ពលរដ្ឋរងគ្រោះដោយជំនន់ទឹកភ្លៀងជិត ៩០០គ្រួសារ ទទួលបានអំណោយសម្ដេចតេជោ និងសម្ដេចកិត្តិព្រឹទ្ធបណ្ឌិត

ដោយ៖ យូ វីរៈ | ថ្ងៃសៅរ៍ ទី៣០ ខែតុលា ឆ្នាំ២០២១ |

274

ភ្នំពេញ៖ នៅព្រឹកថ្ងៃទី៣០ ខែតុលា ឆ្នាំ២០២១នេះ ឯកឧត្ដម ឃួង ស្រេង អភិបាលរាជធានីភ្នំពេញ បានអញ្ជើញនាំយកអំណោយដ៏ថ្លៃថ្លារបស់សម្ដេចតេជោ ហ៊ុន សែន នាយករដ្ឋមន្ត្រី និងសម្ដេចកិត្តិព្រឹទ្ធបណ្ឌិត ចែកជូនបងប្អូនប្រជាពលរដ្ឋដែលរងគ្រោះដោយទឹកជំនន់ទឹកភ្លៀង ទឹកសណ្ដស្ទឹងព្រែកត្នោត ចំនួន ៨៦៩គ្រួសារ ស្ថិតនៅក្នុងសង្កាត់សាក់សំពៅ ខណ្ឌដង្កោ រាជធានីភ្នំពេញ។

ឯកឧត្ដម អភិបាលរាជធានីបានមានប្រសាសន៍ថា បើទោះបីជាទឹកជំនន់ស្ទឹងព្រែកត្នោតបានស្រកក៏ពិតមែន ប៉ុន្តែអាជ្ញាធរនៅតែតាមដានដោយយកចិត្តទុកដាក់ រហូតបងប្អូនប្រជាពលរដ្ឋមិនមានផលប៉ះពាល់ពីគ្រោះទឹកជំនន់នេះទៀត ដោយអនុវត្តតាមអនុសាសន៍របស់ប្រមុខរាជរដ្ឋាភិបាលកម្ពុជា សម្ដេចតេជោ ហ៊ុន សែន គឺការងារសំខាន់ ត្រូវសង្គ្រោះប្រជាពលរដ្ឋ និងមិនទុកឲ្យប្រជាពលរដ្ឋណាម្នាក់ស្លាប់ដោយអត់បាយ ដោយយើងមិនដឹងនោះទេ។

ក្នុងឱកាសនោះដែរ ឯកឧត្តម ឃួង ស្រេង ក៏បានអំពាវនាវឲ្យប្រជាពលរដ្ឋគ្រប់មជ្ឈដ្ឋាន ជាពិសេសប្រជាពលរដ្ឋរងគ្រោះទាំងអស់ សូមបន្ត និងបង្កើនការប្រុងប្រយ័ត្នចំពោះបញ្ហាសុខភាព ដោយត្រូវអនុវត្តនូវរាល់វិធានការទាំងឡាយ តាមការណែនាំរបស់ក្រសួងសុខាភិបាល និងត្រូវប្រកាន់ខ្ជាប់ជានិច្ចនូវវិធានការ “៣ ការពារ និង ៣ កុំ” របស់សម្តេចតេជោនាយករដ្ឋមន្ត្រី ដើម្បីចៀសឆ្ងាយផុតពីជំងឺកូវីដ-១៩ ។

បន្ទាប់ពីបានចែកជូនអំណោយដល់ពលរដ្ឋរួចហើយ ឯកឧត្ដម អភិបាលរាជធានី ក៏បានចុះពិនិត្យការកាយប្រឡាយបង្ហូរទឹកចូលស្ទឹងព្រែកត្នោតវិញ ត្រង់ចំនុចផ្លូវបេតុង ចូលវត្តកំពង់ក្ដុលផងដែរ៕