មន្ត្រីទ័ពមួកខៀវម្នាក់ ទើបមកពីស៊ូដង់ខាងត្បូង ធ្វើតេស្តវិជ្ជមានវីរុសកូវីដ១៩

ដោយ៖ យូ វីរៈ | ថ្ងៃសុក្រ ទី៣០ ខែតុលា ឆ្នាំ២០២០ |

675

ភ្នំពេញ៖ នៅព្រឹកថ្ងៃទី ៣០ ខែតុលា ឆ្នាំ២០២០នេះ ក្រសួងសុខាភិបាល បានប្រកាសរកឃើញវិជ្ជមានវីរុសកូវីដ១៩ថ្មី ១នាក់ លើបុរសជនជាតិខ្មែរ ជាមន្ត្រីផ្នែកប្រតិបត្តិការរបស់អង្គការសហប្រជាជាតិប្រចាំបេសកកម្មនៅប្រទេសស៊ូដង់ខាងត្បូង ដែលទើបមកដល់កម្ពុជាថ្មីៗនេះ។

ក្រសួងសុខាភិបាលបានឲ្យដឹងថា បុរសជនជាតិខ្មែរ អាយុ ៥១ឆ្នាំមានអាសយដ្ឋានស្នាក់នៅខណ្ឌទួលគោក រាជធានីភ្នំពេញ ជាមន្ត្រីផ្នែកប្រតិបត្តិការរបស់អង្គការសហប្រជាជាតិប្រចាំបេសកកម្មនៅស៊ូដង់ខាងត្បូង បានធ្វើដំណើរមកពីប្រទេសស៊ូដង់ខាងត្បូង បន្តជើងហោះហើរនៅប្រទេសគុយបា មកបន្តជើងហោះហើរនៅប្រទេសអេត្យូពី រួចបានបន្តជើងហោះហើរនៅប្រទេសកូរ៉េខាងត្បូង មកដល់កម្ពុជានៅថ្ងៃទី២៨ ខែតុលា ឆ្នាំ២០២០។ បន្ទាប់ពីបានធ្វើតេស្តលើវត្ថុសំណាកដោយវិទ្យាស្ថានប៉ាស្ទ័រកម្ពុជា រាជធានីភ្នំពេញ បានឃើញថាមានវិជ្ជមានវីរុសកូវីដ១៩ ហើយបច្ចុប្បន្ន អ្នកជំងឺត្រូវបានដាក់ឲ្យសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត។

កត់សម្គាល់ថា អ្នកដំណើរតាមយន្តហោះជាមួយអ្នកជំងឺខាងលើសរុបមានចំនួន ៨៧នាក់ ក្នុងនោះមានអ្នកជំងឺខាងលើនេះផងដែរ។ ឯអ្នកដំណើរចំនួន ៨៦នាក់ទៀតដែលមានលទ្ធផលតេស្តអវិជ្ជមានវីរុសកូវីដ១៩ នោះត្រូវបានដាក់ឲ្យធ្វើ ចត្តាឡីស័ក ១៤ថ្ងៃនៅវិទ្យាល័យពោចិនតុងនិងសណ្ឋាគារមួយចំនួន ក្នុងរាជធានីភ្នំពេញ។

ក្រសួងសុខាភិបាល បានប្រកាសថា មកដល់ម៉ោង ៧ព្រឹក ថ្ងៃទី៣០ ខែតុលា ឆ្នាំ២០២០ មានអ្នកឆ្លងជំងឺកូវីដ១៩ សរុបចំនួន ២៩១ នាក់ ក្នុងនោះព្យាបាលជាសះស្បើយចំនួន ២៨៣នាក់ និង៨នាក់ កំពុងសម្រាកព្យាបាលនៅមន្ទីរពេទ្យមិត្តភាពខ្មែរ-សូវៀត ក្នុងរាជធានីភ្នំពេញ ៕