លោកជំទាវ យក់ សម្បត្តិ និងឯកឧត្ដម ឃួង ស្រេង ចុះពិនិត្យទីតាំងធ្វើតេស្តលើកទី២ នៅពហុកីឡដ្ឋានជាតិ

ដោយ៖ យូ វីរៈ | ថ្ងៃព្រហស្បតិ៍ ទី៣ ខែធ្នូ ឆ្នាំ២០២០ |

631

ភ្នំពេញ៖ នៅរសៀលថ្ងៃទី០៣ ខែធ្នូ ឆ្នាំ២០២០ នេះលោកជំទាវវេជ្ជណ្ឌិត យក់ សម្បត្តិ រដ្ឋលេខាធិការក្រសួងសុខាភិបាល និងឯកឧត្ដម ឃួង ស្រេង អភិបាល នៃគណៈអភិបាលរាជធានីភ្នំពេញ បានចុះពិនិត្យទីតាំងសម្រាប់យកសំណាកអ្នកជាប់ពាក់ព័ន្ធក្នុងព្រឹត្តិការណ៍សហគមន៍ ២៨ វិចិ្ឆកា មកធ្វើតេស្តលើកទី២ នៅពហុកីឡាដ្ឋានជាតិអូឡាំពិក។

លោកជំទាវ យក់ សម្បិត្ត បានមានប្រសាសន៍ថា ក្រសួងសុខាភិបាល និងសាលារាជធានីភ្នំពេញ បានឯកភាពគ្នា សម្រេចយកទីតាំងថ្មី នៅក្នុងពហុកីឡាដ្ឋានជាតិអូឡាំពិក ដោយហេតុថា ទីតាំងថ្មីនេះ ធំទូលាយ និងមានចំណត សម្រាប់ទទួលបងប្អូនដែលជាប់ពាក់ព័ន្ធក្នុងព្រឹត្តិការណ៍សហគមន៍២៨វិច្ឆិកា។ លោកជំទាវ សង្ឃឹមថា ទីតាំងថ្មីនេះ អាចយកសំណាកអ្នកទាំងអស់នោះ បានប្រមាណជាង៥ពាន់នាក់ផងដែរ។

លោកជំទាវ វេជ្ជបណ្ឌិត បានបញ្ជាក់ថា គិតត្រឹមថ្ងៃទី៣ធ្នូនេះ មន្ត្រីសុខាភិបាល បានយកសំណាកអ្នកជាប់ពាក់ព័ន្ធក្នុងព្រឹត្តិការណ៍សហគមន៍ ២៨វិចិ្ឆកា មានចំនួនជាង ៨ពាន់ ក្នុងនោះអ្នកវិជ្ជមានកូវីដ១៩ មានចំនួន ១៩ករណី។

សូមជំរាបថា ក្រសួងសុខាភិបាល បានកំណត់ការធ្វើតេស្តលើកទី២ ធ្វើនៅថ្ងៃទី៨ ខែធ្នូ ឆ្នាំ២០២០ និងលើកទី៣ នៅថ្ងៃទី១២ ខែធ្នូ ឆ្នាំ២០២០ ទៅតាមទីតាំងដែលបានកំណត់៕