ប្រធានក្រុមមេធាវីរាជរដ្ឋាភិបាល ប្រកាសសមាសភាព ក្រុមមេធាវីស្ម័គ្រចិត្តសម្ដេចតេជោសែនថ្មីចំនួន ៧១រូបបន្ថែម

ដោយ៖ យូ វីរៈ | ថ្ងៃព្រហស្បតិ៍ ទី១៥ ខែតុលា ឆ្នាំ២០២០ |

2,162

ភ្នំពេញ៖ លោក គី តិច ប្រធានក្រុមមេធាវីរាជរដ្ឋាភិបាល និងជាប្រធានមេធាវីស្ម័គ្រចិត្តសម្តេចតេជោសែន បានចេញសេចក្តីសម្រេច ស្តីពីការកែសម្រួលសមាសភាព និងជ្រើសតាំងបន្ថែម ក្រុមមេធាវីស្ម័គ្រចិត្ត សម្តេចតេជោសែន ដោយបន្ថែមថ្មីចំនួន ៧១រូប ដែលធ្វើឲ្យសមាសភាព កើតឡើងសរុបចំនួន១៣៨រូប។ នេះបើតាមសេចក្តីសម្រេច របស់ប្រធានក្រុមមេធាវីរាជរដ្ឋាភិបាលដែលបានចេញផ្សាយនៅថ្ងៃនេះ។

នៅរសៀលថ្ងៃទី១៥ ខែតុលា ឆ្នាំ២០២០នេះ លោក គី តិច បានប្រកាសសមាសភាពសមាជិកក្រុមមេធាវីស្ម័គ្រចិត្ត សម្តេចតេជោសែន ទាំង៧១រូប ដើម្បីឆ្លើយតបនឹងតម្រូវការ ការពារស្វែងរកយុត្តិធម៌ ដល់កូនក្តីរបស់ខ្លួន ដែលជាស្ត្រីក្រីក្រ។ ពិធីប្រកាសសមាសភាព សមាជិកក្រុមមេធាវីស្ម័គ្រចិត្តសម្តេចតេជោសែនថ្មីនេះ បានធ្វើឡើងនៅទីស្តីការគណៈរដ្ឋមន្ត្រី។

សូមជំរាបថា នៅក្នុងឆ្នាំ២០១៩កន្លងមកនេះ ក្រុមមេធាវីស្ម័គ្រចិត្តសម្តេចតេជោសែន បានជួបសម្ភាសន៍ និងសេវាផ្តល់យោបល់ផ្នែកច្បាប់ ជូនដល់ស្ត្រីក្រីក្ររងគ្រោះ ខ្វះការការពារសិទ្ធិតាមផ្លូវច្បាប់ នៅតាមបណ្តាខេត្ត-ក្រុង សរុបមានចំនួន ១,៩៣២ករណី។ នៅក្នុងឆ្នាំ២០១៩ សំណុំរឿងទាំង ១,៩៣២ករណី ត្រូវបានក្រុមមេធាវីស្ម័គ្រចិត្តសម្តេចតេជោសែន បានសម្រេចទទួលយកការពារតាមនីតិវិធី ចំនួន ៥២ករណី ហើយក្នុងចំណោមសំណុំរឿងទាំង ៥២ករណី ក្រុមមេធាវីបានចាត់ការតាមនីតិវិធី បានចំនួន ២៤ករណី។

គោលបំណងចម្បង ដែលសម្តេចតេជោសែន បង្កើតក្រុមមេធាវីស្ម័គ្រចិត្តនេះឡើង គឺសម្តេចបានគិតគូយ៉ាងល្អិតល្អន់ ក្នុងគោលដៅជួយដល់ស្ត្រី ដែលមានជីវភាពក្រីក្រ ជាពិសេសដែលត្រូវបានបាត់បង់សិទ្ធិ ពុំមានការការពារតាមផ្លូវច្បាប់។ ក្នុងនោះចំពោះទណ្ឌិតដែលកំពុងជាប់ឃុំក្នុងពន្ធនាគារ និងជនត្រូវចោទ ដែលបានឃុំខ្លួនបណ្តោះអាសន្ន នៅក្នុងពន្ធនាគារ ក៏ត្រូវបានគិតគូរយ៉ាងយកចិត្តទុកដាក់ផងដែរ៕ ប្រភព៖ FreshNews