ប្រមុខការទូតកម្ពុជា នឹងអញ្ជើញចូលរួមកិច្ចប្រជុំរដ្ឋមន្ត្រីការបរទេសអាស៊ាន-អង្គការសហប្រជាជាតិ តាមប្រព័ន្ធវីដេអូ

ដោយ៖ យូ វីរៈ | ថ្ងៃអង្គារ ទី២០ ខែតុលា ឆ្នាំ២០២០ |

744

ភ្នំពេញ៖ ប្រមុខការទូតកម្ពុជា ឯកឧត្ដម ប្រាក់ សុខុន នឹងអញ្ជើញចូលរួមកិច្ចប្រជុំរដ្ឋមន្ត្រីការបរទេសអាស៊ាន-អង្គការសហប្រជាជាតិ នៅថ្ងៃទី២១ ខែតុលា ឆ្នាំ២០២០ ជាមួយនឹងរដ្ឋមន្រ្តីការបរទេសអាស៊ានដទៃទៀត, អគ្គលេខាធិការអង្គការសហប្រជាជាតិ និងប្រធានសម័យប្រជុំលើកទី៧៥ នៃមហាសន្និបាតអង្គការសហប្រជាជាតិ តាមប្រព័ន្ធវីដេអូ។ នេះបើយោងតាមសេចក្ដីប្រកាសព័ត៌មានរបស់ក្រសួងការបរទេស។

ការអញ្ជើញចូលរួមរបស់ឯកឧត្ដម ប្រាក់ សុខុន ឧបនាយករដ្ឋមន្ត្រី រដ្ឋមន្ត្រីការបរទេស និងសហប្រតិបត្តិការអន្តរជាតិ នៃព្រះរាជាណាចក្រកម្ពុជា បានធ្វើឡើងតបតាមការអញ្ជើញរបស់ ឯកឧត្ដម ផាម ប៊ិញមិញ ឧបនាយករដ្ឋមន្ត្រីរដ្ឋមន្ត្រីការបរទេសនៃសាធារណរដ្ឋសង្គមនិយមវៀតណាម ។

កិច្ចប្រជុំនេះ នឹងពិនិត្យមើលឡើងវិញនូវកិច្ចសហប្រតិបត្តិការអាស៊ាន-អង្គការសហប្រជាជាតិ រួមមាន ការអនុវត្តសេចក្តីថ្លែងការរួមស្តីពីភាពជាដៃគូគ្រប់ជ្រុងជ្រោយរវាងអាស៊ាន និងអង្គការសហប្រជាជាតិ។ កិច្ចប្រជុំនេះ នឹងមានការផ្លាស់ប្តូរយោបល់គ្នាទៅវិញទៅមកផងដែរ ក្នុងការស្វែងរកវិធីពង្រឹង និងពង្រីកបន្ថែមទៀតនូវកិច្ចសហប្រតិបត្តិការរវាងអាស៊ាន និងអង្គការសហប្រជាជាតិ ដោយសារតែវិបត្តិសុខភាពសកលដែលបង្កឡើងដោយជំងឺកូវីដ-១៩។

គួរកត់សម្គាល់ថា កិច្ចប្រជុំ AUMM នេះ ត្រូវបានរៀបចំឡើងជាទៀតទាត់ ស្របពេលសម័យប្រជុំនៃមហាសន្និបាតអង្គការសហប្រជាជាតិ។ នៅក្នុងឆ្នាំនេះ កិច្ចប្រជុំ AUMM ត្រូវបានរំពឹងថា នឹងរំលេចលើកិច្ចពិភាក្សាអំពីបញ្ហាតំបន់ និងសកលមួយចំនួន ដែលឆ្លុះបញ្ចាំងនឹងមូលបទនៃសម័យប្រជុំលើកទី៧៥ នៃមហាសន្និបាតអង្គការសហប្រជាជាតិ «អនាគតដែលយើងទាំងអស់គ្នាចង់បាន សហប្រជាជាតិដែលយើងត្រូវការ៖ ធានាឡើងវិញកិច្ចប្រឹងប្រែងរួមដើម្បីពហុភាគីនិយម – ប្រឈមនឹងជំងឺកូវីដ-១៩ តាមរយៈសកម្មភាពពហុភាគីដែលមានប្រសិទ្ធភាព» ៕