រដ្ឋមន្ត្រី​ការបរទេស​ចិន​ នឹងអញ្ជើញមកបំពេញ​ទស្សនកិច្ច​ផ្លូវ​ការ​នៅកម្ពុជា​រយៈ​ពេល​២ថ្ងៃ​

BERLIN, GERMANY - DECEMBER 19: China's Foreign Minister Wang Yi on December 19, 2015 in Berlin, Germany. (Photo by Thomas Trutschel/Photothek via Getty Images)

ភ្នំពេញ៖ ឯកឧត្ដម  វ៉ាង​​ យី ទីប្រឹក្សារដ្ឋ​ និង​ជារដ្ឋមន្ត្រី​ការ​បរទេស​នៃ​សាធារណរដ្ឋ​ប្រជាមានិតចិន​ នឹង​អញ្ជើញ​មក​បំពេញ​ទស្សនកិច្ច​ផ្លូវ​ការ​នៅ​ព្រះរាជាណាចក្រ​កម្ពុជា​ នៅថ្ងៃទី​១១-១២ ខែតុលា​ ឆ្នាំ​២០២០។ នេះបើយោងតាម​សេចក្ដីប្រកាសព័ត៌មាន​របស់ក្រសួងការបរទេស​។

ក្នុង​អំឡុង​ពេល​ទស្សនកិច្ច​នេះ  ឯកឧត្ដម​ វ៉ាង​ យី នឹង​អញ្ជើញ​ចូលជួប​សម្ដែង​ការ​គួរសម​ចំពោះ​សម្ដេចអគ្គមហាសេនាបតីតេជោ​ ហ៊ុន​ សែន​ នាយករដ្ឋមន្ត្រី​នៃ​ព្រះរាជាណាចក្រ​កម្ពុជា  និង​ជួប​ពិភាក្សា​ការងារជាមួយ​ ឯកឧត្ដម​ ឧបនាយករដ្ឋមន្ត្រី​ ហោ ណាំហុង​។

ឯកឧត្ដម​ វ៉ាង​​​ យី នឹង​មាន​ជំនួប​ប្រជុំ​ផ្លូវ​ការ​ជាមួយ​ឯកឧត្ដម​ ឧបនាយករដ្ឋមន្ត្រី ប្រាក់​ សុខុន​ រដ្ឋមន្ត្រី​ការ​បរទេស​ និ​ងសហប្រតិបត្តិការអន្តរជាតិ​​ នៃព្រះរាជាណាចក្រ​កម្ពុជា​ ដើម្បីពិភាក្សា​លើ​កិច្ច​សហប្រតិបត្តិការ​ទ្វេភាគី ក្នុង​វិស័យ​នានា​ ព្រម​ទាំង​បញ្ហា​តំបន់​ និង​អន្តរជាតិ​ដែល​ជាប្រយោជន៍​ និ​ងកង្វល់​រួម​។

សម្ដេចតេជោ​ នាយករដ្ឋមន្ត្រី នឹង​អញ្ជើញ​ធ្វើ​ជាសាក្សី​ក្នុង​ពិធី​ចុះ​ហត្ថលេខា​លើកិច្ច​ព្រមព្រៀង​ពាណិជ្ជកម្ម​សេរី​កម្ពុជា-ចិន​ និង​ឯកសារ​សំខាន់​២ទៀ​ត​ រួមមាន លិខិត​ប្ដូរសារ​ស្ដីពី​ការសិក្សា​សមិទ្ធិលទ្ធភាព​គម្រោង​អភិវឌ្ឍន៍ហេដ្ឋារចនា​សម្ព័ន្ធ​ប្រព័ន្ធ​លូ និង​ប្រព្រឹត្ត​កម្ម​ទឹកកខ្វក់​នៅ​ខេត្តព្រះសីហនុ​។

ដំណើរ​ទស្សនកិច្ច​ផ្លូវ​ការ​រស់​ ឯកឧត្ដម​ វ៉ាង​ យី មក​កាន់​កម្ពុជា​លើក​នេះ​ នឹង​បន្ត​ពង្រឹង​បន្ថែម​​នូវ​ចំណង​មិត្ត​ភាព​ជាប្រពៃណី​ដ៏យូរលង់​ សាមគ្គី​ ភាតរភាព និង​កិច្ច​សហប្រតិបត្តិការ​ប្រកបដោយ​ផ្លែផ្ការ​វាង​កម្ពុជា និង​ចិន​ ក្នុង​បរិបទ​នៃ​បញ្ហា​ប្រឈម​​ជាសកលនៃ​ជំងឺ​កូវីដ​១៩​ ដែល​ពុំ​ធ្លាប់​មាន​ពីមុន៕