ស្រ្តីមេម៉ាយក្រីក្រ មានកូន៣នាក់ទទួលអំណោយផ្ទះថ្មី ១ខ្នងពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន

ដោយ៖ យូ វីរៈ | ថ្ងៃសុក្រ ទី៣០ ខែមេសា ឆ្នាំ២០២១ |

1,126

បាត់ដំបង៖ គ្រួសារស្រ្តីមេម៉ាយ ចិញ្ចឹមកូន៣នាក់ គ្មានផ្ទះសំបែង រស់នៅអាស្រ័យជាមួយឪពុកម្តាយក្មេកវ័យចាស់ជរា ព្រមទាំងមានជីវភាពខ្វះខាត រស់នៅភូមិអ្នកតាទ្វា ឃុំឬស្សីក្រាំង ស្រុកមោងឬស្សី ខេត្តបាត់ដំបង ទទួលបានផ្ទះថ្មថ្មី ១ខ្នង ជាអំណោយដ៏ថ្លៃថ្លារបស់សម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា តាមរយៈសាខាកាកបាទក្រហមខេត្តបាត់ដំបង។

ក្រុមការងារដឹកនាំដោយ ឯកឧត្តម អ៊ុយ រី អនុប្រធានកិត្តិយសសាខា ឯកឧត្តម ប៊ុត គឹមស៊ាន ប្រធានគណៈកម្មាធិការសាខាកាកបាទក្រហមកម្ពុជាខេត្ត ក្នុងឱកាសនៃពិធីប្រគល់-ទទួលផ្ទះនាថ្ងៃទី ២៩ ខែមេសា ឆ្នាំ២០២១នេះ បាននាំនូវប្រសាសន៍ផ្ដាំផ្ញើសួរសុខទុក្ខ និងក្តីអាណិតស្រឡាញ់ដ៏ជ្រាលជ្រៅពីសំណាក់សម្ដេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ជូនចំពោះគ្រួសារលោកស្រី ព្រួញ វ៉ិត ដែលចិញ្ចឹមកូន៣នាក់ មុខរបរជាកម្មករសំណង់។

ជាមួយនឹងការអបអរជាមួយនឹងការទទួលបាននូវជម្រកស្នាក់នៅថ្មីដ៏សមរម្យនេះ ក្រុមការងារកាកបាទក្រហម ក៏ណែនាំឲ្យគិតគូរពីសុខភាព និងជីវភាព រស់នៅរបស់ប្រចាំថ្ងៃ និង សូមបន្តថែទាំកូនៗ និងជំរុញអោយបានខិតខំសិក្សារៀនសូត្រ និងប្រឹងប្រែងប្រកបមុខរបរកស៊ី ដើម្បីជីវភាពរស់នៅបន្តទៀត។

ដើម្បីជួយសម្រាលដល់ជីវភាពរស់នៅ សាខាកាកបាទក្រហមខេត្ត បានផ្តល់ជូនអំណោយសម្រាប់សង្កត់ផ្ទះរួមមាន ៖ អង្ករ១០០គ.ក, ទឹកសុទ្ធ១០កេស ឃីត១កញ្ចប់ (មុង ភួយ សារុង ក្រមា អាយឺត), សាប៊ូ៨ដុំ ម៉ាស់២ប្រអប់,ប៉ៅអ៊ី១ ទឹកត្រី ទឹកស៊ីអ៊ីវ២យួរ ត្រីខ២០កំប៉ុង សម្ភារផ្ទះបាយមួយចំនួន និងថវិកាចំនួន២០ម៉ឺនរៀល ក្នុងនោះឯកឧត្តម អ៊ុយ រី បានឧបត្ថម្ភថវិកាបន្ថែមចំនួន ៣០ម៉ឺនរៀលជូនលោលយាយ លោកតា ត្រូវជាម្តាយក្មេកលោកស្រី ព្រួញ វ៉ីត ផងដែរ៕