លទ្ធផលនៃកិច្ចប្រជុំ AIMF ប៉ុន្មានថ្ងៃនេះរាជធានីភ្នំពេញ ទទួលបានគម្រោងសំខាន់ៗជាច្រើននៅឆ្នាំ២០២១

លទ្ធផលនៃកិច្ចប្រជុំ AIMF ប៉ុន្មានថ្ងៃនេះរាជធានីភ្នំពេញ ទទួលបានគម្រោងសំខាន់ៗជាច្រើននៅឆ្នាំ២០២១

ភ្នំពេញ​៖ លទ្ធផលនៃកិច្ចប្រជុំមហាសន្និបាតលើកទី៤០ និងកិច្ចប្រជុំការិយាល័យអចិន្រ្តៃយ៍លើកទី៩២ របស់សមាគមអន្តរជាតិនៃអភិបាលក្រុងប្រើប្រាស់ភាសាបារាំង ឬហៅថា AIMF ប៉ុន្មានថ្ងៃនេះរាជធានីភ្នំពេញ ទទួលបានគម្រោងសំខាន់ៗជាច្រើននៅឆ្នាំ២០២១ ដែលមានទឹកប្រាក់ជាង២លានដុល្លារសហរដ្ឋអាមេរិក។

មន្ត្រីរដ្ឋបាលរាជធានីភ្នំពេញបានឱ្យដឹងនៅព្រឹកថ្ងៃទី១២ ខែធ្នូ ឆ្នាំ២០២០ ថា ក្រោយកិច្ចប្រជុំមហាសន្និបាតលើកទី៤០ និងកិច្ចប្រជុំការិយាល័យអចិន្រ្តៃយ៍លើកទី៩២ របស់សមាគមអន្តរជាតិនៃអភិបាលក្រុងប្រើប្រាស់ភាសាបារាំង ឬហៅថា AIMF កាលពីថ្ងៃទី៩ និងទី១០ ខែធ្នូ ឆ្នាំ២០២០នោះ រាជធានីភ្នំពេញ ទទួលបានគម្រោងអនុវត្តសំខាន់ៗនៅឆ្នាំ២០២១ ជាច្រើន ដែលមានដូចជា គម្រោង “សុខមាលភាពនៅក្នុងទីក្រុង និងការគ្រប់គ្រងកាកសំណល់ភក់បង្គន់” ដែលមានទំហំទឹកប្រាក់ចំនួនប្រមាណ២លានដុល្លារអាមេរិក ក្នុងនោះរដ្ឋបាលរាជធានីភ្នំពេញត្រូវចូលរួមបដិភាគចំនួន១០ម៉ឺនដុល្លារអាមេរិក សម្រាប់សាងសង់ស្ថានីយប្រព្រឹត្តិកម្ម ដែលថវិកាប្រមាណ២លានដុល្លានោះជាហិរញ្ញប្បទានឥតសំណងរបស់សមាគម និងដៃគូអភិវឌ្ឍជូនមករដ្ឋបាលរាជធានីភ្នំពេញ។

មន្ដ្រីដដែលបន្ថែមថា មួយទៀតជា គម្រោង “ការត្រៀមខ្លួនឆ្លើយតបនឹងស្ថានភាពអាសន្ន និងការប្រយុទ្ធប្រឆាំងនឹងជំងឺកូវីដ–១៩” ដែលមានទំហំទឹកប្រាក់ជិត២០ម៉ឺនដុល្លារអាមេរិក។ ហើយនៅក្នុងការបោះឆ្នោតកែសម្រួលសមាសភាពសមាជិកនៃការិយាល័យអចិន្ត្រៃយ៍ របស់សមាគមឡើងវិញ រាជធានីភ្នំពេញតំណាងឱ្យទីក្រុងនៅក្នុងទ្វីបអាស៊ី នឹងបន្តធ្វើជាសមាជិកការិយាល័យអចិន្ត្រៃយ៍សម្រាប់ឆ្នាំ២០២១–២០២២បន្តទៀត ដែលកិច្ចប្រជុំបន្ទាប់របស់ការិយាល័យអចិន្ត្រៃយ៍ នឹងប្រារព្ធធ្វើនៅទីក្រុងប័រដូ សាធារណៈរដ្ឋបារាំង នៅអំឡុងខែមីនា ឆ្នាំ២០២១។ សម្រាប់អង្គមហាសន្និបាតបានបោះឆ្នោតជ្រើសរើសទីក្រុងគីហ្គាលី ប្រទេសរ៉ាវ៉ាន់ដា ជាទីតាំងសម្រាប់ប្រារព្ធធ្វើមហាសន្និបាតលើកក្រោយ នៅអំឡុងខែកក្កដា ឆ្នាំ២០២១។

មន្ត្រីដដែលឱ្យដឹងថា កិច្ចប្រជុំការិយាល័យអចិន្ត្រៃយ៍លើកទី៩២ និងកិច្ចប្រជុំមហាសន្និបាតលើកទី៤០ របស់សមាគម AIMF ក្រោមប្រធានបទ “ទីក្រុងកំពុងអភិវឌ្ឍន៍ និងប្រព័ន្ធឌីជីថល” បានប្រារព្ធធ្វើនៅទីក្រុងទុយនីស ប្រទេសទុយនេស៊ី តាមវីដេអូបន្តផ្ទាល់ ស្របតាមការអញ្ជើញរបស់ លោកជំទាវ Anne HIDALGO អភិបាលទីក្រុងប៉ារីស និងជាប្រធានសមាគម AIMF និងលោកជំទាវ Souad BEN ABDERRAHIM អភិបាលទីក្រុងទុយនីស៕ ប្រភព៖ BTVNews