លោក Trump ព្រមានពីការពន្យារពេលការរាប់សន្លឹកឆ្នោត ខណៈលោក Obama និងលោក Biden រៀបចំការជួបជុំរួមគ្នាជាលើកដំបូង

ដោយ៖ យូ វីរៈ | ថ្ងៃអង្គារ ទី៣ ខែវិច្ឆិកា ឆ្នាំ២០២០ |

497

អាមេរិក៖ លោក Donald Trump ប្រធានាធិបតីសហរដ្ឋអាមេរិកបានអះអាងកាលពីថ្ងៃសៅរ៍ថា អ្នកបោះឆ្នោតនឹងត្រូវរង់ចាំរាប់សប្ដាហ៍ បន្ទាប់ពីថ្ងៃបោះឆ្នោតរហូតដល់ពួកគេដឹងថា អ្នកណាឈ្នះ។ ខណៈកំពុងធ្វើយុទ្ធនាការនៅក្នុងរដ្ឋ ដែលមានការប្រកួតប្រជែងយ៉ាងខ្លាំងគឺរដ្ឋ Pennsylvania លោកប្រធានាធិបតីបានប្រាប់ក្រុមអ្នកគាំទ្រនៅឯពិធីជួបជុំមួយថា ពួកគេនឹងត្រូវរង់ចាំរាប់សប្ដាហ៍ទៀត សម្រាប់លទ្ធផលនៃការបោះឆ្នោតដែលនឹងមកដល់ដោយអះអាងថា “រឿងអាក្រក់នានា” អាចកើតឡើង ខណៈពេលដែលរដ្ឋនេះកំពុងរាប់សន្លឹកឆ្នោត បន្ទាប់ពីការបោះឆ្នោតដែលនឹងចូលមកដល់នៅថ្ងៃទី៣ ខែវិច្ឆិកា។

ការអត្ថាធិប្បាយរបស់លោក Trump មានឡើង ខណៈដែលតុលាការកំពូល បានចេញសេចក្តីសម្រេចកាលពីថ្ងៃសុក្រថា មន្ត្រីបោះឆ្នោតនៅរដ្ឋ Pennsylvania អាចទទួលយកសន្លឹកឆ្នោតអវត្តមាន ដែលមកដល់បីថ្ងៃបន្ទាប់ពីថ្ងៃបោះឆ្នោតដោយប្រគល់ឱ្យ គណបក្សប្រជាធិបតេយ្យទទួលបានជ័យជំនះ ក្នុងការប្រយុទ្ធតាមផ្លូវច្បាប់។ រដ្ឋដែលមានការប្រទាញប្រទង់គ្នាខ្លាំង Pennsylvania ត្រូវបានគេចាត់ទុកថា ជារដ្ឋមួយដែលអាចសម្រេចការឈ្នះចាញ់សម្រាប់ការបោះឆ្នោត។ លោក Trump ដែលបានទទូចជាយូរមកហើយ លើទ្រឹស្ដីដែលគ្មានភស្តុតាងថា សន្លឹកឆ្នោតដែលបានផ្ញើតាមប្រអប់សំបុត្រ ជាទូទៅនាំឱ្យមានការលួចបន្លំអ្នកបោះឆ្នោត។

ក្នុងអំឡុងពេលនៃការប្រមូលផ្តុំគ្នានៅទីក្រុង Detroit រដ្ឋ Michigan លោក Obama ក៏បានដកស្រង់សម្ដីរបស់លោក Mark Meadows ប្រធានបុគ្គលិកសេតវិមាននាពេលថ្មីៗនេះដែលថា សហរដ្ឋអាមេរិកមិនអាចគ្រប់គ្រងវីរុសបានទេ។ លោក Obama បាននិយាយថា យើងបានកត់សម្គាល់ឃើញបែបនេះ ប៉ុន្តែអ្នកដឹងថា នរណានឹងឈ្នះការបោះឆ្នោតនេះ ? គឺលោក Joe Biden នឹងឈ្នះ៕