ចំណូលពីវិស័យប្រេងកាត ក្លាយជាប្រភពដែលមានសក្ដានុពលសម្រាប់ថវិកាជាតិ

ដោយ៖ យូ វីរៈ | ថ្ងៃព្រហស្បតិ៍ ទី២៨ ខែមករា ឆ្នាំ២០២១ |

634

ភ្នំពេញ ៖ រាជរដ្ឋាភិបាលកម្ពុជា គ្រោងប្រមូលចំណូលពីវិស័យប្រេងកាត ដែលជាប្រភពសក្ដានុពលចំណូលថ្មី ក្នុងរង្វង់ប្រមាណ ២៧ លានដុល្លារ ដែលជាចំណូលសារពើពន្ធ និងចំណូលមិនមែនសារពើពន្ធ។

ឯកឧត្តម វង្សី វិស្សុត រដ្ឋមន្ត្រីប្រតិភូអមនាយករដ្ឋមន្ត្រី និងជារដ្ឋលេខាធិការប្រចាំការក្រសួងសេដ្ឋកិច្ច និងហិរញ្ញវត្ថុ លើកឡើងក្នុងវេទិការសាធារណៈ ស្តីពីការគ្រប់គ្រងម៉ាក្រូសេដ្ឋកិច្ច និងច្បាប់ថវិកាជាតិឆ្នាំ២០២១ នៅថ្ងៃទី២៧ ខែមករា ឆ្នាំ២០២១ នេះថា ពាក់ព័ន្ធនិងការប្រមូលចំណូល រាជរដ្ឋាភិបាលកម្ពុជា អនុវត្តន៍ការប្រមូលចំណូលបានល្អប្រសើរ ជាក់ស្តែង នៅក្នុងឆ្នាំ ២០២០ កន្លងមកនេះ កម្ពុជាប្រមូលចំណូលបានប្រមាណ ៥ ៧០០ លានដុល្លារអាមេរិក នៃចំណូលក្នុងស្រុក ដូច្នេះធ្វើឲ្យស្ថានភាពថវិកា កម្ពុជាឈរបានរឹងមាំ ។

ឯកឧត្តម បន្តថា សម្រាប់ការប្រមូលចំណូលនៅក្នុងឆ្នាំ ២០២១ នេះ, រាជរដ្ឋាភិបាលកម្ពុជា ទទួលបានប្រភពចំណូលពីវិស័យប្រេងកាតដែលជាសក្ដានុពលថ្មីមួយទៀត ក្នុងនោះ ប្រភពចំណូលដែលមិនមែនសារពើរពន្ធ មានទំហំទឹកប្រាក់ក្នុងរង្វង់ ១៤ លានដុល្លារអាមេរិក។ បើគិតចំណូលទាំងចំណូលសារពើពន្ធ ចំណូលនេះ នឹងអាចកើនឡើងក្នុងរង្វង់ ២៧ លានដុល្លារអាមេរិក ដោយផ្អែកទៅតាមសេណាយ៉ូ កំណត់របស់រដ្ឋាភិបាល ។

ពាក់ព័ន្ធចំណូលប្រេងកាត, លោកបណ្ឌិត គី សេរីវឌ្ឍន៍ អ្នកស្រាវជ្រាវសេដ្ឋកិច្ច នៃរាជបណ្ឌិត្យសភាកម្ពុជា លើកឡើងថា ការរំពឹងទុកចំណូលពន្ធ ២៧ លានដុល្លារនេះ វាជាប្រភពចំណូលមួយមានភាពប្រាកដប្រជា និងជួយដល់ថវិកា ជាតិ កុំឲ្យមានឱនភាពសាច់ប្រាក់ ច្រើននៅក្នុងវិបត្តិកូវីដ ១៩ នេះ និងក៏ជាការទ្រទ្រង់សេដ្ឋកិច្ចជាតិយើងឲ្យប្រសើរឡើងវិញផងដែរ ។

ទាក់ទងនិងវិស័យពន្ធដារ, ថ្មីៗនេះ ឯកឧត្តម ឧបនាយករដ្ឋមន្ត្រី អូន ព័ន្ធមុន្នីរ័ត្ន រដ្ឋមន្ត្រីក្រសួងសេដ្ឋកិច្ច និងហិរញ្ញវត្ថុ បានជំរុញឲ្យអគ្គនាយកដ្ឋានពន្ធដារ យកចិត្តទុកដាក់ ពិនិត្យ និងសិក្សាលើលទ្ធភាពនៃការប្រមូលចំណូលដែលមានសក្ដានុពលផ្សេងទៀត ដោយគិតគូរទាំងទិដ្ឋភាពចំណូលសារពើពន្ធ និងមិនមែនសារពើពន្ធ ដើម្បីធានាបាននូវអនុលោមភាពសារពើពន្ធ និងការប្រមូលចំណូលឱ្យបានគ្រប់ជ្រុងជ្រោយ ក្នុងនោះប្រភពចំណូលពីវិស័យ E-Commerce, វិស័យប្រេងកាតដែលជាសក្តានុពលថ្មី, វិស័យធនធនរ៉ែ ព្រមទាំងវិស័យដែលមានសក្តានុពលមួយចំនួនទៀត ។

សូមបញ្ជាក់ថា ទាក់ទងនិងការអភិវឌ្ឍតំបន់ប្រេងការប្លុក អេ, របស់ក្រុមហ៊ុនគ្រីសអេនើជី (KrisEnergy) ក្រុមហ៊ុន KrisEnergy បានចុះកិច្ចសន្យាជាមួយក្រសួងរ៉ែ និងថាមពល ក្នុងការធ្វើផលិតកម្មប្រេងមានចំនួន ៨៥ អណ្តូង នៅក្នុងប្លុក អេ, ក្នុងនោះសម្រាប់ដំណាក់កាលដំបូងនេះ ក្រុមហ៊ុនបានចាប់ផ្តើមក្នុងដំណាក់កាលមួយដែលហៅថា មីនី ផ្លាតហ្វ័ម (Mini Platform) ដែលនឹងអនុវត្តចំនួន ៥ អណ្តូង នឹងគ្រោងផលិតប្រេងក្នុងរង្វង់ជាង ៧ លានបារ៉ែល នៅក្នុងដំណាក់កាលដំបូង ក្នុងនោះប្រសិនការខួងអណ្តូងស្វែងរកប្រកបដោយជោគជ័យ ក្រុមហ៊ុននឹងឈានទៅដំណាក់កាលមួយទៀត ដែលមានចំនួន ២០ អណ្តូង ហើយនឹងអាចឈានទៅអនុវត្តជំហានជាបន្តបន្ទាប់ទៀត ៕

ប្រភព៖ BTV

អត្ថបទទាក់ទង