លោកជំទាវវេជ្ជបណ្ឌិត ឱ វណ្ណឌីន៖ កម្ពុជាឯកភាពទទួលយកវ៉ាក់សាំងប្រឆាំងកូវីដ១៩ ប្រភេទស៊ីណូហ្វាម របស់ប្រទេសចិន

ដោយ៖ យូ វីរៈ | ថ្ងៃពុធ ទី២០ ខែមករា ឆ្នាំ២០២១ |

528

ភ្នំពេញ ៖ លោកជំទាវវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល នាព្រឹកថ្ងៃទី២០ មករា ២០២១នេះ បានបញ្ចាក់ថា ប្រទេសកម្ពុជា ឯកភាពក្នុងការទទួលយកនូវវ៉ាក់សាំងកូវីដ១៩ ប្រភេទ ស៊ីណូហ្វាម របស់សាធារណរដ្ឋប្រជាមានិតចិន គឺ ស៊ីណូហ្វាមប៉ៃជីង។

ការបញ្ជាក់ជូនរបស់លោកជំទាវ វេជ្ជបណ្ឌិត ឱ វណ្ណឌីន យ៉ាងដូច្នេះធ្វើឡើងតាមរយៈលទ្ធផលនៃកិច្ចប្រជុំចង្អៀតបន្ទាន់នៃគណៈកម្មការអន្តរក្រសួងដើម្បីប្រយុទ្ធនឹងជំងឺកូវីដ–១៩ ស្តីពីវ៉ាក់សាំងកូវីដ–១៩ (COVID-19 Vaccination) ដែលដឹកនាំដោយ ឯកឧត្តមសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាល និងជាប្រធានគណៈកម្មការអន្តរក្រសួងដើម្បីប្រយុទ្ធ នឹងជំងឺកូវីដ–១៩, នាទីស្តីការក្រសួងសុខាភិបាល កាលពីរសៀលថ្ងៃទី១៩ ខែមករា ឆ្នាំ២០២១ ក្នុងកិច្ចប្រជុំនេះ ក៏មានការចូលរួមពីឯកឧត្តម លោកជំទាវ ថា្នក់ដឹកនាំក្រសួងសុខាភិបាល ក្រសួងការបរទេស និងសហប្រតិបត្តិការអន្តរជាតិ ក្រសួងសេដ្ឋកិច្ច និងហិរញ្ញវត្ថុ និងអភិបាល នៃគណៈអភិបាលរាជធានីភ្នំពេញ រួមទាំង ក្រុមការងារបច្ចេកទេសសុខាភិបាល។

លោកជំទាវ បានឲ្យដឹងទៀតថា អង្គប្រជុំបានឯកភាពសម្រេចយកវ៉ាក់សាំងស៊ីណូហ្វាម របស់សាធារណរដ្ឋប្រជាមានិតចិន ដែលជាជំនួយរបស់ចិន ហើយក៏ជាការអនុវត្តន៍ស្របតាមការចង្អុលបង្ហាញ ក៏ដូចជាអនុសាសន៍ដ៏ខ្ពង់ខ្ពស់របស់សម្តេចតេជោ ហ៊ុន សែន នាយករដ្ឋមន្រី្ត ដែលលោកបានសម្រេច និងមានឆន្ទៈ ក្នុងការគិតគូរជាទីបំផុត ទៅលើសុខទុក្ខ សុខភាព និងសុខុមាលភាពរបស់បងប្អូនប្រជាពលរដ្ឋ លើការប្រយុទ្ធប្រឆាំង ក៏ដូចជាការទប់ស្កាត់ នៃការរីករាលដាលជំងឺកូវីដ–១៩ នៅក្នុងព្រះរាជាណាចក្រកម្ពុជា ដើម្បីឲ្យប្រជាពលរដ្ឋប្រទេសកម្ពុជាអាចទទួលបានវ៉ាក់សាំង ដើម្បីយកមកប្រើប្រាស់ដូចបណ្តាប្រទេសនានា នៅលើសកលលោក។

លោកជំទាវ វេជ្ជបណ្ឌិត ឱ វណ្ណឌីន បានសង្កត់ធ្ងន់ថា ក្នុងជំហានដំបូងក្រសួងសុខាភិបាល មិនមែនគិតត្រឹមតែមនុស្សដែលត្រូវទទួលបាននៅក្នុងកម្រិតសម្រាប់តែ១លានដូសនោះទេ។ ប៉ុន្តែជំហានដំបូងគឺក្រសួង បានគិតគូរលើសពីចំនួននេះ ក្រុមអាទិភាព ដែលត្រូវទទួលបានវ៉ាក់សាំងកូវីដ–១៩ដោយស្ម័គ្រចិត្ត គឺក្រុមបុគ្គលិកសុខាភិបាលជួរមុខ, ក្រុមមន្រី្តរាជការស៊ីវិលជួរមុខ, កងកម្លាំងអន្តរាគមន៍, ជនបង្គោលនៅតាមសហគមន៍, ប្រជាជនដែលមានវ័យចំណាស់ អាយុចាប់ពី៦៥ឆ្នាំឡើងទៅ និងមនុស្សពេញវ័យ ដែលមានអាយុចាប់ពី១៨ ទៅ៦៤ឆ្នាំ និងក្រុមអាទិភាពចុងក្រោយ គឺកម្មករ កម្មការិនី។ នេះជាលទ្ធផលនៃកិច្ចប្រជុំអន្តរក្រសួង ហើយលទ្ធផលទាំងអស់នេះ ក៏បានដាក់ស្នើសុំការសម្រេចដ៏ខ្ពង់ខ្ពស់ពីសម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្តនៃព្រះរាជាណាចក្រកម្ពុជា ។ ទន្ទឹមនឹងនោះ សម្តេចតេជោ បានផ្តល់នូវការឯកភាពទៅលើស្មារតីនៃអង្គប្រជុំរួចហើយដែរ។ ដូច្នេះក្រុមការងារអន្តរក្រសួង នឹងបន្តការងារនេះ ទៅតាមការឯកភាពដ៏ខ្ពង់ខ្ពស់សម្តេចតេជោ នាយករដ្ឋមន្រី្ត៕ ប្រភព៖ BTV

អត្ថបទទាក់ទង