ឯកឧត្តម ឃួង ស្រេង ស្នើបារាំងជួយសាងសង់ស្ថានីយប្រព្រឹត្តកម្មទឹកកខ្វក់មួយកន្លែងទៀតនៅភ្នំពេញ

ដោយ៖ យូ វីរៈ | ថ្ងៃពុធ ទី១៨ ខែឧសភា ឆ្នាំ២០២២ |

414

ភ្នំពេញ៖ ឯកឧត្តម ឃួង ស្រេង អភិបាលរាជធានីភ្នំពេញ បានស្នើសុំឱ្យភាគីបារាំងជួយសាងសង់ស្ថានីយប្រព្រឹត្តកម្មទឹកកខ្វក់មួយកន្លែងទៀតនៅភ្នំពេញ ដើម្បីឱ្យបរិស្ថានទឹកល្អប្រសើរ មុននឹងហូរចូលទៅដងទន្លេសាប។

ការស្នើសុំនេះបានធ្វើឡើងក្នុងឱកាសដែលឯកឧត្តមអភិបាលរាជធានីភ្នំពេញ បានជួបសម្ដែងការគួរសម និងពិភាក្សាការងារជាមួយ លោក ហ្សាក់ ប៉ឺឡេ ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋបារាំងប្រចាំព្រះរាជាណាចក្រកម្ពុជា នៅរសៀលថ្ងៃទី១៨ ខែឧសភា ឆ្នាំ២០២២ នៅសាលារាជធានីភ្នំពេញ ។

ឯកឧត្តម ឃួង ស្រេង ប្រាប់ភាគីបារាំងថា នៅរាជធានីភ្នំពេញ មានស្ថានីយប្រព្រឹត្តកម្មទឹកកខ្វក់ជាច្រើនកន្លែង ដែលបានការជួយឧបត្ថម្ភពីអង្គការ jica របស់ជប៉ុន ដោយឡែកនៅខាងជើងភាគខាងលិចរាជធានីភ្នំពេញមិនទាន់មាននៅឡើយទេ។ ដូច្នេះ ឯកឧត្តមស្នើសុំឱ្យបារាំងជួយ ក្នុងការកសាងស្ថានីយ៍ប្រព្រឹត្តកម្មទឹកកខ្វក់មួយកន្លែងនេះ ដើម្បីទុកឱ្យអ្នកជំនាន់ក្រោយបានប្រើប្រាស់ និងដោះស្រាយនៅពេលអនាគត ទោះបីជួយជាកម្ចី ឬក៏ជាជំនួយឥតសំណងក្តី។

លោក ហ្សាក់ ប៉ឺឡេ ឯកអគ្គរដ្ឋទូតវិសាមញ្ញ និងពេញសមត្ថភាពនៃសាធារណរដ្ឋបារាំងប្រចាំកម្ពុជាបានសម្តែងនូវការកោតសរសើរយ៉ាងខ្លាំងផងដែរ ចំពោះការអភិវឌ្ឍន៍រីកចំរើនរបស់រាជធានីភ្នំពេញ ក្នុងរយៈពេលប៉ុន្មានឆ្នាំចុងក្រោយនេះ ដោយមានសំណង់ អាគារខ្ពស់ៗ ជាមួយផ្លូវខ្វាត់ខ្វែង។

ក្នុងឱកាសជំនួបពិភាក្សានេះដែរ លោក ហ្សាក់ ប៉ឺឡេ ក៏បានស្នើឱ្យរដ្ឋបាលរាជធានីភ្នំពេញធ្វើការអភិរក្សនូវបេតិកភណ្ឌចាស់ៗ ដែលនៅសេសសល់ ព្រោះវាជាការទាក់ទាញភ្ញៀវជាតិអន្តរជាតិឱ្យមកដើរកំសាន្តនៅរាជធានីភ្នំពេញ។ បន្ថែមពីនេះលោក បានលើកឡើងពីគម្រោងសិក្សាកសាងផ្លូវរថភ្លើងល្បឿនលឿននៅភ្នំពេញផងដែរ ក្រោយពីសិក្សារួច រយៈពេល១០ ឆ្នាំហើយ៕ BTVNews