សម្ដេចតេជោ ហ៊ុន សែន ផ្ញើលិខិតអរគុណក្រុមហ៊ុនអាកាសចរណ៍ Cambodia Airway ផ្ដល់យន្តហោះ២គ្រឿងដឹកម៉ាស និងបរិក្ខារមួយចំនួនទៅទីម័រឡេស្ត

ដោយ៖ យូ វីរៈ | ថ្ងៃពុធ ទី២ ខែធ្នូ ឆ្នាំ២០២០ |

1,353

ភ្នំពេញ៖ នៅថ្ងៃទី០២ ខែធ្នូ ឆ្នាំ២០២០ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រី នៃព្រះរាជាណាចក្រកម្ពុជា បានផ្ញើលិខិតមួយច្បាប់ថ្លែងអំណរគុណក្រុមហ៊ុនអាកាសចរណ៍ «ខេមបូឌា អ៊ែរវ៉េ (Cambodia Airway)» ដែលបានផ្តល់យន្តហោះ២គ្រឿង ដឹកម៉ាស និងបរិក្ខារពេទ្យប្រយុទ្ធប្រឆាំងជំងឺកូវីដ១៩ ទៅកាន់ប្រទេសទីម័រឡេស្ត។

ក្នុងលិខិតនោះសម្តេចតេជោ ហ៊ុន សែន បានមានប្រសាសន៍ថា «រាជរដ្ឋាភិបាលកម្ពុជា សូមថ្លែងអំណរគុណ និងកោតសរសើរដោយស្មោះចំពោះក្រុមហ៊ុនអាកាសចរណ៍ខេមបូឌា អ៊ែរវ៉េ ដែលបានជួយឧបត្ថម្ភការហោះហើរជាមនុស្សធម៌ជាលើកទី២ ដឹកជញ្ជូនម៉ាសចំនួន ១លាន៥ម៉ឺន និងបរិក្ខារពេទ្យសរុបចំនួន ១២មុខ សម្រាប់ប្រយុទ្ធប្រឆាំងនឹងជំងឺកូវីដ១៩ ដែលជាអំណោយរបស់រាជរដ្ឋាភិបាលកម្ពុជា យកទៅជូនរដ្ឋាភិបាល នៃសាធារណរដ្ឋប្រជាធិបតេយ្យទីម័រឡេស្ត នៅថ្ងៃទី០២ ខែធ្នូ ឆ្នាំ២០២០នេះ»។

សូមបញ្ជាក់ដែរថា កាលពីថ្ងៃទី២៦ ខែវិច្ឆិកា ឆ្នាំ២០២០ ក្រុមហ៊ុនអាកាសចរណ៍ខេមបូឌា អ៊ែរវ៉េ ក៏បានផ្តល់យន្តហោះ ៣គ្រឿង ជួយដឹកម៉ាស និងបរិក្ខារពេទ្យប្រយុទ្ធប្រឆាំងជំងឺកូវីដ១៩ ទៅកាន់ប្រទេសមីយ៉ាន់ម៉ាផងដែរ៕