ទេសរដ្ឋមន្ត្រី គន់ គីម ចុះពិនិត្យស្ថានភាពជំនន់ទឹកភ្លៀងនៅស្រុកក្រុងចំនួន៣ ក្នុងខេត្តបន្ទាយមានជ័យ

ដោយ៖ យូ វីរៈ | ថ្ងៃអាទិត្យ ទី១៨ ខែតុលា ឆ្នាំ២០២០ |

758

បន្ទាយមានជ័យ៖ អាជ្ញាធរខេត្តបន្ទាយមានជ័យបានឲ្យដឹងយប់ ថ្ងៃទី១៧ ខែតុលា ឆ្នាំ២០២០ ជំនន់ទឹកភ្លៀង បានហូរបុកមកពីប្រទេសថៃ បណ្ដាលឲ្យជន់លិចតំបន់ខ្លះ នៃស្រុកថ្មពួក ស្រុកអូរជ្រៅ និងក្រុងប៉ោយប៉ែត។

បន្ទាប់ពីបានទទួលដំណឹងនេះ ឯកឧត្តមអ៊ុ រាត្រី អភិបាលខេត្តបន្ទាយមានជ័យ បានដឹកនាំកម្លាំង ចុះជម្លៀសប្រជាពលរដ្ឋទាំងយប់ ដើម្បីបញ្ជូនពួកគាត់ទៅរកទីទួលសុវត្ថិភាព។ ឯកឧត្ដមបានបញ្ជាក់ថា ទឹកហូរមកពីប្រទេសថៃនេះ មិនមែនជាការបើកទំនប់នោះទេ តែវាជាទឹកភ្លៀងដែលហូរហៀរធ្លាក់មក គួបផ្សំនឹងទឹកភ្លៀងនៅក្នុងប្រទេសយើងផង ទើបធ្វើឲ្យទឹកជន់លិច។ ដោយឡែក ទំនប់នៅក្នុងខេត្តស្រះកែវនោះ ថៃធ្លាប់ជូនដំណឹងមកថា បើកនោះ គឺគេមិនទាន់បើកមកទេ។

អភិបាលខេត្ត បានបន្ថែមថា រហូតមកដល់ពេលនេះ ប្រជាពលរដ្ឋនៅប៉ោយប៉ែត ប្រមាណ៥០គ្រួសារ ត្រូវបានជម្លៀស ចេញពីលំនៅឋាន។ រីឯប្រជាពលរដ្ឋដែលត្រូវប្រឈមនឹងការលិចលង់ ត្រូវបានជូនដំណឹងឱ្យត្រៀមលក្ខណៈក្នុងការជម្លៀស ខណៈកងកម្លាំងត្រូវបានណែនាំត្រៀមលក្ខណៈជួយសង្គ្រោះ និងជម្លៀសពួកគាត់។

ឯកឧត្តមទេសរដ្ឋមន្ត្រី គន់ គីម អនុប្រធានទី១គណៈកម្មាធិការជាតិគ្រប់គ្រងគ្រោះមហន្តរាយ កំពុងឈរជើងនៅខេត្តបន្ទាយមានជ័យ បានបញ្ជាក់ថា ទឹកធ្លាក់មកពីថៃ បានហូរបុកមកយ៉ាងខ្លាំង ចូលក្នុងឃុំចំនួនពីរ នៃស្រុកថ្មពួក។ នៅពេលនេះ ឯកឧត្ដមបានបញ្ជាឲ្យកងពលតូចថ្មើរជើងលេខ៥១ យោធាខេត្ត នគរបាល និងកងពលពិសេស៩១១ ចេញទៅសង្គ្រោះប្រជាពលរដ្ឋភ្លាមៗ ។ កងកម្លាំងខ្លះបានជួយជញ្ជូនទ្រព្យសម្បត្តិរបស់ប្រជាពលរដ្ឋ នាំទៅដាក់ទីទួលមានសុវត្ថិភាព។

គិតមកដល់ថ្ងៃទី១៧ ខែតុលា ឆ្នាំ២០២០ គ្រោះទឹកជំនន់នេះ បានសម្លាប់ប្រជាពលរដ្ឋរស់នៅខេត្តបន្ទាយមានជ័យ ចំនួន១២នាក់។ ប៉ុន្ដែដើម្បីជួយដោះស្រាយការលំបាកនោះ សម្តេចតេជោ ហ៊ុន សែន នាយករដ្ឋមន្ត្រីកម្ពុជា និងជាប្រធានគណៈកម្មាធិការជាតិគ្រប់គ្រងគ្រោះមហន្តរាយ នៅថ្ងៃទី១៧ ខែតុលា នេះ បានសម្រេចបន្ថែមកញ្ចប់ថវិកាចំនួន១០ម៉ឺនដុល្លារបន្ថែមទៀត ជូនដល់ខេត្តខេត្តបន្ទាយមានជ័យ ដោយទទួលបានថវិកាសរុបចំនួន២០ម៉ឺនដុល្លារ។

តាមរបាយការណ៍របស់គណៈកម្មាធិការជាតិគ្រប់គ្រងគ្រោះមហន្តរាយ បានឱ្យដឹងថា ខេត្តបន្ទាយមានជ័យ បានជន់លិចក្រុង/ស្រុក ចំនួន៩ និងឃុំ/សង្កាត់ចំនួន៤៩។ គ្រោះទឹកជំនន់នេះ បានធ្វើឱ្យប៉ះពាល់ប្រជាពលរដ្ឋ ជាង១ម៉ឺនគ្រួសារ ហើយប្រជាពលរដ្ឋ ជាង២ពាន់គ្រួសារ ត្រូវបានជម្លៀសទៅរកទីទួលសុវត្ថិភាព៕