ស្ថានបេសកកម្មអចិន្ត្រៃយ៍កម្ពុជាបដិសេធការសន្និដ្ឋានខុសឆ្គងរបស់អ្នកនាំពាក្យឧត្តមស្នងការអង្គការសហប្រជាជាតិ

ដោយ៖ យូ វីរៈ | ថ្ងៃសៅរ៍ ទី១២ ខែកញ្ញា ឆ្នាំ២០២០ |

772

ភ្នំពេញ៖ ស្ថានបេសកកម្មអចិន្ត្រៃយ៍ នៃព្រះរាជាណាចក្រកម្ពុជា នៅទីក្រុងហ្សឺណែវ បានបដិសេធទាំងស្រុងនូវការសន្និដ្ឋានខុសឆ្គង និងនាំឱ្យមានការភាន់ច្រឡំរបស់លោកស្រី Ravina Shamdasani អ្នកនាំពាក្យរបស់ឧត្តមស្នងការអង្គការសហប្រជាជាតិទទួលបន្ទុកសិទ្ធិមនុស្ស ពាក់ព័ន្ធនឹងការអនុវត្តច្បាប់នៅកម្ពុជា ដែលសំដៅការពារពលរដ្ឋគោរពច្បាប់ និងធានាសន្តិភាព សណ្តាប់ធ្នាប់សង្គម និងសុខភាពសាធារណៈ សម្រាប់មនុស្សគ្រប់រូប។ នេះបើយោងតាមសេចក្តីប្រកាសព័ត៌មានរបស់ស្ថានបេសកកម្មអចិន្ត្រៃយ៍ នៃព្រះរាជាណាចក្រកម្ពុជា កាលពីថ្ងៃទី១១ ខែកញ្ញា ឆ្នាំ២០២០។

ក្នុងសេចក្ដីប្រកាសព័ត៌មានដដែរឲ្យដឹងថា ការអនុវត្តសេរីភាពបញ្ចេញមតិ បង្កើតសមាគម និងប្រមូលផ្ដុំដោយសន្តិវិធី ត្រូវបានគេយល់ដឹងជា ទូទៅយ៉ាងច្បាស់ថា ត្រូវភ្ជាប់មកជាមួយនូវករណីយកិច្ចការទទួលខុសត្រូវពិសេស និងដែនកំណត់ ដែលមានចែងក្នុងច្បាប់ ដូចបានគូសបញ្ជាក់នៅក្នុងមាត្រា២៩ (២) នៃសេចក្តីថ្លែងការណ៍ជាសាកលស្តីពីសិទ្ធិមនុស្ស និងមាត្រា១៩(៣) ២១ និង២២ (២) នៃកតិកាសញ្ញាអន្តរជាតិស្តីពី សិទ្ធិពលរដ្ឋ និង នយោបាយ។ ដូចគ្នានេះដែរ មាត្រា៣១ នៃរដ្ឋធម្មនុញ្ញនៃព្រះរាជាណាចក្រកម្ពុជា ក៏បានគូសបញ្ជាក់ យ៉ាងច្បាស់ថា ការប្រើប្រាស់សិទ្ធិ និងសេរីភាពខាងលើ គឺត្រូវតែអនុលោមទៅតាមច្បាប់។ ដូច្នេះ ការិយាល័យឧត្តមស្នងការទទួលបន្ទុកសិទ្ធិមនុស្សមានភារៈកិច្ចលើកកម្ពស់ការយល់ដឹងជាសាធារណៈ អំពីកាតព្វកិច្ចដូចបានរៀបរាប់ខាងលើ នៅក្នុងបទអធិប្បាយរបស់ខ្លួន។

លោកស្រីអ្នកនាំពាក្យហាក់មានបំណងមិនស្វែងរកព័ត៌មានលម្អិត និងផ្ទៀងផ្ទាត់អោយបានត្រឹមត្រូវ ព្រមទាំងមិនជ្រើសរើសកិច្ចសន្ទនាជាមួយនឹងរដ្ឋ ក្នុងការវាយតម្លៃស្ថានភាពសិទ្ធិមនុស្ស នៅកម្ពុជា។ ការជ្រើសរើសវិធីសាស្រ្តបែបនេះ គឺផ្ទុយនឹងគោលការណ៍ណែនាំនៃភាពមិនលម្អៀងសត្យានុម័ត និងការមិនជ្រើសរើសតែមួយជ្រុង នៅពេលពិចារណាអំពីស្ថានភាពសិទ្ធិមនុស្ស៕