កម្ពុជានឹងទទួលបានវ៉ាក់សាំងកូវីដ១៩ ប្រភេទ Astra Zeneca ចំនួនជាង ៥២ម៉ឺនដូសទៀតពីប្រទេសហុងគ្រី

ដោយ៖ យូ វីរៈ | ថ្ងៃអង្គារ ទី១៥ ខែមីនា ឆ្នាំ២០២២ |

653

ភ្នំពេញ៖ នៅវេលាម៉ោងប្រមាណ ៧យប់ថ្ងៃទី១៥ ខែមីនា ឆ្នាំ២០២២នេះ កម្ពុជានឹងទទួលបាន វ៉ាក់សាំងបង្ការជំងឺកូវីដ១៩ ប្រភេទ Astra Zeneca ចំនួន ៥២៣,១០០ដូសទៀត ដែលជំនួយរបស់រដ្ឋាភិបាលហុងគ្រី។ នេះបើតាមការឲ្យដឹងពីលោកជំទាវ យក់ សម្បត្តិ រដ្ឋលេខាធិការក្រសួងសុខាភិបាល។

លោកជំទាវរដ្ឋលេខាធិការមានប្រសាសន៍ថា វ៉ាក់សាំងកូវីដ-១៩ ប្រភេទ Astra Zeneca ជំនួយប្រទេសហុងគ្រី ជូនរាជរដ្ឋាភិបាលកម្ពុជា នឹងដឹកមកដល់កម្ពុជា តាមជើងយន្តហោះ តួគី (TK ៦២៦៦)។ ដោយឡែកកម្មវិធីប្រគល់-ទទួលវ៉ាក់សាំងផ្លូវការ នឹងប្រារព្ធធ្វើឡើងនៅវិមានសន្តិភាព ក្រោមអធិបតីភាពដ៏ខ្ពង់ខ្ពស់បំផុតរបស់សម្តេចតេជោ ហ៊ុន សែន នាយករដ្ឋមន្ត្រី នៅថ្ងៃទី១៨ ខែមីនា ឆ្នាំ២០២២ វេលាម៉ោង៩ព្រឹក។

រហូតមកដល់ពេលនេះ កម្ពុជាទទួលបានវ៉ាក់សាំងបង្ការជំងឺកូវីដ១៩ទាំងការបញ្ជាទិញ និងជំនួយសរុបប្រហែលជាង៤៣លាន៥០ម៉ឺនដូសហើយ រួមទាំងវ៉ាក់សាំងបង្ការជំងឺកូវីដ១៩ ប្រភេទ Astra Zeneca ចំនួនជាង៥២ម៉ឺនដូសដែលជាជំនួយរបស់រដ្ឋាភិបាល និងប្រជាជនប៉ូហុងគ្រីដែលនឹងដឹកមកដល់កម្ពុជានៅយប់នេះផងដែរ។ គិតត្រឹមថ្ងៃទី១៤ ខែមីនា ឆ្នាំ២០២២ ក្រសួងសុខាភិបាល និងក្រសួងការពារជាតិ បានចាក់វ៉ាក់សាំងការពារកូវីដ១៩ ជូនមន្រ្តីរាជការ កងកម្លាំងប្រដាប់អាវុធ និងប្រជាពលរដ្ឋនៅទូទាំងប្រទេសសរុបចំនួន ១៤,៧៥៧,២០៥នាក់៕