កម្ពុជានឹងប្រារព្ធទិវា៤៥ឆ្នាំ នៃដំណើរឆ្ពោះទៅកាន់ការផ្តួលរំលំរបបប្រល័យពូជសាសន៍ ប៉ុល ពត

កម្ពុជានឹងប្រារព្ធទិវា៤៥ឆ្នាំ នៃដំណើរឆ្ពោះទៅកាន់ការផ្តួលរំលំរបបប្រល័យពូជសាសន៍ ប៉ុល ពត

ភ្នំពេញ៖ នៅសល់តែរយៈពេល ៣​ថ្ងៃទៀតប៉ុណ្ណោះ ព្រះរាជាណាចក្រកម្ពុជានឹងប្រារព្ធ​ទិវា៤៥ឆ្នាំ នៃ​ដំណើរឆ្ពោះទៅកាន់ការផ្តួលរំលំរបបប្រល័យពូជសាសន៍ ប៉ុល ពត (២០មិថុនា ឆ្នាំ១៩៧៧-២០មិថុនា ឆ្នាំ២០២២)។

ការប្រារព្ធនេះធ្វើឡើង ក្នុងស្មារតីចងចាំជានិច្ចនូវគុណូបការៈដ៏ឧត្តុងឧត្តម ចំពោះវីរភាព​ដ៏​អង់​អាច​ក្លាហាន​របស់​សមមិត្ត ហ៊ុន សែន ព្រមទាំងវីរកម្មាភិបាល វីរយុទ្ធជន យុទ្ធនារី ប្រជាជន និង​អ្នក​ស្នេហា​ជាតិ ដែលបានធ្វើមហាពលីកម្ម បូជាសាច់ស្រស់ ឈាមស្រស់ ក្នុងសមរភូមិ ដើម្បី​រំដោះ​មាតុភូមិ​ពី​កណ្ដាប់​ដៃរបបប្រល័យពូជសាសន៍ ប៉ុល ពត។

កាលពីថ្ងៃទី២០ ខែមិថុនា ឆ្នាំ១៩៧៧ ពោលគឺ៤៥ឆ្នាំមុន សម្តេចតេជោ ហ៊ុន សែន និង​សម​មិត្ត​មួយ​ចំនួន​ទៀតបាន យកជីវិតទៅប្រថុយប្រថាននឹងគ្រោះថ្នាក់បំផុត ដើម្បី​ធ្វើ​ដំណើរ​ឆ្ពោះទៅ​កាន់​ប្រទេស​វៀតណាម ក្នុងគោល​បំណង​ស្នើ​សុំ​កម្លាំង​វៀតណាម​ឲ្យ​មក​ជួយ​រំដោះ​ប្រជាពលរដ្ឋ​ខ្មែរ​រាប់​លាន​នាក់ ដែលរងទុក្ខវេទនាយ៉ាងខ្លាំងពីការកាប់សម្លាប់របស់ កងកម្លាំង ប៉ុល ពត។

ទីតាំងកោះថ្ម ឃុំទន្លូង ស្រុកមេមត់ ខេត្តត្បូងឃ្មុំ នៃបញ្ជាការដ្ឋានវរសេនាធំ ថ្ងៃទី២០ ខែមិថុនា ឆ្នាំ​១៩៧៧ សមមិត្ត ហ៊ុន សែន និងកម្មាភិបាលដ៏ទុកចិត្តបួននាក់ គឺ នុច ថន, ញឹក ហួន, ស៊ូ គីម ស្រ៊ាង (ហៅសាញ់) និង វ៉ា ប៉ោអ៊ាន បានចាប់ផ្តើមធ្វើដំណើរភៀសខ្លួនទៅវៀតណាម ដើម្បី​ស្វែង​រក​ការ​ជួយ​ឧបត្ថម្ភក្នុងការរំដោះជាតិ ចេញពីរបបប្រល័យពូជសាន៍ ប៉ុល ពត។

សូមបញ្ជាក់ថា កម្ពុជាប្រារព្ធទិវាដំណើរឆ្ពោះទៅកាន់ការផ្តួលរំលំរបបប្រល័យពូជាសាសន៍ប៉ុល ពត នេះជារៀងរាល់ថ្ងៃទី២០ ខែមិថុនា ដើម្បីក្រើនរំលឹកដល់កូនចៅខ្មែរជំនាន់ក្រោយ ឲ្យយល់ដឹក និង​ចងចាំ​នូវភាពដឹកនាំដ៏អង់អាចក្លាហានរបស់សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា ដែល​ជា​តួអង្គអ្នកដឹកនាំមួយរូប បានប្តូរជីវិតជាមួយនឹងការស្វះស្វែងរកសន្តិភាព ការសង្រ្គោះជាតិ​នៅ​ក្នុង​ភពខ្មៅងងឹត និងមហន្តរាយជូនប្រជាជាតិទាំងមូលនោះ៕