ឯកឧត្ដម ស៊ុន ចាន់ថុល៖ ក្រសួងសាធារណការប្រមូលចំណូលពីការលក់ស្លាករថយន្តពិសេសបាន៦ លានដុល្លារអាមេរិក

ដោយ៖ យូ វីរៈ | ថ្ងៃសុក្រ ទី២ ខែតុលា ឆ្នាំ២០២០ |

652

ភ្នំពេញ ៖ រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងឲ្យដឹងថា ក្នុងរយៈពេលជិត ៩ ខែ ដើមឆ្នាំ២០២០ នេះ មន្ត្រីជំនាញទទួលបន្ទុក បានលក់ស្លាកលេខរថយន្តពិសេសផ្ទាល់ខ្លួន ដោយប្រមូលចំណូលចូលថវិកាជាតិ បានចំនួនប្រមាណ៦លានដុល្លារអាមេរិក ។

ឯកឧត្តម ស៊ុន ចាន់ថុល ទេសរដ្ឋមន្ត្រី រដ្ឋមន្ត្រីក្រសួងសាធារណការ និងដឹកជញ្ជូន បានថ្លែងឲ្យដឹង នៅក្នុងពិធីបើកឲ្យដំណើរការជាផ្លូវការ ប្រព័ន្ធស្វ័យប្រវត្តិកម្មផ្ទេរកម្មសិទ្ធយានជំនិះ និងមជ្ឈមណ្ឌលសេវាសាធារណៈថ្មី នៅថ្ងៃទី ៣០ ខែកញ្ញា ឆ្នាំ២០២០ នេះថា ពាក់ព័ន្ធនិងការធ្វើស្លាកលេខរថយន្ត ក្នុងនោះ សម្រាប់ការលក់ស្លាកលេខរថយន្តពិសេស ដែលបានអនុវត្តន៍ចាប់ពីថ្ងៃទី ៧ ខែ មករា ឆ្នាំ ២០២០ មក មន្ត្រីជំនាញទទួលបន្ទុក បានលក់ស្លាកលេខឡានពិសេសផ្ទាល់ខ្លួន បានចំនួនប្រមាណជាង ២ ពាន់ស្លាកលេខ ក្នុងនោះបានប្រមូលចំណូលពីការលក់លេខរថយន្តនេះ បានចំណូលចូលថវិកា ជាតិប្រមាណ ៦ លានដុល្លារអាមេរិក ។

ឯកឧត្តម ទេសរដ្ឋមន្ត្រី បន្តថា ជុំវិញបញ្ហានេះ សម្រាប់ការផ្តល់សេវាកម្ម ប្រព័ន្ធស្វ័យប្រវត្តិកម្មនេះ គឺបានកំពុងផ្តល់សេវាឲ្យកាន់តែខិតជិតប្រជាពលរដ្ឋ ដើម្បីបង្ករលក្ខណៈងាយស្រួល និងដើម្បីជំរុញការប្រមូលចំណូលចូលថវិកាជាតិឲ្យបានកាន់តែប្រសើរឡើង ។

ពាក់ព័ន្ធចំណូលនៅក្នុងវិស័យនេះដែរ បើតាមរបាយការណ៍ស្តីពីលទ្ធផល នៃការអនុវត្តថវិកា ឆមាសទី១ ឆ្នាំ២០២០ របស់ក្រសួងសេដ្ឋកិច្ច និងហិរញ្ញវត្ថុ បានបង្ហាញថា ចំណូលសម្រាប់សេវាកម្មក្នុងវិស័យដឹកជញ្ជូន និងគមនាគមន៍ក្នុងឆ្នាំ២០២០ នេះ ត្រូវបានប៉ាន់ស្មានថា មានកំណើនថមថយក្នុងអត្រា ០,៤% ដោយសារការរំពឹងទុកនៃការធ្លាក់ចុះ នៃអនុវិស័យគាំទ្រដល់ការដឹកជញ្ជូនរួមមាន ៖ អនុវិស័យសំណង់ កាត់ដេរ សណ្ឋាគារ និងភោជនីយដ្ឋាន ជាដើម។ កំណើនថមថយនេះ ឆ្លុះបញ្ចាំងនៃការធ្លាក់ការនាំចូលរថយន្ត (គិតជាបរិមាណ) មានកំណើនអវិជ្ជមានជាង ៣០%, នៅក្នុងរយៈពេល ៦ខែ ដើមឆ្នាំ២០២០ ក្នុងនោះសម្រាប់រយៈពេលដូចគ្នាទៅឆ្នាំ ២០១៩ មានកំណើនជាង ១១% ៕

ពាក្យគន្លឹះទាក់ទង