កម្ពុជាឆ្លើយតបនឹងការចោទប្រកាន់ដោយគ្មានមូលដ្ឋានរបស់អាមេរិកដែលថា កម្ពុជាមានផែនការធ្វើជាម្ចាស់ផ្ទះសម្រាប់កងទ័ពបរទេស នៅមូលដ្ឋានកងទ័ពជើងទឹករាម

ដោយ៖ យូ វីរៈ | ថ្ងៃអាទិត្យ ទី១៥ ខែវិច្ឆិកា ឆ្នាំ២០២០ |

1,089

ភ្នំពេញ៖ ឯកឧត្ដមអគ្គបណ្ឌិតសភាចារ្យ អូន ព័ន្ធមុន្នីរ័ត្ន ឧបនាយករដ្ឋមន្ត្រី រដ្ឋមន្ត្រីសេដ្ឋកិច្ច និងហិរញ្ញវត្ថុ បានមានប្រសាសន៍ថា កម្ពុជាគ្មានមូលដ្ឋានយោធាបរទេសណាមួយនៅលើទឹកដីរបស់ខ្លួនឡើយ។

ការលើកឡើងយ៉ាងដូច្នេះគឺបន្ទាប់ពី ឯកឧត្ដម រ៉ូបឺត អូប្រាយអិន ទីប្រឹក្សាសន្តិសុខជាតិអាមេរិក បានលើកឡើងក្នុងកិច្ចប្រជុំកំពូលអាស៊ីបូព៌ាលើកទី១៥ តាមប្រព័ន្ធវីដេអូ កាលពីថ្ងៃទី១៤វិច្ឆិកា ថា សហរដ្ឋអាមេរិកមានការព្រួយបារម្ភពីផែនការរបស់កម្ពុជា ក្នុងការធ្វើជាម្ចាស់ផ្ទះសម្រាប់កងទ័ពជើងទឹកបរទេស និងបុគ្គលិករបស់គេ នៅឯមូលដ្ឋានកងទ័ពជើងទឹករាមនៅឈូងសមុទ្រថៃ។

ជាការឆ្លើយតប ឯកឧត្ដម ឧបនាយករដ្ឋមន្ត្រី អូន ព័ន្ធមុន្នីរ័ត្ន ក្នុងនាមជាតំណាងសម្ដេចតេជោ ហ៊ុន សែន នាយករដ្ឋមន្ត្រី នៃកម្ពុជា មានប្រសាសន៍ថា ការចោទប្រកាន់ម្ដងហើយម្ដងទៀត និងការផ្សព្វផ្សាយរឿងដែលគ្មានមូលដ្ឋាន របស់ឯកឧត្ដម រ៉ូបឺត អូប្រាយអិន ទីប្រឹក្សាសន្តិសុខជាតិអាមេរិក បែបនេះ អាចធ្វើឲ្យអន្តរាយដល់ការជឿទុកចិត្តគ្នា និងបង្កអរិភាពរវាងប្រទេសកម្ពុជា និងប្រទេសក្នុងតំបន់។ ឧបនាយករដ្ឋមន្ត្រីបន្តថា កម្ពុជាគ្មានហើយថ្ងៃមុខក៏នឹងពុំមានដែរនូវមូលដ្ឋានយោធាបរទេសណាមួយលើទឹកដៃរបស់ខ្លួន។

ឯកឧត្ដម ឧបនាយករដ្ឋមន្ត្រី បានបញ្ជាក់សាជាថ្មីដែរថា រាជរដ្ឋាភិបាលកម្ពុជាប្រកាន់ខ្ជាប់យ៉ាងម៉ឺងម៉ាត់នូវគោលការណ៍ឯករាជ្យ និងអព្យាក្រឹត តាមសេចក្ដីចែងក្នុងរដ្ឋធម្មនុញ្ញ នៃព្រះរាជាណាចក្រកម្ពុជា ដែលហាមដាច់ខាតនូវវត្តមានមូលដ្ឋានយោធាបទេស នៅក្នុងប្រទេសកម្ពុជា។

ឯកឧត្ដមបន្តទៀតថា ក្នុងនាមជាប្រទេសមួយដែលមានអធិបតេយ្យ និងឯករាជ្យ មានបូរណភាពទឹកដីពេញលេញ ក្រោមការគ្រប់គ្រងរបស់រដ្ឋាភិបាលស្របច្បាប់ និងមានសិទ្ធិស្មើគ្នាដូចជាប្រជាជាតិដទៃទៀតក្នុងតំបន់ក៏ដូចជានៅជុំវិញពិភពលោក ប្រទេសកម្ពុជាមានសិទ្ធិពេញលេញ និងមិនអាចកាត់ផ្ដាច់បាន ក្នុងការកែលម្អមូលដ្ឋានកងទ័ពជើងទឹក កំពង់ផែ ឬហេដ្ឋារចនាសម្ព័ន្ធនាវាចរណ៍របស់ខ្លួន ដើម្បីបំពេញសេចក្ដីត្រូវការក្នុងពេលបច្ចុប្បន្ន ស្របតាមរដ្ឋធម្មនុញ្ញរបស់ប្រទេស។ ដោយហេតុផលនេះហើយ ដែលមជ្ឈមណ្ឌលសមុទ្ររបស់យើងនៅឯមូលដ្ឋានទ័ពជើងទឹករាមត្រូវបានផ្លាស់ទៅទីតាំងថ្មី ប៉ុន្តែក៏នៅតែស្ថិតក្នុងតំបន់គម្រោងជាមួយគ្នា។ ផ្ទុយស្រឡះពីការចោទប្រកាន់ដែលថា មជ្ឈមណ្ឌលនេះត្រូវបិទចោល។ ក្នុងនោះដែរសម្ដេចតេជោ នាយករដ្ឋមន្ត្រីនៃកម្ពុជា បានអញ្ជើញមិត្តភក្ដិបរទេសដែលចាប់អារម្មណ៍ទាំងអស់ឲ្យចូលរួមធ្វើហិរញ្ញប្បទានទ្រទ្រង់ដល់មជ្ឈមណ្ឌលនេះផងដែរ។

ឯកឧត្ដម បញ្ជាក់ថា កម្ពុជាស្វាគមន៍ចំពោះការផ្ដល់ជំនួយ និងការបន្តផ្ដល់ជំនួយពីសហរដ្ឋអាមេរិក អូស្ត្រាលី កូរ៉េខាងត្បូង ជប៉ុន ចិន និងប្រទេសដទៃទៀត ដរាបណាជំនួយនេះមិនរារាំងកម្ពុជាក្នុងការអនុវត្តសិទ្ធិអធិបតេយ្យរបស់ខ្លួន៕