អង្គការសហប្រតិបត្តិការឥស្លាម (OIC) កោតសរសើររាជរដ្ឋាភិបាលក្នុងការធ្វើឱ្យប្រសើរឡើងនូវស្ថានការណ៍ខ្មែរឥស្លាមនៅក្នុងប្រទេសកម្ពុជា

ដោយ៖ យូ វីរៈ | ថ្ងៃចន្ទ ទី២៨ ខែកញ្ញា ឆ្នាំ២០២០ |

750

ភ្នំពេញ៖ អគ្គលេខាធិការ អង្គការសហប្រតិបត្តិឥស្លាម (OIC) បានផ្ញើសារលិខិត ជូនឯកឧត្ដមបណ្ឌិត អូស្មាន ហាស្សាន់ ទេសរដ្ឋមន្ត្រីទទួលបន្ទុកបេសកកម្មពិសេស នៃព្រះរាជាណាចក្រកកម្ពុជា បេសកជនពិសេសរបស់កម្ពុជាប្រចាំអង្គការសហប្រតិបត្តិការឥស្លាម ដោយបានសម្ដែងនូវការកោតសរសើរចំពោះកិច្ចខិតខំប្រឹងប្រែងរបស់កម្ពុជា ក្នុងការធ្វើឲ្យប្រសើរឡើងនូវស្ថានការណ៍ខ្មែរឥស្លាមក្នុងប្រទេស ក៏ដូចជាអនុញ្ញាតជូនដល់សហគមន៍ខ្មែរឥស្លាម បានប្រតិបត្តិសឡាត៍នៅតាមបណ្ដាវិហារឡើងវិញ ជាពិសេសចំពេលស្ថានការណ៍បច្ចុប្បន្នកំពុងរងផលប៉ះពាល់នៃជំងឺរាតត្បាតកូវីដ១៩។

អគ្គលេខាធិការ បានបញ្ជាក់នូវទំនាក់ទំនងមិត្តភាពល្អរវាងអង្គការសហប្រតិបត្តិការឥស្លាម(OIC) និងព្រះរាជាណាចក្រកម្ពុជា និងការបន្តកិច្ចខិតខំប្រឹងប្រែងពង្រឹងកិច្ចសន្ទនា និងកិច្ចសហប្រតិបត្តិការប្រកបដោយផ្លែផ្ការវាងភាគីទាំងពីលើគ្រប់វិស័យ ពិសេសព្រះរាជាណាចក្រកម្ពុជាកំពុងធ្វើជាគំរូដ៏ល្អប្រសើរ សម្រាប់ការអត់ឱន សន្តិសហវិជ្ជាមាន និងសមាហរណកម្មវិជ្ជមាន ដល់ខ្មែរឥស្លាមនៅក្នុងសង្គមកម្ពុជា៕