អាកាសយានដ្ឋានអន្តរជាតិតេជោ ក្រុងតាខ្មៅ សម្រេចការសាងសង់បានជាង ៣៣% ហើយ

ដោយ៖ យូ វីរៈ | ថ្ងៃអង្គារ ទី១៤ ខែមិថុនា ឆ្នាំ២០២២ |

466

កណ្ដាល៖ មកដល់ពេលនេះ អាកាសយានដ្ឋានអន្តរជាតិតេជោ ក្រុងតាខ្មៅ ខេត្តកណ្ដាល សម្រេចការសាងសង់បានជាង ៣៣% ហើយគ្រោងនឹងបញ្ចប់ការសាងសង់នៅឆ្នាំ២០២៤ នេះបើតាមការបញ្ជាក់របស់ឯកឧត្ដម ម៉ៅ ហាវណ្ណាល់ រដ្ឋមន្ត្រីទទួលបន្ទុករដ្ឋលេខាធិការដ្ឋានអាកាសចរស៊ីវិល។

ការបញ្ជាក់នេះធ្វើឡើងក្នុងឱកាសដែលឯកឧត្តម ម៉ៅ ហាវណ្ណាល់ និងអ្នកវិនិយោគជាច្រើនរូបទៀត អញ្ជើញទៅទស្សនៈកិច្ចគម្រោងសាងសង់អាកាសយានដ្ឋានអន្តរជាតិតេជោ ក្រុងតាខ្មៅ ខេត្តកណ្តាល នៅថ្ងៃទី១៤ ខែមិថុនា ឆ្នាំ២០២២នេះ ។

ឯកឧត្តម ម៉ៅ ហាវណ្ណាល់ ថ្លែងថា តាមការគ្រោងទុកការសាងសង់អាកាសយានដ្ឋានអន្តរជាតិតេជោ ក្រុងតាខ្មៅ នឹងបញ្ចប់ការសាងសង់នៅ២០២៤ ហើយដាក់ឱ្យដំណើរការផ្លូវនៅដើមឆ្នាំដើម២០២៥។ ឯកឧត្តមបន្តថា ក្រោយសាងសង់រួច កម្ពុជា អាចនឹងទទួលប្រភេទយន្តហោះខ្នាតយក្ស ដឹកអ្នកដំណើរអន្តរជាតិ ឆ្លងទ្វីបមកពីប្រទេសឆ្ងាយៗ មកចុះចតនៅរាជធានីភ្នំពេញនេះ ជាពិសេសនៅពេលដែលកម្ពុជាមានកំណើនអ្នកដំណើរអន្តរជាតិ និងភ្ញៀវទេសចរអន្តរជាតិនៅឆ្នាំបន្តបន្ទាប់ខាងមុខ។

សូមជម្រាបថា អាកាសយានដ្ឋានអន្តរជាតិតេជោក្រុងតាខ្មៅ បានចាប់ផ្តើមដំណើរការសាងសង់ចាប់តាំងថ្ងៃទី៧ ខែមករា ឆ្នាំ២០២០។ អាកាសយានដ្ឋាននេះ បាននឹងកំពុងសាងសង់នៅលើទំហំប្រមាណ ២៦០០ហិកតា នៅក្នុងភូមិសាស្ត្រខេត្តកណ្តាល ជាប់ខេត្តតាកែវ និងមានចំងាយពីប្រមាណ ២០គីឡូម៉ែតពីរាជធានីភ្នំពេញ ។

សូមបញ្ជាក់ថា CAIC គឺជាក្រុមហ៊ុនបណ្តាក់ទុនរួមគ្នារវាងរាជរដ្ឋាភិបាលកម្ពុជា ដែលតំណាងដោយរដ្ឋលេខាធិការដ្ឋានអាកាសចរស៊ីវិល និងក្រុមហ៊ុន OCIC ។ រាជរដ្ឋាភិបាលកម្ពុជាបានផ្តល់សិទ្ធិឱ្យក្រុមហ៊ុនCAIC ក្នុងការកាន់កាប់ រចនា ប្លង់ សាងសង់ ធ្វើហិរញ្ញប្បទាន និងគ្រប់គ្រងប្រតិបត្តិការគម្រោង អាកាសយានដ្ឋានអន្តរជាតិតេជោក្រុងតាខ្មៅ ខេត្តកណ្តាល៕