គ្រឹះស្ថានសិក្សានៅភ្នំពេញ និងខេត្តកណ្ដាលចាប់ផ្ដើមដំណើរឡើងវិញហើយនៅថ្ងៃនេះ

ដោយ៖ យូ វីរៈ | ថ្ងៃចន្ទ ទី២៣ ខែវិច្ឆិកា ឆ្នាំ២០២០ |

535

ភ្នំពេញ៖ នៅព្រឹកថ្ងៃទី២៣ ខែវិច្ឆិកា ឆ្នាំ២០២០នេះ គឺជាថ្ងៃកំណត់ឲ្យបើកឡើងវិញនូវគ្រឹះស្ថានសិក្សារដ្ឋ និងឯកជន នៅរាជធានីភ្នំពេញ និងខេត្តកណ្ដាល បន្ទាប់ពីបានផ្អាកអស់រយៈពេល២សប្ដាហ៍ ដើម្បីធ្វើតេស្តរកវីរុសកូវីដ១៩ ចំពោះអ្នកដែលបានពាក់ព័ន្ធដោយផ្ទាល់ និងប្រយោល ក្នុងព្រឹត្តិការណ៍ ៣វិច្ឆិកា។

បន្ទាប់ពីសម្ដេចតេជោ ហ៊ុន សែន ប្រមុខរាជរដ្ឋាភិបាលកម្ពុជាបានប្រកាសបញ្ចប់ព្រឹត្តិការណ៍ ៣វិច្ឆិការួមមក ក្រសួងអប់រំ យុវជន និងកីឡា ក៏បានសម្រេចប្រកាសបើកគ្រឹះស្ថានសិក្សាទាំងរដ្ឋ និងឯកជន ឡើងវិញនៅថ្ងៃទី២៣វិច្ឆិកានេះ ដោយត្រូវបន្តអនុវត្តវិធានការអនាម័យ ដោយការពាក់ម៉ាស លាងដៃនឹងអាកុល និងរក្សាគម្លាតសុវត្ថិភាពបុគ្គល និងសង្គម ឲ្យបានត្រឹមត្រឹមតាមការណែនាំរបស់ក្រសួងសុខាភិបាល។

ឯកឧត្ដម ហង់ជួន ណារ៉ុន រដ្ឋមន្ត្រីក្រសួងអប់រំ យុវជន និងកីឡា កាលពីថ្ងៃទី១៩វិច្ឆិកា បានថ្លែងអំពាវនាវដល់គ្រឹះស្ថានសិក្សាទាំងអស់នូវទូទាំងប្រទេសត្រូវបន្តអនុវត្តគោលការណ៍ស្ដង់ដារសិក្សា (SOP) និងអនាម័យនៅតាមគ្រឹះស្ថានសិក្សា ដើម្បីបង្ការការពារការឆ្លងរីករាលដាលនៃជំងឺកូវីដ១៩ ចូលក្នុងសហគមន៍។

សិស្សានុសិស្សក៏បានបង្ហាញពីការរីករាយដែលបានចូលរៀនឡើងវិញ និងខិតខំរៀនសូត្រត្រៀមប្រឡង។ ពួកគេបន្តថា ពួកគេនឹងប្តេជ្ញាចិត្តអនុវត្តតាមការណែនាំរបស់ក្រសួងពាក់ព័ន្ធ ដើម្បីរួមគ្នាទប់ស្កាត់ជំងឺកូវីដ-១៩ ដូចជាពាក់ម៉ាស វាស់កំដៅ បាញ់អាកុល និងរក្សាគម្លាតជាប្រចាំផងដែរ ពិសេសគឺពួកគេនឹងខំរៀនដើម្បីប្រឡងឱ្យជាប់។

សូមជំរាបជូនផងដែរថា ក្រសួងអប់រំបានប្រកាសថានឹងរៀបចំការប្រឡងសញ្ញាបត្របឋមភូមិ(ឌីប្លូម) នៅថ្ងៃទី៣០ ខែវិច្ឆិកា ឆ្នាំ២០២០ និងការប្រឡងសញ្ញាបត្រមធ្យមសិក្សាទុតិយភូមិ(បាក់ឌុប) នៅថ្ងៃទី២១ ខែធ្នូ ឆ្នាំ២០២០ ដោយមានមានការលើកពេលនោះទេ។

គួរបញ្ជាក់ថា កម្ពុជាបានផ្អាកដំណើរការសិក្សានៅរាជធានីភ្នំពេញ និងខេត្តកណ្តាលចំនួន២សប្តាហ៍ ដោយសារព្រឹត្តិការណ៍៣វិច្ឆិកា ហើយនៅពេលព្រឹត្តិការនេះត្រូវបានបញ្ចប់ ដោយសារវិធានការទប់ស្កាត់របស់រាជរដ្ឋាភិបាល។ គិតត្រឹមម៉ោង៧ព្រឹកថ្ងៃទី២៣ ខែវិច្ឆិកា ឆ្នាំ២០២០ កម្ពុជាមានអ្នកជំងឺកូវីដ១៩ សរុបចំនួន ៣០៦នាក់ ក្នុងនោះអ្នកដែលបានព្យាបាលជាសះស្បើយចំនួន ២៩៥នាក់ អ្នកកំពុងសម្រាកព្យាលចំនួន ១១នាក់ និងមិនមានករណីស្លាប់ទេ៕

អត្ថបទទាក់ទង