ឧត្តមសេនីយ៍ឯក ហ៊ុន ម៉ាណែត ប្រគល់ផ្ទះជូនសមាជិក សមាគមអតីតយុទ្ធជនកម្ពុជា ខេត្តបន្ទាយមានជ័យ

ដោយ៖ យូ វីរៈ | ថ្ងៃសុក្រ ទី១១ ខែកញ្ញា ឆ្នាំ២០២០ |

1,022

បន្ទាយមានជ័យ៖ នៅថ្ងៃទី១០ ខែកញ្ញា ឆ្នាំ២០២០ឯកឧត្ដម ឧត្តមសេនីយ៍ឯក ហ៊ុន ម៉ាណែត តំណាងដ៏ខ្ពង់ខ្ពស់ សម្តេចអគ្គមហាសេនាបតីតេជោ ហ៊ុន សែន បានប្រគល់ផ្ទះជូនសមាជិក សមាគមអតីតយុទ្ធជនកម្ពុជា ខេត្តបន្ទាយមានជ័យ។

ឯកឧត្ដមមានប្រសាសន៍ថា ការប្រគល់ផ្ទះជូនអតីតយុទ្ធជននេះ គឺបានអនុវត្តជាច្រើនមកហើយ និងកំពុងបន្តសាងសង់ជាបន្តបន្ទាប់តបទៅនឹងតម្រូវការនៅទូទាំងប្រទេស ។ ឯកឧត្ដមបន្តថា សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងជាប្រធានសមាគមអតីតយុទ្ធជនកម្ពុជា តែងបានយកចិត្តទុកដាក់ជួយដល់អតីតយុទ្ធជនតាមគ្រប់រូបភាព។ យ៉ាងណាក៏ដោយ ការប្រគល់ផ្ទះគ្រាន់តែជាមធ្យោបាយមួយប៉ុណ្ណោះ លើសពីនេះគឺនៅមានគោលការណ៍ និងយន្តការជាច្រើនផ្សេងៗទៀត ដែលសម្តេចបានខិតខំសម្រេចបានសម្រាប់អតីតយុទ្ធជន ជាអាទិ៍ ការដំឡើងប្រាក់បៀវត្ស ព្រមទាំងការជួយទំនុកបម្រុងផ្សេងទៀត។

ឯកឧត្ដមបានពាំនាំនូវការផ្តាំផ្ញើការសាកសួរសុខទុក្ខ និងថ្លែងអំណរគុណរបស់សម្តេចតេជោនាយករដ្ឋមន្ត្រី ជូនដល់អ៊ុំពូមីងអតីតយុទ្ធជន ដែលបានចូលរួមនៅក្នុងការលះបង់ ដើម្បីបុព្វហេតុជាតិមាតុភូមិ ជាពិសេសការបង្កលក្ខណៈទុកឱ្យកូនចៅជំនាន់ក្រោយ ទាំងជំនាន់នេះ និងទៅអនាគត បានរស់នៅយ៉ាងមានសេចក្តីសុខនៅក្នុងសុខសន្តិភាព មានឱកាសរៀនសូត្រ មានឱកាសទទួលបានការងារធ្វើ ជួយគ្រួសារ ជួយសង្គមជាតិ ដែលអាចចាត់ទុកបានថា ជោគជ័យរបស់ប្រទេសជាតិ និងប្រជាជនយើងទាំងអស់គ្នា ហើយពិតជាស័ក្តិសមនឹងការលះបង់របស់អ៊ុំពូមីងយ៉ាងពិតប្រាកដ។

ឯកឧត្ដមក៏បានថ្លែងអំណរគុណដល់រដ្ឋបាលខេត្ត សមាគមអតីតយុទ្ធជនកម្ពុជាថ្នាក់ខេត្ត ថ្នាក់ស្រុក និងថ្នាក់ឃុំ ក៏ដូចជា មន្ទីរសង្គមកិច្ច និងអតីតយុទ្ធជន យោធភូមិភាគទី៥ តំបន់ប្រតិបត្តិការសឹករងខេត្ត ស្នងការនគរបាលខេត្ត ព្រមទាំងសប្បុរសជន ដែលបានយកចិត្តទុកដាក់ និងរួមគ្នាអនុវត្តគោលនយោបាយរបស់រាជរដ្ឋាភិបាល និងរបស់សម្តេចតេជោនាយករដ្ឋមន្ត្រី ដើម្បីជួយដល់អតីតយុទ្ធជនរបស់យើង ជាបន្តបន្ទាប់ និងជាប់ជាប្រចាំ៕