ថ្ងៃធ្វើតេស្តលើកទី២ រកវីរុសកូវីដ១៩ ចំពោះអ្នកប៉ះពាល់ផ្ទាល់ និងប្រយោលជាមួយប្រតិភូការបរទេសហុងគ្រី

ដោយ៖ យូ វីរៈ | ថ្ងៃចន្ទ ទី៩ ខែវិច្ឆិកា ឆ្នាំ២០២០ |

404

ភ្នំពេញ៖ តាមការណែនាំរបស់ក្រសួងសុខាភិបាល នៅថ្ងៃទី៩ ខែវិច្ឆិកា ឆ្នាំ២០២០នេះ គឺជាថ្ងៃធ្វើតេស្តលើកទី២ ចំពោះអ្នកដែលបានប៉ះពាល់ដោយផ្ទាល់ និងប្រយោលជាមួយរដ្ឋមន្ត្រីការបរទេស និងពាណិជ្ជកម្មហុងគ្រី ដើម្បីរកវីរុសកូវីដ១៩។

សម្ដេចតេជោ ហ៊ុន សែន នាយករដ្ឋមន្ត្រីនៃកម្ពុជា ព្រមទាំងរដ្ឋមន្ត្រី និងអ្នកប៉ះពាល់ផ្ទាល់ និងប្រយោលជាមួយលោក ភីតធើ ស៊ីចាតូ រដ្ឋមន្ត្រីការបរទេស និងពាណិជ្ជកម្មហុងគ្រី និងប្រតិភូ សរុបជា៩០០នាក់ ត្រូវធ្វើតេស្តជាលើកទី២ នៅថ្ងៃនេះ ដើម្បីរកវីរុសកូវីដ១៩។

ទីតាំងធ្វើតេស្ត គឺត្រូវបានរៀបចំនៅទៅស្ដីការគណៈរដ្ឋមន្ត្រី និងសណ្ឋាគារសុខា សម្រាប់មន្ត្រីរាជការ និងអ្នកសារព័ត៌មាន ដោយឡែកសម្រាប់សម្ដេចតេជោនាយករដ្ឋមន្ត្រី រដ្ឋមន្ត្រី និងមន្ត្រីជាន់ខ្ពស់មួយចំនួនទៀត ត្រូវបានធ្វើតេស្តនៅតាមទីតាំងធ្វើចត្តាឡីស័កនៅគេហដ្ឋាន។

សូមរំលឹកថា កាលពីថ្ងៃទី០៣ ខែវិច្ឆិកា ឆ្នាំ២០២០កន្លងទៅនេះ រដ្ឋមន្ត្រីការបរទេស និងពាណិជ្ជកម្មហុងគ្រី លោក ភីតធើ ស៊ីចាតូ និងប្រតិភូរបស់លោក បានអញ្ជើញមកបំពេញទស្សនកិច្ចមួយថ្ងៃនៅក្នុងប្រទេសកម្ពុជា។ បន្ទាប់ពីបញ្ចប់ដំណើរទស្សនកិច្ចនៅកម្ពុជាលោកក៏បានបន្តទស្សនកិច្ចនៅប្រទេសថៃ ហើយពេលទៅដល់ប្រទេសថៃ លោកត្រូវបានរកឃើញថាមានវីរុសកូវីដ១៩។

សូមបញ្ជាក់ថា រហូតមកដល់ពេលនេះ មានអ្នកប៉ះពាល់ដោយផ្ទាល់ និងប្រយោលជាមួយរដ្ឋមន្ត្រីការបរទេសហុងគ្រីសរុបជាង ៩០០នាក់ ដែលបានធ្វើតេស្តរកវីរុសកូវីដ១៩ ក្នុងនោះមានវិជ្ជមានម្នាក់ ជាអង្គរក្សខ្មែរការពាររដ្ឋមន្ត្រីហុងគ្រី ។ សម្រាប់ការធ្វើតេស្តរកវីរុសកូវីដ១៩នេះ នឹងត្រូវធ្វើចំនួន២លើកទៀត គឺថ្ងៃទី១៤ និងថ្ងៃទី១៨ ខែវិច្ឆិកា ឆ្នាំ២០២០៕

អត្ថបទទាក់ទង