អគ្គនាយដ្ឋានសុខភាពសត្វ និងផលិតកម្មសត្វ ពន្យល់ពីមូលហេតុនៃការធ្លាក់តម្លៃស៊ុត ក្នុងទីផ្សារកម្ពុជា

ដោយ៖ យូ វីរៈ | ថ្ងៃចន្ទ ទី២១ ខែធ្នូ ឆ្នាំ២០២០ |

684

ភ្នំពេញ៖ បន្ទាប់ពីប្រជាពលរដ្ឋមួយចំនួន បានត្អូញត្អែពីផលិតផលស៊ុត នៅក្នុងស្រុកលក់មិនចេញ ពិបាករកទីផ្សារ ជាពិសេសតម្លៃស៊ុតធ្លាក់ថ្លៃក្រោម៣០០រៀលក្នុងមួយគ្រាប់ តាមរយៈហ្វេសប៊ុករបស់ឯកឧត្ដម វេង សាខុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ អគ្គនាយដ្ឋានសុខភាពសត្វ និងផលិតកម្មសត្វ នៃក្រសួងកសិកម្ម នៅថ្ងៃទី២១ ខែធ្នូនេះ បានចេញសេចក្តីប្រកាសព័ត៌មានមួយ ដោយបានពន្យល់ពីហេតុផលមួយចំនួនដែលធ្វើឱ្យតម្លៃស៊ុតធ្លាក់ថ្លៃ។

អគ្គនាយកដ្ឋានសុខភាពសត្វ និងផលិតកម្មសត្វ បានពន្យល់ពីចំណុចមួយចំនួនដូចខាងក្រោមនេះ៖

ទី១.អគ្គនាយកដ្ឋានសុខភាពសត្វ និងផលិតកម្មសត្វ ក៏ដូចជាក្រសួងកសិកម្ម រុក្ខាប្រមាញ់ និងនេសាទ ពុំដែលអនុញ្ញាតជាគោលការណ៍ ឲ្យនាំចូលស៊ុតពីប្រទេសជិតខាង ជាពិសេសប្រទេសវៀតណាមចូលមកទីផ្សារកម្ពុជាឡើយ។

ទី២.ចំពោះតម្លៃស៊ុតទាសម្រាប់យកទៅភ្ញាស់ បើប្រៀបធៀបរវាងកម្ពុជា ជាមួយនឹងប្រទេសវៀតណាម ពោលគឺមានតម្លៃប្រហាក់ប្រហែលគ្នា។ ដោយឡែកស៊ុតទាធម្មតា មិនបង្កកំណើតនៅកម្ពុជាតម្លៃ២៨០រៀល ក្នុងមួយគ្រាប់ ចំណែកឯនៅប្រទេសវៀតណាម តម្លៃ៣០០រៀលក្នុងមួយគ្រាប់។

ទី៣.ក្នុងស្ថានភាពជំងឺកូវីដ១៩ កំពុងគំរាមកំហែងដល់សុខភាពសាធារណៈ ហើយកម្មវិធីជួបជុំផ្សេងៗត្រូវបានផ្អាក ដែលធ្វើឲ្យតម្រូវការស៊ុតត្រូវបានកាត់បន្ថយ ជាអតិបរិមានៅពេលដែលការចិញ្ចឹមបក្សីយកស៊ុតមានការកើនឡើងនៅគ្រប់តំបន់ទូទាំងប្រទេស ម្យ៉ាងទៀតនៅក្នុងរដូវត្រីត្រូវ ប្រពលរដ្ឋមួយចំនួនបែរ មកបរិភោគត្រីជំនួសឲ្យស៊ុតបក្សីវិញ។

ទី៤.ក្នុងករណីអាជីវករ អ្នកចិញ្ចឹមសត្វ ជាពិសេសចិញ្ចឹមមាន់-ទាយកស៊ុត បានដឹងព័ត៌មានពីការលួចនាំចូលស៊ុតមាន់-ទាពីប្រទេសជិតខាង សូមទំនាក់ទមងទៅអគ្គនាយកដ្ឋានសុខភាពសត្វ និងផលិតកម្មសត្វ ដើម្បីចុះអន្តរាគមន៍បង្ក្រាបបទល្មើសចលនាសត្វ និងផលិតផលសត្វស្របតាមច្បាប់ ស្តីពីសុខភាពសត្វ និងផលិតកម្មសត្វ៕