មនុស្សចំនួន ២៥នាក់បានស្លាប់ដោយជំនន់ទឹកភ្លៀង ខណៈមនុស្សជាង ៣សែននាក់រងផលប៉ះពាល់

ដោយ៖ យូ វីរៈ | ថ្ងៃចន្ទ ទី១៩ ខែតុលា ឆ្នាំ២០២០ |

739

ភ្នំពេញ៖ ជំនន់ទឹកភ្លៀងបានបណ្ដាលឲ្យមនុស្សចំនួន ២៥នាក់បានស្លាប់ដោយជំនន់ទឹកភ្លៀង ក្នុងនោះ៖ ខេត្តបន្ទាយមានជ័យ ១៥នាក់, ខេត្តព្រះសីហនុ ២នាក់, ខេត្តពោធិ៍សាត់ ៣នាក់, ខេត្តប៉ៃលិន ១នាក់ និងខេត្តកំពង់ធំ ៤នាក់។

យោងតាមរបាយការណ៍របស់គណៈកម្មាធិការគ្រប់គ្រងគ្រោះមហន្តរាយ បានបង្ហាញឲ្យដឹងថា ចាប់តាំងពីថ្ងៃទី០១ ដល់ព្រឹកថ្ងៃទី១៩ ខែតុលានេះ ទឹកជំនន់បានវាយលុកខេត្តចំនួន១៩ រួមមាន៖ ខេត្តពោធិ៍សាត់ បាត់ដំបង បន្ទាយមានជ័យ ប៉ៃលិន កំពង់ធំ ព្រះសីហនុ ព្រះវិហារ មណ្ឌលគិរី កំពង់ធំ កំពង់ចាម កំពង់ស្ពឺ ឧត្តរមានជ័យ សៀមរាប តាកែវ កណ្តាល ស្ទឹងត្រែង កំពង់ឆ្នាំង កោះកុង និងរាជធានីភ្នំពេញ។

របាយការណ៍បានបញ្ជាក់ទៀតថា មនុស្សជាង ៣សែននាក់ បានរងផលប៉ះពាល់ ក្នុងនោះ២៥នាក់បានស្លាប់ និងមនុស្សចំនួនជាង៣ម៉ឺននាក់ ត្រូវបានជម្លៀសទៅកាន់ទីទួលសុវត្ថិភាព ។ ផ្ទះសម្បែងប្រជាពលរដ្ឋជាង៧ម៉ឺនខ្នង សាលារៀនជាង ៥រយកន្លែង, ផ្លូវជាតិ ផ្លូវខេត្ត និងផ្លូវជនបទ ជិត២ពាន់គីឡូម៉ែត្ររងផលប៉ះពាល់ រួមទាំងប្រឡាយមេ ប្រឡាយរង និងប្រឡាយស្រោចស្របរាប់រយគីឡូម៉ែត្រទៀត។ រីឯដំណាំស្រូវ ចំនួនជាង២សែនហិកតា និងដំណាំរួមផ្សំ ចំនួនជិត៨ម៉ឺនហិកតា ក៏រងផលប៉ះពាល់ផងដែរ៕