កម្ពុជាទទួលជំនួយទូបង្កករក្សាវ៉ាក់សាំងជាង ១០០គ្រឿង និងបរិក្ខារប្រព័ន្ធត្រជាក់​មួយ​ចំនួន​ទៀត ពីអូស្ត្រាលី

កម្ពុជាទទួលជំនួយទូបង្កករក្សាវ៉ាក់សាំងជាង ១០០គ្រឿង និងបរិក្ខារប្រព័ន្ធត្រជាក់​មួយ​ចំនួន​ទៀត ពីអូស្ត្រាលី

ភ្នំពេញ ៖ កម្ពុជា ទទួលជំនួយទូបង្កកត្រជាក់ខ្លាំង ចំនួន៣៣គ្រឿង ទូទឹក​កករក្សាវ៉ាក់សាំងចំនួន ១០០គ្រឿង និងបរិក្ខារប្រព័ន្ធត្រជាក់មួយចំនួនទៀត ដែលជាជំនួយរបស់រដ្ឋាភិបាល និងប្រជាជន នៃប្រទេសអូស្ត្រាលី ។

ពិធីប្រគល់-ទទួលជំនួយខាងលើនេះ បានប្រព្រឹត្តទៅនារសៀលថ្ងៃទី២៨ ខែកុម្ភៈ ឆ្នាំ២០២២​ ក្រោម​វត្តមាន​ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល និងឯកឧត្តម Pablo Kang (ផាប្លូ កាង) ឯកអគ្គរដ្ឋទូត នៃប្រទេសអូស្រ្តាលី ប្រចាំព្រះរាជាណាចក្រកម្ពុជា នៅ​ឃ្លាំងឱសថ​កណ្តាល នៃក្រសួងសុខាភិបាល ។

លោកស្រី ហ្វ័ររូ ហ្វ័រយូហ្សាត តំណាងអង្គការយូនីសេហ្វ ប្រចាំព្រះរាជាណាចក្រកម្ពុជា បាន​មានប្រសាសន៍​ថា យូនីសេហ្វ មានមោទនភាព ដែលបានសហការ​យ៉ាងជិតស្និទ​ជាមួយ​រាជ​រដ្ឋាភិបាល និងដៃគូនានា ដូចជាស្ថានទូតអូស្រ្តាលី ក្នុងយុទ្ធនាការ​ចាក់វ៉ាក់សាំង​ឈាន​មុខ​ក្នុង​ពិភពលោក របស់ប្រទេសកម្ពុជា។ ជាមួយនឹងអំណោយសប្បុរសធម៌របស់រាជរដ្ឋាភិបាលអូស្រ្តាលី យើង​នឹងអាចបន្តគាំទ្រការប្រយុទ្ធប្រឆាំងនឹងជំងឺកូវីដ-១៩ របស់ប្រទេសកម្ពុជា និងពង្រឹង​ប្រព័ន្ធ​សុខាភិបាល​ទាំងមូល ក្រោយបន្ទាប់ពីជំងឺរាតត្បាតនេះផងដែរ។ សមត្ថភាព​បន្ថែម​ នៃ​បរិក្ខារ​ប្រព័ន្ធ​ត្រជាក់នេះ នឹងមានតម្លៃមិនអាចកាត់ថ្លៃបាន ចំពោះសេវាសុខាភិបាល សម្រាប់​រយៈពេលជា​ច្រើនឆ្នាំខាងមុខ ដូចជាការពង្រឹងការផ្តល់វ៉ាក់សាំងជាប្រចាំដល់កុមារ និងការសង្រ្គោះអាយុជីវិតកុមាររាប់មិនអស់។ យើងរីករាយណាស់ ដោយបានដើរតួ​នាទី​ជាផ្នែកមួយ​ នៃកេរ្តិ៍ដំណែលនេះសម្រាប់អនាគត។

នាឱកាសនោះដែរ ឯកឧត្តម Pablo Kang (ផាប្លូ កាង) បានសង្កត់ធ្ងន់ថា ទូបង្កករក្សាវ៉ាក់សាំងចំនួន ១៣៣គ្រឿងនេះ គឺជាផ្នែកមួយនៃកញ្ចប់គាំទ្រចំនួន ៣៥,៧លានដុល្លារអូស្រ្តាលី ពីរាជរដ្ឋាភិបាលអូស្រ្តាលី ដែលកំពុងត្រូវបានផ្តល់ក្នុងភាពជាដៃគូជាមួយយូនីសេហ្វ។ កញ្ចប់គាំទ្រនេះ រួមមានវ៉ាក់សាំងប្រភេទ Pfizer-BioNTech ចំនួន២,៣៥លានដូស ដែលត្រូវបានផ្តល់ជូនព្រះរាជាណាចក្រកម្ពុជា កាលពីខែធ្នូ កន្លងមកនេះ។ ឯកឧត្តម ឯកអគ្គរដ្ឋទូតអូស្រ្តាលី ក៏បានសម្តែងនូវការកោតសរសើរចំពោះរាជ រដ្ឋាភិបាលកម្ពុជា និងក្រសួងសុខាភិបាល ដែលបានខិតខំប្រឹងប្រែងមិនខ្លាចនឿយហត់ ក្នុងការទប់ស្កាត់ ការរាតត្បាតជំងឺកូវីដ-១៩ ក៏ដូចជាការការពារសុខភាពរបស់ប្រជាជនកម្ពុជាទាំងមូល និងសូម ថ្លែងអំណរគុណយ៉ាងជ្រាលជ្រៅដល់រាជរដ្ឋាភិបាលកម្ពុជា ដែលបានចាក់វ៉ាក់សាំងកូវីដ-១៩ ដល់មន្រី្តការទូត និងជនជាតិអូស្រ្តាលីទាំងអស់ ដែលរស់នៅលើកទឹកដីកម្ពុជា។

ឯកឧត្តមសាស្រ្តាចារ្យ ម៉ម ប៊ុនហេង រដ្ឋមន្រី្តក្រសួងសុខាភិបាល បានគូសបញ្ជាក់ពីទឹកចិត្ត​សប្បុរសធម៌ដ៏ថ្លៃថ្លារបស់រដ្ឋាភិបាល និងប្រជាជន នៃប្រទេសអូស្រ្តាលី ត្រូវបានចងចាំទុក​ដោយរាជរដ្ឋាភិបាលកម្ពុជា និងមន្រី្តសុខាភិបាល ព្រមទាំងអ្នករងគ្រោះដោយជំងឺកូវីដ-១៩ ក៏សូមថ្លែងអំណរគុណយ៉ាងជ្រាលជ្រៅចំពោះជំនួយមនុស្សធម៌របស់រដ្ឋាភិបាល និងប្រជាជន នៃប្រទេសអូស្រ្តាលី ដែលជាកាយវិការ នៃវប្បធម៌ចែករំលែកជាមួយរាជរដ្ឋាភិបាលកម្ពុជា ក្រោមការដឹកនាំដ៏ឈ្លាសវៃ និងប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រី្ត នៃព្រះរាជាណាចក្រកម្ពុជា ជាពិសេសក្នុងកាលៈទេសៈបច្ចុប្បន្ន ដែលយើងបាន នឹងកំពុងខិតខំប្រឹងប្រែងរួមគ្នា ដើម្បីជំរុញវិធានការការពារ ទប់ស្កាត់ និងឆ្លើយតបការរាលដាលជំងឺកូវីដ-១៩ នៅប្រទេសកម្ពុជា៕ BTVNews