ក្រសួងសុខាភិបាល បិទសណ្ឋាគារភ្នំពេញបណ្ដោះអាសន្ន ក្រោយដឹងថាអ្នកមានវីរុសកូវីដម្នាក់ទៅហាត់ប្រាណនៅទីនោះ

ដោយ៖ យូ វីរៈ | ថ្ងៃអាទិត្យ ទី២៩ ខែវិច្ឆិកា ឆ្នាំ២០២០ |

673

ក្រសួងសុខាភិបាល បិទសណ្ឋាគារភ្នំពេញបណ្ដោះអាសន្ន ក្រោយដឹងថាអ្នកមានវីរុសកូវីដម្នាក់ទៅហាត់ប្រាណនៅទីនោះ

SONY DSC

ភ្នំពេញ៖ ក្រសួងសុខាភិបាលនៅថ្ងៃទី២៩ ខែវិច្ឆិកា ឆ្នាំ២០២០នេះ បានសម្រេចបិទសណ្ឋាគារភ្នំពេញបណ្ដោះអាសន្ន ក្រោយដឹងថាមានអ្នកផ្ទុកវីរុសកូវីដ១៩ ដែលទើបរកឃើញថ្មីម្នាក់ គឺឯកឧត្ដម ឆែម សាវុធ អគ្គនាយកពន្ធនាគារ បានទៅហាត់ប្រាណ និងហែលទឹកនៅទីនោះ។

តាមការស្រាវជ្រាវ កាលថ្ងៃទី២៣ ខែវិច្ឆិកា ឆ្នាំ២០២០ ឯកឧត្ដម ឆែម សាវុធ បានទៅហាត់ប្រាណ និងហែលទឹកនៅសណ្ឋាគារភ្នំពេញ ដូច្នេះក្រសួងសុខាភិបាល ទទួលបានការឯកភាពពីសម្ដេចតេជោនាយករដ្ឋមន្ត្រី ក្នុងការបិទសណ្ឋាគារនេះរយៈពេល ២ថ្ងៃដើម្បីស្រាវជ្រាវរកអ្នកដែលបានប៉ះពាល់ដោយផ្ទាល់ និងប្រយោល យកសំណាកមកធ្វើតេស្តរកវីរុសកូវីដ១៩។

ក្រសួងសុខាភិបាលបានសម្រេចកំណត់ចំនួននៃការធ្វើសេត្តរកវីរុសកូវីដ១៩ ចំនួន៣លើក លើអ្នកប៉ះពាល់ដោយផ្ទាល់ និងប្រយោលជាមួយក្រុមគ្រួសារ ឯកឧត្ដម ឆែម សាវុធ អគ្គនាយកពន្ធនាគារ នៃក្រសួងមហាផ្ទៃ។

ការធ្វើតេស្តលើកទី១ គឺធ្វើឡើងនៅថ្ងៃទី២៩ ខែវិច្ឆិកា ឆ្នាំ២០២០, លើកទី២ ធ្វើនៅថ្ងៃទី៨ ខែធ្នូ ឆ្នាំ២០២០ និងលើកទី៣ នៅថ្ងៃទី១២ ខែធ្នូ ឆ្នាំ២០២០ ទៅតាមទីតាំងដែលបានកំណត់ ទាំងក្នុងនៅរាជធានីភ្នំពេញ និងតាមបណ្តាខេត្ត។

សូមជម្រាបថា នៅព្រឹកថ្ងៃទី២៩ ខែវិច្ឆិកា ឆ្នាំ២០២០នេះ ក្រសួងសុខាភិបាលបានអំពាវនាវ ដល់អ្នកដែលពាក់ព័ន្ធដោយផ្ទាល់ និងប្រយោលជាមួយក្រុមគ្រួសារលោក ឆែម សាវុធ អគ្គនាយកពន្ធនាគារ សូមអញ្ជើញមកធ្វើតេស្តរកកូវីដ១៩ នៅផ្សារទំនើបអ៊ីអន១ សម្រាប់ប្រជាពលរដ្ឋធម្មតា និងនៅទីស្តីការក្រសួងមហាផ្ទៃ សម្រាប់មន្ត្រីរាជការ៕

អត្ថបទទាក់ទង