នាយឧត្ដមសេនីយ៍ ហ៊ីង ប៊ុនហៀង ទទួលសញ្ញាបត្របណ្ឌិតកិត្តិយសផ្នែកសន្តិសុខសេដ្ឋកិច្ច ពីសាកលវិទ្យាល័យកម្ពុជា

ដោយ៖ យូ វីរៈ | ថ្ងៃព្រហស្បតិ៍ ទី២៤ ខែកញ្ញា ឆ្នាំ២០២០ |

1,335

ភ្នំពេញ៖ ក្រុមប្រឹក្សាភិបាលរបស់សាកលវិទ្យាល័យកម្ពុជា បានសម្រេចប្រគល់សញ្ញាបត្របណ្ឌិតកិត្តិយស ផ្នែកសន្តិសុខសេដ្ឋកិច្ច ជូនដល់ឯកឧត្ដម នាយឧត្ដមសេនីយ៍កិត្តិបណ្ឌិត ហ៊ីង ប៊ុនហៀង អគ្គមេបញ្ជាការរងនៃកងយោធពលខេមរភូមិន្ទ នាយករង ខុទ្ធកាល័យសម្ដេចតេជនាយករដ្ឋមន្ត្រី និងជាមេបញ្ជាការ បញ្ជាការដ្ឋានអង្គរក្ស។ នេះបើយោងតាមសេចក្ដីប្រកាសព័ត៌មានរបស់សាកលវិទ្យាល័យកម្ពុជាបានចុះផ្សាយ កាលពីថ្ងៃទី២៣ ខែកញ្ញា ឆ្នាំ២០២០។

ឯកឧត្ដម កៅ គឹមហួន ស្ថាបនិក ប្រធានក្រុមប្រឹក្សាភិបាល និងជាសាកលវិទ្យាធិការ សាកលវិទ្យាល័យកម្ពុជាង បានលើកឡើងថា ការប្រគល់សញ្ញាបត្របណ្ឌិតកិត្តិយសជូនដល់ នាយឧត្ដមសេនីយ៍កិត្តិបណ្ឌិត ហ៊ីង ប៊ុនហៀង នាពេលនេះ គឺដោយផ្អែកលើកត្តាសំខាន់ៗចំនួន៣៖

ទី១. ឯកឧត្ដម បានបម្រើការជាមេបញ្ជាការ បញ្ជាការដ្ឋានអង្គរក្ស ដែលក្នុងនោះ ឯកឧត្ដមបម្រើ និងការពារថ្នាក់ដឹកនាំ និងស្ថាប័ននានានៃប្រទេសកម្ពុជា ក៏ដូចជាថ្នាក់ដឹកនាំនៃប្រទេសនានានៅក្នុងពេលដែលពួកគាត់បានមកបំពេញទស្សនកិច្ច និងចូលរួមប្រជុំនៅក្នុងប្រទេសកម្ពុជា។

ទី២. ឯកឧត្ដម បានចូលរួមយ៉ាងសកម្មក្នុងការថែរក្សា សន្តិភាព សន្តិសុខ ស្ថិរភាពនយោបាយ ដែលមានសារៈសំខាន់សម្រាប់កំណើនសេដ្ឋកិច្ច ការអភិវឌ្ឍ ប្រកបដោយចីរភាពរបស់ប្រទេសកម្ពុជា។

ទី៣. ឯកឧត្ដម បានគាំទ្រយ៉ាងសកម្មដល់ការអភិវឌ្ឍ និងការជំរុញទំនាក់ទំនងស៊ីវិល និងយោធា តាមរយៈការជយយដល់ការងារដែលទាក់ទងនឹងគ្រោះមហន្តរាយធម្មជាតិ និងការអភិវឌ្ឍសហគមន៍។

សូមបញ្ជាក់ជូនថា ចាប់តាំងពីការបង្កើតឡើងសាកលវិទ្យាល័កម្ពុជាក្នុងឆ្នាំ២០០៣មក នេះគឺជាលោកទី៥៥ហើយ ដែលសាកលវិទ្យាល័យកម្ពុជាបានប្រគល់សញ្ញាបត្រកិត្តិយសដល់ឥស្សរជនឆ្នើម ទាំងក្នុងវិស័យសាធារណៈ និងឯកជន ក៏ដូចជាក្នុងជួររាជរដ្ឋាភិបាល យោធា វិស័យសិក្សាធិការ និងច្បាប់ជាដើម។ ពិធីប្រគល់សញ្ញាបត្របណ្ឌិតកិត្តិយសជូនដល់ឯកឧត្ដម នាយឧត្ដមសេនីយ៍ ហ៊ីង ប៊ុនហៀង នឹងប្រារព្ធឡើងនៅថ្ងៃទី២៥ ខែកញ្ញា ឆ្នាំ២០២០ នៅទីបញ្ជាការអង្គរក្ស ស្ថិតនៅទួលក្រសាំង ក្រុងតាខ្មៅ ខេត្តកណ្ដាល៕