍ថា ម៉ាស់ក្រណាត់ទាំង២លាននេះ គឺជាអំណោយរបស់សម្ដេចតេជោ ហ៊ុនសែន នាយករដ្ឋមន្ត្រីប្រគល់មកសាលារាជធានីភ្នំពេញ តាមរយៈរដ្ឋមន្ត្រីក្រសួងសុខាភិបាល ដើម្បីយកមកប្រគល់ជូនទៅដល់ប្រជាពលរដ្ឋក្រីក្រដែលមិនមានលទ្ធភាពក្នុងការទិញម៉ាស់យកមកប្រើប្រាស់ ខណៈដែលជំងឺកូវីដ-១៩បានបានកើតមានជាថ្មីនៅក្នុងរាជធានីភ្នំពេញ ។

ឯកឧត្ដមវេជ្ជបណ្ឌិត ម៉ម ប៊ុនហេង បានធ្វើការអំពាវនាវដល់ប្រជាពលរដ្ឋទាំងអស់រួមគ្នា ទប់ស្កាត់ការឆ្លងរីករាលដាលនៃជំងឺកូវីដ-១៩នេះ ពិសេសចំពោះអ្នកដែលកំពុងចត្តាឡីស័កត្រូវអនុវត្តឱ្យបានត្រឹមត្រូវទៅតាមការណែនាំរបស់ក្រសួងសុខាភិបាល។

បន្ទាប់ពីចប់ពិធីចែកម៉ាសជូនបងប្អូនប្រជាពលរដ្ឋតាមសហគមន៍រួច ឯកឧត្ដម ឃួង ស្រេង ក៏បានបន្តចុះចលនាយុទ្ធនាការចែកម៉ាសជូនបងប្អូនអ្នកធ្វើដំណើរតាមដងវិថី ដើម្បីចូលរួមបង្ការ និងទប់ស្កាត់ការឆ្លងជំងឺកូវីដ-១៩។

ជាមួយគ្នានេះដែរ ឯកឧត្ដម ឧត្ដមសេនីយ៍ឯក ស ថេត អគ្គស្នងការរង និងជាស្នងការនគរបាលរាជធានីភ្នំពេញ ក៏បានចុះចែកម៉ាស់ជូនប្រជាពលរដ្ឋតាមគោលដៅមួយចំនួនក្នុងរាជធានីភ្នំពេញ ដើម្បីចូលរួមបង្ការ និងទប់ស្កាត់ការឆ្លងជំងឺកូវីដ-១៩។ តាមរយៈសាលារាជធានីភ្នំពេញ ស្នងការដ្ឋាននគរបាលរាជធានីភ្នំពេញ ទទួលបានចំនួន ២ម៉ឺនម៉ាស់ ក្នុងចំណោមម៉ាស់ទាំងនេះ មួយចំណែកផ្តល់ជូនដល់អ្នកថ្មើជើង អ្នកជិះកង់ ជិះម៉ូតូ ធ្វើដំណើរដោយអត់ពាក់ម៉ាស់ ហើយក្នុងម្នាក់ៗទទួលបានម៉ាស់២ពីរ។ ម៉ាសក្រណាត់នេះ អាចបោកគក់ ហើយប្រជាពលរដ្ឋ អាចបន្តប្រើប្រាស់ ដោយផ្លាស់ប្តូរគ្នាបាន។

សូមជម្រាបជូនថា បន្ទាប់ពីដំណើរទស្សនកិច្ចរបស់រដ្ឋមន្រ្តីការបទេសហុងគ្រី(ធ្វើតេស្តវិជ្ជមានវីរុសកូវីដ១៩ នៅថៃ) ដែលសម្ដេចតេជោឲ្យឈ្មោះថា ព្រឹត្តិការណ៍ ៣វិច្ឆិកានោះ ជំងឺកូវីដ-១៩ បានកើតឡើងជាថ្មីនៅរាជធានីភ្នំពេញ និងមានអ្នកឆ្លងចំនួន៤នាក់ រាជរដ្ឋាភិបាល ក៏ដូចជាក្រសួងសុខាភិបាលបានដាក់ចេញនូវវិធានការជាបន្តបន្ទាប់ដើម្បីទប់ស្កាត់កុំឲ្យមានការរីករាលដាលបន្តទៀត៕