ឱសថខុសច្បាប់ និងផលិតផលក្លែងក្លាយជាង ៥០០តោន ត្រូវបានដុតកម្ទេចចោល

ឱសថខុសច្បាប់ និងផលិតផលក្លែងក្លាយជាង ៥០០តោន ត្រូវបានដុតកម្ទេចចោល

ភ្នំពេញ​៖ ឱសថ​ខុស​ច្បាប់ ​និ​ងផលិត​ផល​ក្លែង​ក្លាយ​ ៦មុខ​​ រួម​មាន ​ផលិតផល​ឱសថ​ គ្រឿង​សំអាង ​ថ្នាំ​កសិកម្ម បារី​អេឡិចត្រូនិច ផលិត​ផល​ប្រើប្រាស់ ​និងគ្រឿងឧបភោគបរិភោគ ជាង​ ៥០០​តោន ​ត្រូវ​បាន​ដុតកម្ទេចចោល នៅថ្ងៃទី​៥​ ខែវិច្ឆិកា​ ឆ្នាំ​២០២០​ ក្រោមអធិបតីភាព​ឯកឧត្តម កើត រិទ្ឋ រដ្ឋមន្រ្តីក្រសួងយុត្តិធម៌។

គណៈកម្មាធិការជាតិប្រយុទ្ធប្រឆាំងផលិតផលក្លែងក្លាយ ដែលបង្កគ្រោះថ្នាក់ មានហានិភ័យខ្ពស់ដល់សុខភាព និងសុវត្ថិភាពសង្គម នៃក្រសួងមហាផ្ទៃ បានរៀបចំកម្មវិធីកម្ទេចចោលឱសថខុសច្បាប់ចំនួន៧.៧តោន និងផលិតផលក្លែងក្លាយចំនួន៥៣៣តោន ដែលកងកម្លាំងសមត្ថកិច្ច ចម្រុះ នៃគណៈកម្មាធិការបានបង្ក្រាប និងរឹបអូសនាពេលកន្លង។

ឯកឧត្តម មៀច សុផាន់ណា រដ្ឋលេខាធិការក្រសួងមហាផ្ទៃ និងជាប្រធានគណៈកម្មាធិការប្រយុទ្ឋប្រឆាំងផលិតផលក្លែងក្លាយ បានឱ្យដឹងថា ការកម្ទេចចោលឱសថអន់គុណភាព និងផលិតផលក្លែងក្លាយនៅពេលនេះ គឺមាន០៦មុខរួមមាន៖ ផលិតផលឱសថ គ្រឿងសំអាង ថ្នាំកសិកម្ម បារីអេឡិចត្រូនិច ផលិតផលប្រើប្រាស់ និងគ្រឿងឧបភោគបរិភោគ។

ឯកឧត្តមបន្តថា ផលិតផលក្លែងក្លាយត្រូវបានចាត់ទុកជាបទល្មើស និងពាក់ព័ន្ធជាមួយបទឧក្រិដ្ឋឆ្លងដែន ដែលធ្វើអោយខាតបង់ដល់វិស័យសេដ្ឋកិច្ចជាតិ។ទស្សនៈវិស័យ និងបេសកម្មរបស់គណៈកម្មាធិការ គឺមិនត្រឹមតែបាននឹងកំពុងការពារ និងលើកស្ទួយសុខុមាលភាពប្រជាជនយើងប៉ុណ្ណោះទេ ហើយថែមទាំងធ្វើអោយអ្នកវិនិយោគទាំងឡាយ នាំគ្នាគោរច្បាប់ និងនាំចំណូលបង្កើនពន្ឋជូនរដ្ឋ។

គួរបញ្ជាក់ដែរថានេះគឺជាលើកទី០៩ហើយដែលគណៈកម្មាធិការប្រយុទ្ធប្រឆាំងផលិតផលក្លែងក្លាយ បានធ្វើពិធីដុតកម្ទេចចោល​នូវ​ផលិតផលក្លែងក្លាយ ជាពិសេសផលិតផលដែលធ្វើអោយប៉ះពាល់ដល់សុខភាពនិងអាយុជីវិតអ្នកប្រើប្រាស់៕