ក្រសួងសុខាភិបាល សម្រេចផ្អាកដំណើរការបណ្ដោះអាសន្ន ធនាគារចិន(មុន្នីវង្ស) និងធនាគារកាថេ យូណៃធីត(សម្ដេចប៉ាន)

ដោយ៖ យូ វីរៈ | ថ្ងៃព្រហស្បតិ៍ ទី៣ ខែធ្នូ ឆ្នាំ២០២០ |

472

ភ្នំពេញ៖ នៅថ្ងៃទី០២ ខែធ្នូ ឆ្នាំ២០២០នេះ ក្រសួងសុខាភិបាល សម្រេចផ្អាកដំណើរការជាបណ្ដោះអាសន្ន ធនាគារ ចិន-កាណាឌីយ៉ា ផ្លូវព្រះមុន្នីវង្ស និងធនាគារកាថេ យូណៃធីត សាខាផ្លូវសម្ដេចប៉ាន រាជធានីភ្នំពេញ បន្ទាប់ពីមានករណីឆ្លងចូលក្នុងសហគមន៍ ២នាក់ថ្មី ។

ក្រសួងសុខាភិបាល នឹងចុះយកសំណាករបស់បុគ្គលិកទាំងអស់ និងតម្រូវឲ្យបុគ្គលិកទាំងអស់នៃធនាគារទាំងពីរ សាខានេះ ធ្វើចត្តាឡីស័កចំនួន១៤ថ្ងៃផងដែរ។

សូមបញ្ជាក់ថា នៅថ្ងៃនេះក្រសួងសុខាភិបាល បានប្រកាសរកឃើញករណីវិជ្ជមានវីរុសកូវីដ១៩ថ្មីចំនួន ២នាក់ ក្នុងនោះមាន៖(ទី១)បុរសជនជាតិខ្មែរអាយុ ២៣ ជាបុគ្គលិកធនាគារចិន (កាណាឌីយ៉ា ផ្លូវមុនីវង្ស) ដែលបានប៉ះពាល់ជាមួយស្ត្រីអាយុ៣៦ឆ្នាំ ដែលរកឃើញវីរុសកូវីដ១៩ កាលពីថ្ងៃទី២៩ ខែវិច្ឆិកា ឆ្នាំ២០២០។ (ទី២)ស្ត្រីជនជាតិខ្មែរអាយុ ២១ឆ្នាំ (ត្រូវជាប្អូនស្រីបង្កើតបុរសខាងលើ) ជាបុគ្គលិកធនាគារកាថេ យូណៃធីត រាជធានីភ្នំពេញ។ អ្នកទាំងពីររូបនេះមានអាសយដ្ឋានស្នាក់នៅសង្កាត់វាលស្បូវ ខណ្ឌច្បារអំពៅ រាជធានីភ្នំពេញ ហើយលទ្ធផលធ្វើតេស្តវត្ថុសំណាករបស់អ្នកទាំងពីរ ផ្តល់ដោយវិទ្យាស្ថានប៉ាស្ទ័រកម្ពុជា រាជធានីភ្នំពេញ គឺវិជ្ជមានវីរុសកូវីដ-១៩ ហើយបច្ចុប្បន្នអ្នកជំងឺ ត្រូវបានដាក់ឱ្យសម្រាកព្យាបាល នៅមន្ទីរពេទ្យមិត្តភាពខ្មែរ-សូវៀត រាជធានីភ្នំពេញ៕