មន្ត្រីជាន់ខ្ពស់ WHO ចាត់ទុកការដឹកនាំរបស់រាជរដ្ឋាភិបាលកម្ពុជាជាគំរូល្អក្នុងវិស័យសុខភាពសាធារណៈ

ដោយ៖ យូ វីរៈ | ថ្ងៃសៅរ៍ ទី២១ ខែវិច្ឆិកា ឆ្នាំ២០២០ |

369

ភ្នំពេញ៖ មន្ត្រីជាន់ខ្ពស់របស់អង្គការសុខាភាពពិភពលោក (WHO) បានចាត់ទុកការដឹកនាំរបស់ រាជរដ្ឋាភិបាលកម្ពុជាដែលមានសម្តេចតេជោ ហ៊ុន សែន ជាប្រមុខ ជាគំរូដ៏ល្អក្នុងវិស័យសុខភាពសាធារណៈ។

មន្ត្រីជាន់ខ្ពស់ WHO ថ្លែងនូវការកោតសរសើរចំពោះថ្នាក់ដឹកនាំរាជរដ្ឋាភិបាលកម្ពុជា ដែលបានសម្រេចចិត្តយ៉ាងរហ័សរហួនក្នុងការទប់ស្កាត់មិនឱ្យមានការរីករាលដាលជំងឺកូវីដ១៩ ពិសេសការគ្រប់គ្រងក្នុងព្រឹត្តិការណ៍ «៣វិច្ឆិកា» និងបានចាត់ទុកថ្នាក់ដឹកនាំរាជរដ្ឋាភិបាលកម្ពុជាថា បានអនុវត្តន៍នូវវិធានការជាគំរូដ៏ល្អក្នុងវិស័យសុខភាពសាធារណៈ។

ជំងឺបង្កដោយមេរោគកូវីដ១៩ ជាជំងឺមួយដែលមន្ត្រីជំនាញផ្នែកសុខភាពសាធារណៈវាយតម្លៃថា ជាជំងឺមានការរីករាលដាលយ៉ាងឆាប់រហ័សបំផុត។ ព្រឹត្តិការណ៍ «៣វិច្ឆិកា» ការប្រាស្រ័យទាក់ទងដោយផ្ទាល់ និងប្រយោលជាមួយលោក ភីតធើ ស៊ីចាតូ រដ្ឋមន្ត្រីការបរទេស និងពាណិជ្ជកម្មរបស់ហុងគ្រី ពីសំណាក់សម្តេចតេជោ ហ៊ុន សែន និងមន្ត្រីជាន់ខ្ពស់របស់កម្ពុជា ព្រមទាំងមន្ត្រី និងអ្នកពាក់ព័ន្ធរហូតដល់ទៅជាង ៤ពាន់នាក់ នាំឱ្យមានការព្រួយបារម្ភយ៉ាងខ្លាំងពីការផ្ទុះជំងឺកូវីដ១៩ ទៅក្នុងសហគមន៍។

ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន ដែលមិនចេះមើលស្រាលចំពោះស្ថានការណ៍គ្រោះថ្នាក់ទាំងឡាយនោះ បានដាក់ចេញវិធានការបន្ទាន់ និងយ៉ាងម៉ឺងម៉ាត់បំផុតក្នុងការទប់ស្កាត់ការរីករាលដាលជំងឺកូវីដ១៩ ក្នុងព្រឹត្តិការណ៍ «៣វិច្ឆិកា» នេះ។ សម្តេចតេជោ មិនបានអល់អែក ក្នុងការទប់ស្កាត់ការរីករាលដាលជំងឺកូវីដ១៩ ក្នុងព្រឹត្តិការណ៍ «៣វិច្ឆិកា» ដូចជាការរកអ្នកពាក់ព័ន្ធ ដើម្បីពិនិត្យសុខភាព និងធ្វើចត្តាឡីស័ករយៈពេល ១៤ថ្ងៃ។

លោកបណ្ឌិត តាក់កឺស៊ី កាសៃ (Takeshi Kasai) អគ្គនាយកអង្គការសុខភាពពិភពលោកប្រចាំតំបន់ប៉ាស៊ីហ្វិកខាងលិច បានសរសេរនៅលើ Twitter ថា សុខុមាលភាពជាសមូហភាព គឺពឹងផ្អែកលើការដឹកនាំដ៏ខ្លាំងក្លា និងសកម្មភាពនៃបុគ្គលនីមួយៗ។

លោកបណ្ឌិត តាក់កឺស៊ី កាសៃ បានថ្លែងកោតសរសើរពីការគ្រប់គ្រងព្រឹត្តិការណ៍ «៣វិច្ឆិកា» របស់កម្ពុជាយ៉ាងដូច្នេះថា «ខ្ញុំសូមកោតសរសើរប្រទេសកម្ពុជា ចំពោះការសម្រេចចិត្តដ៏រហ័សរហួនរបស់ខ្លួន នៅក្នុងការគ្រប់គ្រងករណីឆ្លងជាចង្កោម ទៅលើព្រឹត្តិការណ៍ [៣ វិច្ឆិកា] នៃការបំពេញទស្សនកិច្ចការទូត និងសូមកោតសរសើរថ្នាក់ដឹកនាំរដ្ឋាភិបាលកម្ពុជា ដែលអនុវត្តគំរូដ៏ល្អក្នុងវិស័យសុខភាពសាធារណៈ»។

លោកស្រីវេជ្ជបណ្ឌិត លី អាលែន តំណាងអង្គការសុខភាពពិភពលោកប្រចាំនៅកម្ពុជាលើ Twitter របស់លោកស្រីថា ការរកឃើញបានឆាប់ ឆ្លើយទាន់ពេល ជាមួយនឹងកិច្ចអន្តរាគមន៍លើគោលដៅដែលត្រូវបានកំណត់ គឺជាកត្តាចាំបាច់បំផុត ដើម្បីទទួលបានជោគជ័យលើការទប់ស្កាត់មិនឱ្យជំងឺរីករាលដាល។

លោកស្រី ក៏បានថ្លែងកោតសរសើរ និងអបអរសាទរកម្ពុជាក្នុងការគ្រប់គ្រងព្រឹត្តិការណ៍ «៣វិច្ឆិកា» បានយ៉ាងល្អ និងរក្សាបានសុវត្ថិភាពសុខភាពសាធារណៈសម្រាប់ពលរដ្ឋកម្ពុជាទាំងមូល។

ព្រឹត្តិការណ៍ «៣វិច្ឆិកា» ត្រូវបានគេចាត់ទុកជាការគ្រប់គ្រងយ៉ាងជោគជ័យលើការរីករាលដាលជំងឺកូវីដ១៩ របស់រាជរដ្ឋាភិបាលកម្ពុជា ក្រោមការដឹកនាំរបស់សម្តេចតេជោ ហ៊ុន សែន បន្ទាប់ពីជំងឺនេះមិនបានរីករាលដាលចូលទៅក្នុងសហគមន៍។

ព្រឹត្តិការណ៍ «៣វិច្ឆិកា» អ្នកប៉ះពាល់ដោយផ្ទាល់ និងប្រយោលរហូតដល់ទៅជាង ៤ពាន់នាក់ ត្រូវបានធ្វើតេស្តសុខភាពរកជំងឺកូវីដ១៩ និងតម្រូវឱ្យធ្វើចត្តាឡីស័ក១៤ថ្ងៃ។ ពាក់ព័ន្ធព្រឹត្តិការណ៍នេះ មានមនុស្ស ៤នាក់ ត្រូវបានរកឃើញឆ្លងជំងឺកូវីដ១៩ ហើយត្រូវបានបញ្ជូនយកទៅព្យាបាល។ អ្នកជំងឺពីរនាក់ បានព្យាបាលជាហើយគិតត្រឹមថ្ងៃទី២០ ខែវិច្ឆិកា នៅសល់តែពីរនាក់ទៀតប៉ុណ្ណោះកំពុងសម្រាកព្យាបាល៕ ប្រភព៖ FreshNews