សម្តេចតេជោ ហ៊ុន សែន បញ្ជាក់ថា កត្តាសន្តិភាព គឺជាចំណុចចាប់ផ្តើមនៃអ្វីទាំងអស់នៅកម្ពុជា

សម្តេចតេជោ ហ៊ុន សែន បញ្ជាក់ថា កត្តាសន្តិភាព គឺជាចំណុចចាប់ផ្តើមនៃអ្វីទាំងអស់នៅកម្ពុជា

ភ្នំពេញ៖ សម្ដេចតេជោ​ ហ៊ុន​ សែន​ បានមានប្រសាសន៍បញ្ជាក់ថា​ កម្ពុជាបានឲ្យតម្លៃពីគុណតម្លៃ សុខសន្តិភាព​តាំងពីទសវត្សរ៍ឆ្នាំ១៩៧៩មកម្ល៉េះ ដែលកត្តាសន្តិភាពទាំងនេះហើយ គឺជាចំណុច​ចាប់ផ្ដើម​នៃអ្វីទាំងអស់នៅកម្ពុជា។

សម្ដេចតេជោ ហ៊ុន​ សែន​ បាន​បញ្ជាក់យ៉ាងដូច្នេះក្នុងឱកាសសម្ដេចអញ្ជើញជាអធិបតីភាព​ក្នុង​ពិធីសម្ពោធដាក់ឲ្យប្រើប្រាស់ជាផ្លូវការស្ពានអាកាស និងផ្លូវក្រោមដីចោមចៅ ស្ថិតក្នុង​សង្កាត់ចោម​ចៅទី៣ ខណ្ឌពោធិ៍សែនជ័យ រាជធានីភ្នំពេញ នាព្រឹកថ្ងៃទី៣១ ខែមីនា ឆ្នាំ២០២២។

សម្តេចតេជោ ហ៊ុន សែន មានប្រសាសន៍ថា «ពេលមានសង្គ្រាម ទើបយើងមើលឃើញពីតម្លៃ នៃសុខសន្តិភាព»។ សម្តេចតេជោបន្ត នាពេលបច្ចុប្បន្ននេះ ពិភពលោក​បាន​កំពុង​ស្វែង​រក​សន្តិភាព និងការពារសន្តិភាព ខណៈបញ្ហាសង្រ្គាមនៅអ៊ុយក្រែនបានកំពុងបន្ត។ សម្តេចតេជោក៏បានបញ្ជាក់ដែរថា ពេលវេលានេះ ម៉ោងនេះ កម្ពុជា​កំពុង​ធ្វើការ​សាងសង់​នូវ​ហេដ្ឋារ​​ចនាសម្ព័ន្ធ ខណៈប្រទេសអ៊ុយក្រែន​កំពុង​បាន​បំផ្លាញ​​ហេដ្ឋា​រចនា​សម្ព័ន្ធ​នានា​ដោយ​សារ​សង្រ្គាម​។

សម្ដេចតេជោ ហ៊ុន សែន ក៏បានគូសបញ្ជាក់ថា បើសិនគ្មានសន្តិភាពទេ កុំនិយាយពីការអភិវឌ្ឍ ហើយក៏កុំនិយាយទៅដល់លទ្ធិប្រជាធិបតេយ្យនិងសិទ្ធិមនុស្ស។ សម្តេចតេជោ ហ៊ុន សែន លើកឡើងដែរថា មិនប្រាកដថាអ្នកដែលទន្ទេញចាំមាត់រឿងសិទ្ធិមនុស្ស និងលទ្ធិប្រជាធិបតេយ្យ ស្រលាញ់ និងចូលរួមដោះស្រាយបញ្ហាទាំងនោះឡើយ ដែលជាក់ស្តែងយើងមើលឃើញពីបណ្តាប្រទេសទាំងនោះ កំពុងរើសអើងជាតិសាសន៍ និងមិនខ្វល់ពីបញ្ហាសិទ្ធិមនុស្ស ឬលទ្ធិប្រជាធិបតេយ្យឡើយ៕