តុលាការ សម្រេចលើកលែងការចោទប្រកាន់ និងបញ្ឈប់ការចាប់ខ្លួនលោក​ សេង សារី

តុលាការ សម្រេចលើកលែងការចោទប្រកាន់ និងបញ្ឈប់ការចាប់ខ្លួនលោក​ សេង សារី

ភ្នំពេញ៖ នៅថ្ងៃទី២១ ខែកញ្ញា ឆ្នាំ២០២១នេះ លោក​ចៅក្រមស៊ើបសួរសាលាដំបូងរាជធានីភ្នំពេញ លោក​ ញឹម ពិសាល បាន​ចេញដីកាបញ្ឈប់ការចាប់ខ្លួន​លោក សេង សេរី ក្រោយពីមានសំណេរអំពាវនាវរបស់សម្ដេចតេជោ​ នាយករដ្ឋមន្ត្រី។

លោក សេង សារី ត្រូវបានតុលាការចោទប្រកាន់ពីបទ រួមគំនិតក្បត់ និង​ញុះញង់បង្កឲ្យមានភាពវឹកវរធ្ងន់ធ្ងរដល់សន្តិសុខសង្គម ប្រព្រឹត្តនៅព្រះរាជាណាចក្រកម្ពុជា​ និងទីកន្លែងផ្សេងទៀត កាលពីថ្ងៃទី១៧ ថ្ងៃទី២០ ថ្ងៃទី២១ ខែកក្កដា ឆ្នាំ២០២១ និងអំឡុងពេលបន្តបន្ទាប់​បទល្មើសព្រហ្មទណ្ឌដែលមានចែងឲ្យផ្ដន្ទាទោសតាមបញ្ញត្តិមាត្រា ៤៥៣ មាត្រា ៤៩៤ និងមាត្រា ៤៩៥ នៃក្រមព្រហ្មទណ្ឌ។

តាមដីកាលើកលែងចោទប្រកាន់លេខ ៤៥៦០ “ល” ដ.ដ ចុះថ្ងៃទី២១ ខែកញ្ញា ឆ្នាំ២០២១ របស់​ចៅក្រមស៊ើបសួរសាលាដំបូងរាជធានីភ្នំពេញ បាន​សម្រេច​លើកលែងចោទប្រកាន់លើជនត្រូវចោទឈ្មោះ សេង សារី ភេទប្រុស​ កើត​ថ្ងៃទី០៧ ខែតុលា ឆ្នាំ១៩៧៩ គប្បីបញ្ឈប់ដីកាបង្គាប់ឲ្យចាប់ខ្លួនលេខ ៦៨៩ “ល” ដ.ច.ន ចុះថ្ងៃទី០៥ ខែសីហា ឆ្នាំ២០២១ លើជនត្រូវចោទខាងលើនេះ។

គួរបញ្ជាក់ថា កាលព្រឹកថ្ងៃទី២០កញ្ញាម្សិលមិញ សម្តេចតេជោ ហ៊ុន សែន តាមរយៈទំព័រហ្វេសប៊ុកផ្លូវការបានស្នើឲ្យតុលាការបញ្ឈប់ដីកាតាមចាប់លោក សេង សារី។ សម្តេចថា សម្តេចបានស្តាប់ការបកស្រាយរបស់លោក សេង សារី យ៉ាងយកចិត្តទុកដាក់ក្នុងបទសម្ភាសជាមួយសារព័ត៌មាន The Cambodia Daily ហើយសម្តេចឈ្វេងយល់ថា ការបកស្រាយរបស់លោក អំពីកម្លាំងទាំង៦នោះ គឺសមហេតុផល និងអាចទទួលយកបាន។ ដូច្នេះហើយសម្ដេចបាន​អំពាវនាវ​ឲ្យស្ថាប័នតុលាការពិនិត្យ ពិចារណាបញ្ឈប់ដីកាចាប់ខ្លួនលោក​បណ្ឌិត សេង សារី ។ ទន្ទឹមគ្នានេះ សម្តេចលើកទឹកចិត្តឲ្យលោក សេង សារី បន្តកិច្ចការស្រាវជ្រាវ និងវិភាគបញ្ហាសង្គមបន្តទៀត ដើម្បីជាប្រយោជន៍ដល់ការសិក្សាស្រាវជ្រាវផ្នែកវិទ្យាសាស្ត្រសង្គម៕