នាយឧត្តមសេនីយ៍ សៅ សុខា អញ្ជើញសួរសុខទុក្ខនាយទាហាន ចូលនិវត្តន៍ និងគ្រួសារអាវុធហត្ថពលីមរណៈ នៅខេត្តឧត្ដរមានជ័យ

ដោយ៖ យូ វីរៈ | ថ្ងៃអាទិត្យ ទី១ ខែវិច្ឆិកា ឆ្នាំ២០២០ |

1,021

ឧត្ដរមានជ័យ៖ នាថ្ងៃទី០១ ខែវិច្ឆិកា ឆ្នាំ២០២០ ឯកឧត្ដម នាយឧត្តមសេនីយ៍ សៅ សុខា អគ្គមេបញ្ជាការរងកងយោធពលខេមរភូមិន្ទ និងជាមេបញ្ជាការកងរាជអាវុធហត្ថលើផ្ទៃប្រទេស បានអញ្ជើញចុះសំណេះសំពាលសាកសួរសុខទុក្ខ នាយទាហាន នាយទាហានរង ចូលនិវត្តន៍ និងគ្រួសារអាវុធហត្ថពលី មរណៈ សរុបចំនួន ៤៦នាក់ ក្នុង១នាក់ឧបត្ថម្ភថវិកា ៥០ម៉ឺនរៀល។ នាយ នាយរង និងពលអាវុធហត្ថខេត្តចំនួន ១៦៦នាក់ ក្នុង១នាក់ ឧបត្ថម្ភថវិកា ១០ម៉ឺនរៀល។

ក្រៅពីនោះ បានឧបត្ថម្ភថវិកាសម្រាប់សាងសង់ផ្ទះដល់អតីតយុទ្ធជនចំនួន ២៨គ្រួសារ ក្នុងខេត្តឧត្តរមានជ័យសរុបថវិកាចំនួន ២៨០លានរៀល ជូនដល់បញ្ជាការដ្ឋានយោធភូមិភាគទី៣ ទី៤ ទី៥ កងពលធំលេខ២ លេខ៣ កងពលតូចអន្តរាគមន៍លេខ៤១ លេខ៤២ លេខ៥១ តំបន់ប្រតិបត្តិការសិករងខេត្ត ស្នងការដ្ឋាននគរបាលខេត្ត បញ្ជាការដ្ឋានកងរាជអាវុធហត្ថខេត្ត ក្នុង១អង្គភាពចំនួន៤០លានរៀល ព្រមទាំងឧបត្ថម្ភថវិកា១៣២សែនរៀល ជូនដល់ពេទ្យចំនួន១៣២នាក់ប្រយុទ្ធប្រឆាំងជំងឺឆ្លងកូវីដ១៩។

ក្នុងពិធីនេះ ឯកឧត្ដម នាយឧត្តមសេនីយ៍ សៅ សុខា បានកៀរគរថវិកាពីសប្បុរសជន ចំណាយក្នុងការឧបត្ថម្ភសរុបចំនួនប្រមាណ៧៧៨លានរៀល។

កាយវិការ និងការដឹកនាំរបស់ឯកឧត្ដម នាយឧត្តមសេនីយ៍ សៅ សុខា បង្ហាញឱ្យឃើញអំពីការយកចិត្តទុកដាក់ដល់សុខទុក្ខ ជីវភាពរស់នៅរបស់បងប្អូននិវត្តន៍ជន ពិការ គ្រួសារអាវុធហត្ថពលី មរណៈ និងអង្គភាពទ័ពផងដែរ។

មានប្រសាសន៍ក្នុងពិធីនេះ ឯកឧត្ដម នាយឧត្តមសេនីយ៍ សៅ សុខា ក៏បានពាំនាំបណ្ដាំសួរសុខទុក្ខ ពីសំណាក់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា និងសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុនសែន ប្រធានកាកបាទក្រហមកម្ពុជា។

ក្នុងឱកាសនោះ ឯកឧត្ដម នាយឧត្តមសេនីយ៍ បានកោតសរសើរចំពោះការដឹកនាំ ការសាមគ្គី ការមានវិន័យ ជាគំរូ និងការអនុវត្តតួនាទី ភារកិច្ច របស់កងរាជអាវុធហត្ថខេត្តឧត្តរមានជ័យ ទទួលបានលទ្ធផលល្អ៕