គណៈកម្មការទី៧ នៃរដ្ឋសភា ចុះស្វែងយល់ពីផលលំបាកបង្កដោយវិបត្តិកូវីដ១៩ លើគ្រឹះស្ថានសិក្សានៅតាមមូលដ្ឋាន

ដោយ៖ យូ វីរៈ | ថ្ងៃព្រហស្បតិ៍ ទី២៤ ខែកញ្ញា ឆ្នាំ២០២០ |

637

បាត់ដំបង៖ កាលពីព្រឹកថ្ងៃទី២៣ ខែកញ្ញា ឆ្នាំ២០២០ គណៈប្រតិភូគណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍នៃរដ្ឋសភា ដឹកនាំដោយ ឯកឧត្តម ហ៊ុន ម៉ានី ប្រធានគណៈកម្មការ បានចាប់ផ្តើមបេសកកម្មក្នុងខេត្តបាត់ដំបង ដោយការចុះទស្សនកិច្ច និងជួបសំណេះសំណាលជាមួយគណៈគ្រប់គ្រងសាលា លោកគ្រូ អ្នកគ្រូ នៅក្នុងខេត្តបាត់ដំបង។

ក្នុងដំណើរទស្សនកិច្ច និងការជួបសំណេះសំណាលរបស់គណៈកម្មការទី៧នេះ ប្រព្រឹត្តទៅក្នុងគោលបំណង ដើម្បីស្វែងយល់បន្ថែមពីផលលំបាកបង្កដោយវិបត្តិកូវីដ១៩ លើគ្រឹះស្ថានសិក្សានៅតាមមូលដ្ឋានផ្ទាល់ និងពិនិត្យស្ថានភាពជាក់ស្តែងរបស់វិទ្យាល័យក្នុងការអនុវត្តដំណើរការបើកឡើងវិញក្នុងដំណាក់កាលទី២។

នៅរសៀលថ្ងៃដដែល គណៈប្រតិភូគណៈកម្មការ ក៏បានជួបពិភាក្សាការងារជាមួយថ្នាក់ដឹកនាំខេត្ត ដឹកនាំដោយ ឯកឧត្តម ងួន រតនៈ អភិបាលនៃគណៈអភិបាលខេត្តបាត់ដំបង រួមជាមួយប្រធានមន្ទីរអប់រំ យុវជន និងកីឡា និងប្រធានការិយាល័យស្រុក ក្រុងទូទាំងខេត្ត។

ក្រោយស្តាប់របាយការណ៍ស្តីអំពីស្ថានភាពអប់រំទាំងក្នុងមូលដ្ឋានផ្ទាល់ និងក្នុងក្របខណ្ឌខេត្ត រួចមក ប្រតិភូគណៈកម្មការទី៧ នៃរដ្ឋសភា បានកត់សម្គាល់ឃើញថា បញ្ហាប្រឈមដែលខេត្តនីមួយៗ បាន និងកំពុងជួបប្រទះ ហាក់មិនមានភាពខុសប្លែកពីគ្នាខ្លាំងនោះទេ។ បញ្ហាដែលបានលើកឡើងរួមមាន៖ កម្រិតចំណេះដឹងផ្នែកបច្ចេកទេសព័ត៌មានវិទ្យារបស់លោកគ្រូ អ្នកគ្រូ ,មធ្យោបាយ និងឧបករណ៍បង្រៀនពីចម្ងាយមិនគ្រប់គ្រាន់, ការបង្រៀនតាមអនឡាញមិនដូចការបង្រៀនដោយផ្ទាល់ក្នុងសាលា និង ការសហការរបស់អាណាព្យាបាល និងសិស្សានុសិស្សផ្ទាល់។

ឯកឧត្តម ហ៊ុន ម៉ានី ប្រធានគណៈកម្មការទី៧ បានមានប្រសាសន៍ថា «ថ្វីបើបញ្ហាប្រឈមស្រដៀងគ្នា ប៉ុន្តែវិធានជាដំណោះស្រាយ គឺទាមទារឱ្យមានការគិតគូរ រៀបចំដោយឡែកៗពីគ្នា ប្រកបដោយភាពបត់បែនទៅតាមស្ថានភាព និងស្ថានការណ៍ជាក់លាក់ក្នុងមូលដ្ឋាននីមួយៗ។ រីឯការអនុវត្តវិញ គឺត្រូវការធ្វើជាជំហានៗ ដោយមានការថ្លឹងថ្លែងច្បាស់លាស់ពីភាពចាំបាច់ និងមានការចូលរួមសហការពីគ្រប់ភាគីពាក់ព័ន្ធ»។ ឯកឧត្តម បានវាយតម្លៃខ្ពស់ចំពោះ ភាពច្នៃប្រឌិតខ្ពស់របស់លោកនាយកសាលា លោកប្រធានការិយាល័យ និងលោកប្រធានមន្ទីរ ក្នុងការដាក់ចេញជាយន្តការផ្សេងៗ ជាដំណោះស្រាយបន្តបន្ទាប់ ដើម្បីសម្រេចគោលដៅរួមមួយក្នុងការបង្កើនប្រសិទ្ធភាពការផ្តល់ការអប់រំក្នុងបរិបទកូវីដ១៩។

ក្នុងឱកាសជំនួបជាមួយរដ្ឋបាលខេត្តបាត់ដំបង គណៈកម្មការអប់រំ យុវជន កីឡា ធម្មការ កិច្ចការសាសនា វប្បធម៌ និងទេសចរណ៍នៃរដ្ឋសភា បានចូលរួមសោកស្តាយជាមួយបងប្អូនប្រជាពលរដ្ឋនៃខេត្តបាត់ដំបង ក្នុងហេតុការណ៍ភ្លើងឆេះផ្សារធំបាត់ដំបង កាលពីថ្ងៃទី៣០ ខែសីហា ឆ្នាំ២០២០ កន្លងទៅនេះនិបានឧបត្ថម្ភថវិកាចំនួន ២០លាន រៀល ជូនដល់រដ្ឋបាលខេត្តបាត់ដំបង ដើម្បីចូលរួមចំណែកជួសជុលសំណង់ផ្សារធំបាត់ដំបង ដែលរងការខូចខាតក្នុងឧបទ្ទេវហេតុអគិ្គភ័យនេះផងដែរ៕