រដ្ឋាភិបាលទីក្រុងប៉េកាំង ប្រកាសដាក់ទណ្ឌកម្មលើក្រុមហ៊ុនអាមេរិកបី ដែលលក់អាវុធឲ្យតៃវ៉ាន់

ដោយ៖ យូ វីរៈ | ថ្ងៃអង្គារ ទី២៧ ខែតុលា ឆ្នាំ២០២០ |

686

ចិន៖ អ្នកនាំពាក្យក្រសួងការបរទេសចិន លោក Zhao Lijian បានលើកឡើងថា រដ្ឋាភិបាលទីក្រុងប៉េកាំង បានសម្រេចដាក់ទណ្ឌកម្មលើក្រុមហ៊ុនលក់អាវុធ និងបច្ចេកវិទ្យារបស់អាមេរិកចំនួនបី ដែលបានលក់អាវុធឲ្យកោះតៃវ៉ាន់នាពេលថ្មីៗនេះ។

ក្រសួងការបរទេសអាមេរិក នៅថ្ងៃទី២២ ខែតុលា បានអនុញ្ញាតជាផ្លូវការក្នុងការលក់អាវុធឲ្យតៃវ៉ាន់ ក្នុងតម្លៃប្រមាណ ១,៨ពាន់លានដុល្លារ។ អាវុធប្រភេទនោះមានដូចជា ឧបករណ៍សម្រាប់ផ្តល់សញ្ញា (Sensor), មីស៊ីល និងរថយន្តបាញ់គ្រប់រ៉ុក្កែតជាដើម។ បន្ទាប់ពីសេចក្តីប្រកាសខាងលើ ចិនបានចេញមកព្រមានអាមេរិកឲ្យលុបចោលការលក់អាវុធ និងព្រមានចាត់វិធានការឲ្យសមស្របបំផុត។

ប៉ុន្មានថ្ងៃបន្ទាប់ ពោលគឺថ្ងៃទី២៦ ខែតុលា ក្រសួងការបរទេសចិន ប្រកាសពីចំណាត់ការលើអាមេរិក ដែលបានលក់អាវុធឲ្យតៃវ៉ាន់។ ថ្លែងនៅក្នុងសន្និសីទសារព័ត៌មាន លោក Zhao Lijian អ្នកនាំពាក្យក្រសួងការបរទេសចិន បានលើកឡើងយ៉ាងដូច្នេះថា៖ «ដើម្បីការពារផលប្រយោជន៍ជាតិចិន រដ្ឋាភិបាលសម្រេចចាត់វិធានការដ៏សំខាន់បំផុត ដើម្បីដាក់ទណ្ឌកម្មលើក្រុមហ៊ុនអាមេរិក ដែលចូលរួមលក់អាវុធឲ្យតៃវ៉ាន់»។

បើតាមក្រសួងការបរទេសចិន ក្រុមហ៊ុនអាមេរិកទាំងនោះរួមមានក្រុមហ៊ុន Lockheed Martin, ក្រុមហ៊ុន Boeing Defense និង ក្រុមហ៊ុន Raytheon។ ការដាក់ទណ្ឌកម្មនេះ គឺផ្អែកលើកំណត់ត្រាដ៏ច្រើនលើសលុប ដែលក្រុមហ៊ុនបានលក់អាវុធឲ្យតៃវ៉ាន់។ យ៉ាងណាក៏ដោយ អ្នកនាំពាក្យក្រសួងការបរទេសចិន មិនបានបញ្ជាក់ពីទំហំកំណត់ត្រា ឬព័ត៌មានលម្អិតនៃទណ្ឌកម្មដែរ។ នេះបើតាមការចុះផ្សាយរបស់ទូរទស្សន៍ចិន CGTN។

នេះមិនមែនជាលើកទី១ទេ ដែលទីក្រុងប៉េកាំងប្រកាសដាក់ទណ្ឌកម្មលើក្រុមហ៊ុនអាមេរិក ដែលបានលក់អាវុធឲ្យតៃវ៉ាន់។ នៅក្នុងខែកក្កដាកន្លងទៅ ក្រសួងការបរទេសចិន ក៏បានប្រកាសដាក់ទណ្ឌកម្មលើក្រុមហ៊ុន Lockheed Martin ដែរ បន្ទាប់ពីអាមេរិកយល់ព្រមលក់គ្រឿងបង្គុំខែលការពារមីស៊ីល Patriot ឲ្យតៃវ៉ាន់ ក្នុងតម្លៃ ៦២០លានដុល្លារ៕ ប្រភព៖ ថ្មី ថ្មី

អត្ថបទទាក់ទង